I Petus 3:13
Nqe cim:
“Yog nej ua nej lub neej zoo, leejtwg yuav ua tau phem rau nej?” (I Petus 3:13)
Lus nug rau sawvdaws xav:
– Timthawj Petus ntuas cov ntseeg yam dabtsi thaum nyob nrog lub ntiajteb uas tawmtsam Txojmoo Zoo?
– Vim li cas Petus ntuas li ntawd?
– Peb siv cov lus qhia no thaum ntsib kev tawmtsam hauv kev ua haujlwm li cas?
Tswv Yexus thov Leej Txiv hais tias: “Kuv tsis tau thov kom Koj coj lawv tawm hauv lub ntiajteb no mus, tiamsis Kuv thov Koj tsomkwm lawv kom lawv tsis txhob raug dab Ntxwgnyoog dag ntxias.” (Yauhas 17:15). Cov ntseeg Yexus tau Tswv Yexus cob tes haujlwm mus ua timkhawv rau Nws hauv lub ntiajteb no (Mathais 28:18-19), tiamsis nyob hauv lub ntiajteb uas tawmtsam Vajtswv yeej tsis yoojyimm kiag li (Mathais 10:16-18, 21-23). Kiag lub sijhawm uas Timthawj Petus sau tsab ntawv no, huabtais Loos tsimtxom cov ntseeg Yexus heev kawg nkaus li. Yuav ua li cas thiaj ua tau timkhawv rau Tswv Yexus nyob rau lub ntiajteb uas tawmtsam tus Tswv? Timthawj Petus thiaj taw qhia rau Pawg Ntseeg paub cov lw tseemceeb hauv tsab ntawv I Petus 3:13-17. Tus lw thib ib yog Rau Siab Ua Zoo.
Ntau tus ntseeg Yexus nyob tiam ntawd totaub yuam kev qhov uas tus Tswv cov thwjtim qhia, lawv hais tias lub ntiajteb no puv npho tej kev phem qias, vim li cas yus yuav tsum siv zog txhim tsa, ua tej haujlwm zoo ua dabtsi, rau qhov ntxov tsis lig los yuav raug tsimtxom! Vim qhov xav yuam kev no ua rau ntau tus ntseeg nrhiav kev ua neej cais tawm pab pawg, khiav tawm hauv cov neeg coob coob mus. Txawm yog li ntawd los, Timthawj Petus lo lus nug qhia paub txawm yog tej neeg sawvdaws ua phem, thiab txawm muaj tej tug vajntxwv ua phem kawg nkaus zoo li Nelaus (Nê-rô), los tseem muaj tus lw kos tseg, ntawd yog cov ntseeg Yexus “rau siab ua zoo” ces yuav tsis muaj leejtwg ua phem rau lawv.
Qhov teebmeem yog cov ntseeg tsis yog “ua zoo”xwb tiamsis tseem yuav tsum“rau siab ua zoo”. Rau siab txhais tau hais tias nquag plias, kub siab, hais txog tus neeg muaj txojkev nyiam rau ib lub homphiaj tshwjxeeb. Nyob rau tiam Vajluskub Tshiab, muaj ib pab neeg ceev tebchaws, hu ua Xelauj, txhais hais tias “cov neeg kub siab”, coglus yuav pab cawm cov neeg Yudais dim ntawm kev quab yuam caij tsuj ntawm lwm lub tebchaws los ntawm txhua txoj haukev, tsis hais yuav siv kev nruj kev tsiv thiab raug muab txojsia los pauv. Yam uas Timthawj Petus xav nqua hu cov ntseeg Yexus tsis yog ua zoo xwb tiamsis yuav tsum kub siab lug nyiam ua qhov zoo xws li cov neeg ceev tebchaws no ua. Dua li, lo lus “rau siab” kuj txhais tau tias yog tus neeg ua raws, zoo li lo lus Timthawj Paulus siv hauv I Kauleethaus 4:16: “nej ua nej lub neej raws li kuv tus yam ntxwv.” Timthawj Paulus xav kom cov ntseeg xyaum ua qhov zoo uas Yexus Khetos yog tus qauv rau lawv xyaum.
Nimno, lub tsamthawj ua neej hloov pauv tiamsis tus yamntxwv tawmtsam ntawm dab Ntxwgnyoog yeej tsis hloov. Tus Tswv haivneeg cia li “rau siab ua zoo”, rau qhov tsuas yog thaum peb nquag ua yam zoo thiaj kovyeej thiab ua rau lub zog ntawm txojkev phem ploj mus xwb.
Thov Vajtswv,
Tus Tswv, nyuam yaus ua Koj tsaug uas Koj tau cawm nyuam yaus dim lub txim ntawm txojkev txhaum, pub nyuam yaus ua tau Koj tus menyuam nyob hauv qhovkaj. Thov Koj pab kom nyuam yaus ua neej qhia tawm tej kev zoo uas Koj ua rau lub ntiajteb no pom. Nyuam yaus tuav Tswv Yexus lub npe thov, Amees.
Peb puas rau siab ua yam zoo txawm yog yuav ntsib tej kev tawmtsam lawm tau?
Nyeem Vajluskub hauv peb lub xyoo: I Xamuyees 6
Kênh Youtube BHKTHN:
