Klei Aê Diê Blŭ: I Y‑Pêtrôs 3:13
Êlan kliăng: “Tơdah diih hur har kơ klei jăk, hlei pô srăng ngă jhat kơ diih?” (I Y‑Pêtrôs 3:13)
Klei êmuh ksiêm mĭn: Ya klei Khua ƀĭng kna Y‑Pêtrôs mtă mtăn kơ phung đăo êjai dôk hdĭp ti lăn ala bi kdơ̆ng hŏng Klei Mrâo Mrang Jăk? Ya ngă ñu mtă mtăn msĕ snăn? Si drei mă yua klei mtô anei tơdah tuôm hŏng klei bi kdơ̆ng hlăm bruă hiu hưn klei đăo?
Khua Yang Yêsu wah lač leh hŏng Aê Diê Ama snei: “Kâo amâo akâo kơ Ih mă ba diñu kbiă mơ̆ng lăn ala ôh, ƀiădah čiăng kơ Ih kiă kriê diñu mơ̆ng pô jhat.” (Y‑Yôhan 17:15). Phung đăo kơ Krist mâo bruă klam yuôm Khua Yang Yêsu jao, brei jing pô hưn bi sĭt kơ Ñu ti krah lăn ala anei (Y‑Mathiơ 28:18-19), ƀiădah dôk hdĭp hlăm lăn ala bi kdơ̆ng hŏng Aê Diê, sĭt nik amâo jing klei ênưih ôh (Y‑Mathiơ 10:16-18, 21-23). Wăt hlăm êjai mông Khua ƀĭng kna Y‑Pêtrôs čih hră mơĭt anei, klei ngă jhat ktang tĭt kluôm jih phung anak ƀuôn sang Aê Diê, mơ̆ng mtao Nêrô. Si dưi hưn bi sĭt kơ Khua Yang Yêsu ti krah lăn ala bi kdơ̆ng msĕ snăn? khua ƀĭng kna atăt gai brei kơ Phung Sang Aê Diê dŭm êlan hdră yuôm hlăm hră čih mơĭt I Y‑Pêtrôs 3:13-17. Êlan hdră mrô 1 jing, brei Hur Har Ngă Klei Jăk.
Lu phung đăo hlăk anăn thâo săng čhuai kơ klei mtô mơ̆ng Khua Yang leh anăn phung khua ƀĭng kna, diñu lač lăn ala bŏ hŏng klei jhat ƀai snăn ya yuôm drei gĭr ktĭr rŭ mdơ̆ng, ya yuôm ngă klei jăk, kyuadah êlâo êdei ăt arăng ngă jhat mơh! Mơ̆ng klei mĭn soh čhuai anăn yơh êlưih mtrŭt phung đăo duah knhuah hdĭp dôk hjăn păn, klah đuĕ mơ̆ng êpul êya. Ƀiădah lĕ, boh blŭ Khua ƀĭng kna Y‑Pêtrôs yua čiăng êmuh diñu, brei ƀuh wăt tơdah klei jing ala ƀuôn bŏ hŏng jhat ƀai dưn, wăt tơdah mâo phung khua mtao jhat ƀai snăk sơưn msĕ si mtao Nêrô dưn, ƀiădah ăt mâo sa êlan hdră kluôm, anăn jing tơdah phung đăo “hur har ngă klei jăk” snăn amâo mâo pô ngă jhat kơ diñu ôh.
Mta čuăn tinei jing phung đăo amâo knŏng “ngă klei jăk” ôh, ƀiădah brei “hur har ngă klei jăk”. Hur har čiăng lač hŏng jih ai tiê, pral kdal, bi êdah klei sa čô mnuih mâo klei khăp prŏng snăk kơ sa klei kñăm kčah sĭt êmĭt. Hlăm ênuk Klei Bi Mguôp Mrâo, mâo sa êpul kđi čar khăp kơ lăn čar, arăng pia kơ diñu Sêlôt, mblang jing “mnuih hur har”, ƀuăn rơ̆ng krŭ mtlaih Israel mơ̆ng klei phung čar tue ktư̆ juă, hŏng jih djăp mta hdră êlan diñu dưi ngă, tơl wăt tŭ klei djiê dưn. Klei Khua ƀĭng kna Y‑Pêtrôs čiăng iêô mthưr grăp čô Phung đăo kơ Krist amâo knŏng ngă klei jăk ôh ƀiădah brei khăp čiăng kơ klei jăk hŏng jih ai tiê, msĕ si phung khăp kơ lăn čar diñu hur har êdimima. Ti djiêô anăn, boh blŭ “hur har” ăt mblang jing pô tui ngă msĕ, msĕ si boh blŭ Khua ƀĭng kna Y‑Pôl yua hlăm I Kôrantô 4:16: “Brei diih jing phung tui kâo”. Snăn, Khua ƀĭng kna Y‑Pêtrôs čiăng kơ phung đăo tui ngă msĕ, tui ngă klei jăk, jih jang klei jăk Yang Krist pô ngă klei bi hmô leh kơ diñu.
Hruê anei, klei truh hlăm klei hdĭp năng ai bi mlih mdê hĭn, ƀiădah knuih jing bi kdơ̆ng mơ̆ng Satan amâo tuôm mlih ôh. Brei phung anak ƀuôn sang Aê Diê ăt “hur har kơ klei jăk” nanao, kyua knŏng tơdah drei khăp čiăng êdimima ngă klei jăk kơh srăng mâo klei dưi hĭn leh anăn dưi bi rai klei ktang mơ̆ng klei jhat ƀai.
Si ngă drei hur har kơ klei jăk mơ̆ wăt tơdah tuôm hŏng si mta klei bi kdơ̆ng?
Wah lač: Ơ Khua Yang, bi mni lač jăk kơ Khua Yang bi mtlaih leh kâo mơ̆ng klei phat kđi klei soh, čiăng brei kâo jing anak klei mngač Ih. Akâo Khua Yang đru kâo dôk hdĭp bi êdah klei jăk siam Khua Yang kơ lăn ala mmăt tĭt anei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
