Rôm 11:11-24
“Iĕm khan thoi noh trŏ mơ̆n mă-lei yua kơ kiơ ‘Bok Kei-Dei chre hŭt dơng noh? Yua kơ sư ưh kơ chu lui. Na iĕm kư̆m lei-lăi, yua kơ iĕm lui na Sư klop tơ noh. ‘Noh na iĕm ‘nĕ pơang kơ đe, kơnh ‘Bok Kei-Dei chre hŭt iĕm dơ̆ng.” (Rôm 11:20)
Nơ̆r jet tơchĕng pơwao:
– ‘Bok Pôk jet tơdrong kiơ lăm trong 11?
– Sư bơtho tơ’bôh tơdrong kiơ kơ bơngai Isơrael păng bơngai lui tơmoi lăm sơ̆p hla bơar ‘Bok Kei-Dei ‘nâu?
– Lu bơ̆n đei pơhrăm iŏk tơdrong kiơ lăm ‘bai pơhrăm ‘nâu?
Lăm Sơ̆p Hla bơar nơ̆r ‘Bok Kei-Dei ‘nâu, ‘bok Pôl đei yua minh tơdrong pơtih gia gah ‘long bri brah klop tơ dơng ‘long đêl chre hŭt wă tơ’bôh tơdrong ‘Bok Kei-Dei dan hơmet ‘măn kơ bơngai Isơrael păng bơngai tơmoi. Lu bơ̆n gô tơchĕng pơwao wă bơ̆n lăng ‘bôh bơ̆n kơdih lăm tơdrong Kră Yang dŏng pơklaih.
‘Bok Pôl đei jet lăm trong 11: “Lu bơngai Isơrael mă khan bơngai yoch dang noh, ‘Bok Kei-Dei ưh kơ achăng lê̆ lu sư hlŏng-hloi ôh. Yua kơ lu bơngai Isơrael yoch, na ‘Bok Kei-Dei pơklaih lu bơngai nai hơdrol, wă kơ lu bơngai Isơrael ‘nhĕng na lui kiơ̆ thoi lu bơngai nai noh.” (Rôm 11:11). Kră Yang pơgơ̆r tôm tơdrong, mă khan lu kon pơlei pơm kơnê̆ kơ sư păng achăng lê̆ Kră Yang na tơdrong dŏng pơklaih đêl dan hơmet oei pơkeh đĕch. Kră Yang đei pơih trong ăn kơ lu bơngai tơmoi băt lui sơng iŏk tơdrong dŏng pơklaih Sư. ‘Nâu ưh kơ trŏ khan wă pơtôch lê̆ kon pơlei Isơrael ôh. Tơdrong ‘nâu gô râu tơiung bơngai Isơrael ‘nhĕng na lui kiơ̆ thoi lu bơngai nai lui. Lu sư gô lăng ming, tơchĕng pơwao păng hơpơi đei dŏng pơklaih thoi lu tơmoi nai đêl đei bơih. Thoi noh na ‘bok Pôl tơbăt yua kơ kiơ kon pơlei nhen thoi ‘long bri brah đei mơ’nah đe chre tŭk lê̆ dơ̆ng yua kơ ưh kơ đei đon lui na tơm chăl tơ bri brah noh wă pơtih kơ tơmoi nai, na đe gô klop lê̆ ‘bơ̆t dơng ‘long đêl chre hŭt noh yua kơ lu sư đei đon lui (trong 20). Mă sư kư̆m pơma pơlong păng pơih trong ăn kơ bơngai Isơrael lăng ‘bôh tơdrong tơnăp dah lu sư lui kơ Kră Yang, sư gô bơyar tơpang ti sơng iŏk lu sư dơ̆ng (trong 23-24). Gô đei râu tơiung tơdrong lui lu sư, lu kon pơlei Isơrael tơ anăp.
Hăm bơngai lui tơmoi nai, ‘bok Pôl đei tơ’blŏk kơ lu sư gah tơm rơh, lu sư ‘noh đơ̆ng tơm ‘long chăt tơ bri brah, wă khan lu sư ưh kơ trŏ kon pơlei Kră Yang. Mălei yua kơ lu sư đei đon lui kơ Yêsu Krist mă ‘Bok Kei-Dei đei mơnat, Sư gô iŏk dơ̆ng ‘long bri brah klop lê̆ dơ̆ng tơ ‘long ‘lơ̆ng, noh wă pơma kơ Yêsu, đei đơ̆ng rơh ‘long ‘lơ̆ng tơgŭm ăn. Na ‘bok Pôl kư̆m đei pơma tơbăt ăn kơ bơngai lui tơmoi nai ‘nĕ kơ pơang kơ đe khan iĕm dơng ‘lơ̆ng hloh kơ dơng mă đe chre tŭk ‘noh. Mălei dah bơ̆n wă khan “dơng sư arih yua kơ tơm, ưh kơsĭ tơm arih yua kơ dơng ôh” (trong 18). Wă khan bơngai lui tơmoi nai ‘nĕ kơ pơang kơ đe, dah wă pơư lei bơ̆n pơma pơư kơ tơdrong ‘mêm mơnat hlĭch chrơp Kră Yang đei chông anhăk bơ̆n lăm hnam dơnŏ Kră Yang. Thoi noh na bơ̆n ‘nĕ kơ pơang mălei athei hli yom kơ Kră Yang, na adrin lăm đon lui păng bơwei bơ̆n kơdih lăm Kră Yang. Dah ưh, lei lu bơ̆n kư̆m nhen thoi tơm ‘long bri brah đe gô chre tŭk.
Ơ Kră Yang, inh bơnê kơ Ih yua kơ Ih ‘mêm ăn đĕch kơ inh gơh mơ̆t lăm hnam dơnŏ Ih, đei tơdrong arih păng dôm tơdrong Ih ăn kơ inh mă Ih ‘mêm kơeng. Apinh Ih tơgŭm inh arih băt bơnê kơ Ih, yak kiơ̆ lăm tơdrong pơyom, păng tơgŭm kơ inh arih đei yua lăm hnam Ih. Krao khan yua anăn Yêsu krist, Amen!
Lu bơ̆n hăm băt tơdrong Kră Yang ăn đĕch kơ lu bơ̆n, kơplah lu bơ̆n nhen thoi dơng ‘long bri brah na klop tơ dơng ‘long ‘lơ̆ng ưh?
Đŏk Sơ̆p Hla bơar ‘Bok Kei-Dei lăm pêng sơnăm: Luka 9
Kênh Youtube BHKTHN:
