II Hơ’mon 20:22-37
Kơkuh kơ lu bơngai mă mơ̆ng,
Năr âu lu bơ̆n gô tơchĕng pơwao ‘bai pơhrăm đei kơ̆l bai: Đon Lui Sĭt Tơpă kiơ̆ kơ lăm Sơ̆p hla bơar Nơ̆r ‘Bok Kei-Dei II Hơ’mon 20:22-27.
22 Kơplah lu sư oei hơri kơkuh bơnê, Kră Yang hơmet minh khŭl răp blah bơngai Ammôn, bơngai Môap păng lu bơngai oei ‘bơ̆t Kông Sêir oei năm blah bơngai Juđa ră na păng lu sư thuơ đĭ. 23 Kon pơlei Ammôn păng kon pơlei Môap năm blah kon pơlei oei ‘bơ̆t Kông Sêir, wă pơlôch pơrăm đĭ lê̆ lu sư; dang kơ lu sư blah pơlôch kon pơlei oei ‘bơ̆t Kông Sêir boih, na lu sư wih tơblah pơlôch băl tơduă. 24 Wă kon pơlei Juđa truh tơ anih kơjung, tơmang ‘bôh lăm thŭng glă đei khŭl tơpôl linh lơlang-lơlap, na kư̆m ‘bôh lu akâu bơngai lôch sơ̆k glơch glach kơpal teh ưh kơ đei bu arih. 25 Jêhôsaphat păng lu kon pơlei sư năm wă iŏk tơmam, ‘bôh đei tơmam păng akâu bơngai lôch lơ tơpă păng đei tơmam gĭt lơ tơpă dônh iŏk mah pă kĕ đĭ; lu sư dônh mah pêng năr, yua kơ tơmam lơ tơpă. 26 Truh năr mă puăn lu sư akŭm băl tơ lăm Thŭng Bêraka, tơ noh lu sư hơri kơkuh ư-ang kơ Kră Yang; yua kơ thoi noh na đe krao anih noh thŭng Bêraka truh tơ dang ei. 27 Đơ̆ng noh pơtao Jêhôsaphat yak adrol kơ đĭ-đăng bơngai Juđa păng lu bơngai oei lăm pơlei Jêrusalem chơt hiôk wih tơ pơlei Jêrusalem; Kră Yang ăn kơ lu sư chơt hiôk, yua kơ Kră Yang blah pơrăm đĭ boih linh ayăt. 28 Lu sư brŏk truh mơ̆t lăm pơlei Jêrusalem, năm truh tơ hnam akŭm tơm Kră Yang reh brŏ dung, tĭngnĭng păng hlôm keng. 29 Wă lu kon pơlei pơla kơtơ̆ng kơ tơdrong Kră Yang blah pơrăm lu ayăt kơ bơngai Isơrael, na lu sư hli tơpă kơ Kră Yang ‘Bok Kei-Dei. 30 Thoi noh, dêh char pơtao Jêhôsaphat hiôk-hian rơnŭk rơnua, yua kơ Kră Yang ‘Bok Kei-Dei ăn kơ sư pơdơh hiôk-hian puăn pah.
31 Thoi noh Jêhôsaphat pơm pơtao pơgơ̆r dêh char Juđa iŏk đơ̆ng sư ‘nao pêng-jĭt pơđăm sơnăm pơgơ̆r oei lăm pơlei tih Jêrusalem ‘bar-jĭt pơđăm sơnăm mĕ sư anăn Asuba kon drŏ-kăn Silhi. 32 Sư yak pơm kiơ̆ trong ‘bă sư Asa, sư ưh kơ weh yak trong nai ôh; sư pơm ‘lơ̆ng trŏ ‘bơ̆t anăp Kră Yang. 33 Mă-lei sư ưh tam mă pơrăm ôh anih kơjung păng kon pơlei ưh tam mă jao jơhngơ̆m kơ Kră Yang ‘bok lu sư. 34 Dôm tơdrong jang nai Jêhôsaphat pơm đơ̆ng blŭng-a truh tơ tôch đei chih răk lăm sơ̆p hla bơar hơ’mon Jêhu, kon drŏ-nglo Hanani, tơdrong hơ’mon noh đei chih răk boih lăm sơ̆p hla bơar lu pơtao Isơrael. 35 Đơ̆ng rŏng kơ noh Jêhôsaphat pơtao Juđa pơgơ̆p hăm Ahasia pơtao Isơrael, bơngai mă pơm kơnê̆. 36 Bre sư pơgơ̆p băl pơm duk tơ Êsiôn Gêber wă năm tơ pơlei Tarsis. 37 Kơplah noh Êliêser kon drŏ-nglo Dôdawahu đơ̆ng pơlei Marêsa khan lê̆ adrol gah Jêhôsaphat khan; “Yua kơ ih đei pơgơ̆p boih hăm Ahasia, Kră Yang Yêhôwa gô pơrăm lê̆ tơdrong jang mă ih đei pơm boih.” Duk mă lu sư pơm noh pơchah, lei na duk noh ưh kơ gơh năm truh tơ Tarsis ôh.
Trong tơm ‘bai pơhrăm ‘nâu:
“Wă lu kon pơlei pơla kơtơ̆ng kơ tơdrong Kră Yang blah pơrăm lu ayăt kơ bơngai Isơrael, na lu sư hli tơpă kơ Kră Yang ‘Bok Kei-Dei.” (II Hơ’mon 20:29)
Nơ̆r jet tơchĕng pơwao:
– Tuch luch nơ̆r krao khan păng đon lui pơtao Jêhôsaphat noh kiơ?
– Lăm chăl arih ih đei blŏk tơdrong kiơ đơ̆ng tơdrong hơ’mon âu?
Kơkuh kơ đĭ đăng,
“Kră Yang ưh kơ trŏ thoi minh ‘nu kon bơngai gơh pơma hơlĕnh, Kŭm ưh kơ trŏ thoi kon bơngai mă gơh tơplih tơdrong tơchĕng ôh. Tơdrong mă sư khan boih, mă sư jor kơ pơm hă? Tơdrong mă sư pơkă, sư ưh kơ pơm keh hă?” (Jô̆ bơngai 23:19). Tơdrong hơ’mon năr âu pơsĭt kơ đon lui đơ̆ng tơdrong krao khan pơtao Jêhôsaphat băt mơn kơ tơdrong mơsêh ‘Bok Kei-Dei “ Kơplah lu sư oei hơri kơkuh bơnê, Kră Yang hơmet minh khŭl răp blah bơngai Ammôn, bơngai Môap păng lu bơngai oei ‘bơ̆t Kông Sêir oei năm blah bơngai Juđa ră na păng lu sư thuơ đĭ. Kon pơlei Ammôn păng kon pơlei Môap năm blah kon pơlei oei ‘bơ̆t Kông Sêir, wă pơlôch pơrăm đĭ lê̆ lu sư; dang kơ lu sư blah pơlôch kon pơlei oei ‘bơ̆t Kông Sêir boih, na lu sư wih tơblah pơlôch băl tơduă. Wă kon pơlei Juđa truh tơ anih kơjung, tơmang ‘bôh lăm thŭng glă đei khŭl tơpôl linh lơlang lơlap, na kư̆m ‘bôh lu akâu bơngai lôch sơ̆k glơch glach kơpal teh ưh kơ đei bu arih.” (trong 22-24). Tơdrong hlĭch dêh tơpă, tơdrong mơsêh Kră Yang ‘Bok Kei-Dei đei tơ’bôh kơplah “Kơplah lu sư oei hơri kơkuh bơnê”.
Năm hơdai kơ tơdrong tơblah kĕ jei đơ̆ng tơdrong ‘Bok Kei-Dei dŏng kŭm dai ba ăn tơdrong arih gah bơhngol lu kon pơlei pơla rai thim hloh, tơdrong hiôk chơt ‘bĕnh blai păng tơdrong ư-ang kơ ‘Bok Kei-Dei rai hloh “ Truh năr mă puăn lu sư akŭm băl tơ lăm Thŭng Bêraka, tơ noh lu sư hơri kơkuh ư-ang kơ Kră Yang; yua kơ thoi noh na đe krao anih noh thŭng Bêraka truh tơ dang ei” (trong 26). “Bêrêka” wă khan “pŭn hiôk” tơdrong tơblah kĕ jei đơ̆ng ayăt âu jing đunh lăm hơ’mon kơ lu bơngai Israel! Hloh kơ ‘noh dơ̆ng tơdrong blah kĕ jei âu ba ăn tơdrong ‘Bok Kei-Dei đei ư-ang lăm lu bơngai nguaih (trong 29-30)
Mã lei tơdrong âu ưh kơ dơ̆ng ‘bơ̆t tơdrong ‘lơ̆ng. Đơ̆ng rŏng kơ hiôk chơt đơ̆ng tơblah kĕ jei noh na lu sư ưh kơ đei krao khan păng chă tơdrong Kră Yang ‘Bok Kei-Dei wă đơ̆ng tơdrong noh na pơm ăn kơ pơtao Jêhôsaphat pơm ‘bơm tơdrong glăI tih thoi sư đei pơm hơdrol sơ̆ , noh jơ̆ “Đơ̆ng rŏng kơ noh Jêhôsaphat pơtao Juđa pơgơ̆p hăm Ahasia pơtao Isơrael, bơngai mă pơm kơnê̆.” (trong 35), păng ‘Bok Kei-Dei đei phak pơrăm pơtao Jêhôsaphat tih krưp dêh (trong 37, pơting hăm Hơ’mon 19:12). Đơ̆ng tơdrong âu ‘bai hŏk ăn kơ bơ̆n kăl kơ pơm kiơ̆ nơ̆r ‘Bok Kei-Dei, blah hăm tơdrong ‘maih wă bơ̆n noh jơ̆ tơdrong tơblah sot đunh. Lu bơ̆n ưh kơ chă tơdrong kĕ jei minh jơ ayơ đĕch mă lei tơdrong tơblah âu ding đĭ chăl arih. ‘Bok Pôl đei tơblŏk ăn kơ lu bơngai lui nĕ kơ lăng khan hoei bơih lăm tơdrong arih mă lei athei “Ning-mônh ‘Bok Kei-Dei gô krao inh iŏk dôm tơdrong Sư apah inh tơ plĕnh ti yua kơ Yêsu Krist lôch tang inh. Thoi noh na inh adrin kơdâu truh tơ anih đêl Sư pơkă, wă kơ inh gơh iŏk dôm tơdrong Sư apah ei”. (Philip 3:14). Hloh kơ ‘noh dơ̆ng, tơdrong yoch đei pơrăm đunh lăm chăl arih kon bơngai. Kŭm đei lơ tơdrong yoch mă juăt kơ pơm na lu bơngai kiơ̆ Kră Yang ‘Bok Kei-Dei kăl kơ pơm “ Dah bơ̆n oei gơnang kơ akâu bơ̆n kơdih, bơ̆n gô pŭ tơdrong phak. Dah bơ̆n gơnang kơ Yang Bơhngol ‘Lơ̆ng wă hŭt lê̆ tơdrong bơ̆n kơdih lei ning-mônh bơ̆n gô arih ling-lang.” (Rôm 8:13) kĕ jei đơ̆ng tơdrong yoch minh ‘măng ưh kơ sĭ ling lang wă kĕ jei đơ̆ng tơdrong yoch noh ôh, thoi noh kăl kơ ling lang kơ chăng krăng, rong tơdrong arih bơ̆n jê̆ hăm Kră Yang păng chu yom kơ Nơ̆r Sư đei bơtho khan.
Bĕ bơ̆n pôm jơhngơ̆m đon krao khan,
Ơ Kră Yang, Inh bơnê kơ Ih yua kơ inh đei jing kon Ih, đei Ih bơwei rong. Apinh Ih ling lang gơnang kơ Ih, Lui kơ ih păng tơnăp kiơ̆ trŏ thoi Ih đei dui ba. Yua anăn Kră Yang Yêsu Krist, Amen.
Ơ đĭ đăng bơngai mơ̆ng mă ‘mêm kơeng,
Lu bơ̆n đei krăng kơchăng păng pơ’lơ̆ng lăm chăl arih bơ̆n lăm tơdrong kiơ?
Tơdrong mơnat đơ̆ng Kră Yang, inh ling lang gơnang
Lui ngeh, tơnăp, đĭ lăm trong yak hiôk chơt
Lăm dôm poh yă lăm chăl arih
Yak năm hăm Kră Yang, tơdrong song ăn đơ̆ng Sư ‘bĕnh blai.
Đŏk Sơ̆p hla bơar nơ̆r ‘Bok Kei-Dei lăm tơpêng sơnăm: Êphêsô 4.
Kênh Youtube BHKTHN:
