Pajlug 29:25
Nqe cim:
“Kev ntshai luag ces yog lub vojhlua cuab tos koj kev, tiamsis yog koj cia siab rau tus TSWV mas koj yuav kaj siab lug” (Pajlug 29:25)
Lus nug rau sawvdaws xav:
– Vajntxwv Xalumoos hais tawm ob txoj kev twg xaiv txhawb yus kev ntseeg?
– Txhawb kev ntseeg tsis yog chaw coj mus txog tej nujnqi twg?
– Peb cheem tsum ua dabtsi kom kovyeej “kev ntshai tibneeg”?
“Kev ntshai” yog hais txog tus neeg muaj yam ntxwv “tshee hnyo vim ntshai heev”, lo lus no hauv lub ntsiab tsis thooj hais txog kev ntshai Vajtswv. Cov lus hauv ntu Vajluskub no tsis yog hais txog hwm, tiamsis yog hais txog kev ntshai tshee hnyo thaum muaj ib yam dabtsi tshwmsim tuaj raug ua rau xav tsis thoob (Exekees 26:15-16). Thaum muaj kev “ntshai tibneeg” ces yog tibneeg tsis “cia siab rau tus TSWV”. Lub ntsiab yog cia siab rau tibneeg hloov kev cia siab rau Vajtswv ces yeej muaj kev ntshai tsis paub xaus. Tseeb tiag, yeej muaj qee tus neeg uas ntshai lwm tus, ntshai lawv tsis kam txais yuav yus, ntshai lawv khiav deb thiab tsis pab yus…
Vajntxwv Xalumoos thiaj ceebtoom hnyav hais tias, “Kev ntshai luag ces yog lub vojhlua cuab tos koj kev”. Tseeb tiag tsis muaj kev ncajncees rau cov uas vamkhom tibneeg, lawv cia siab hais tias yuav tau kev pab tiamsis ho yog lub vojhluas cuab tos kev. “Kev ntshai tibneeg” twb tau cuab Vajtswv cov tub txib uas zoo kawg nkaus qee leej kev los lawm, xws li Anplahas ntshai Anpimelej thiaj hais dag ob zaug txog nws pojniam (Chivkeeb 12:11-13; 20:2, 11), thiab tom qab no Ixaj kuj mus raws nws txiv txoj kev (Chivkeeb 26:7). “Kev ntshai tibneeg” kuj tau dag ntxias timthawj Petus tsis lees paub Tswv Yexus (Mathais 26:69-74), thiab kiag tom qab uas tau Vajtswv zam txim thiab thaum Vaj Ntsujplig nqis los lawd los Petus tseem ntshai tej kev ntshai no (Kalatias 2:11-13).
Tshee hnyo rau tej yam uas lwm tus muaj peevxwm ua tau rau yus, yuav ua rau yus siab yaus ua raws tus neeg ntawd tej lus samhwm limhiam kom zoo nws siab thiab txais yuav Vajtswv kev chim xws li vajntxwv Xa-ules lub txim xubthawj uas cim civ fij khoomfij (1 Xamuyees 13:8-15). Tseeb tiag feem ntau tej yam uas peb ntshai tsis muaj tseeb tsuas yog hauv lub hlwb kev xav, txhawj ntshai xwb. Cia li nco ntsoov hais tias “kev ntshai tibneeg” yog lub vojhluas cuab peb xwb, vim tibneeg yeej ua tsis tau dab tsis rau peb thiab qhov ntawd muaj nrim, lawv yuav pub tau dabtsi rau peb? (Yelemis 17:5-8). Tibneeg yog neeg phem xwb yuav ua cas coj tau qhov zoo los rau peb (Yelemis 17:9)?
Tiamsis yog “cia siab rau tus TSWV mas koj yuav kaj siab lug”. Nov yog ib lo lus siv hauv kev ua tubrog, lub ntsiab yog “txawb rau qhov chaw siab”, txhais hais tias nyob qhov chaw uas yeebncuab raug ntshai (Ntawv Nkauj 27:1-6; 69:29). Tso siab plhuav rau Vajtswv, Nws yuav tuaj peb tog thiab tiv thaiv peb.
Cia kom kovyeej “kev ntshai tibneeg” peb yuav tsum muaj kev ntseeg rau ntawm Vajtswv thiab coglus ua neej mloog Vajtswv lus (Tes Haujlwm 5:29). Tsis tas li ntawd peb yuav tsum muaj txoj kev sib hlub sib raug zoo nrog Vajtswv (1 Yauhas 4:18). Thaum ntawd peb yuav hais tau hais tias: “Tus Tswv yog tus uas pab kuv, kuv yuav tsis ntshai. Leejtwg yuav ua li cas tau rau kuv?” (Henplais 13:6).
Thov Vajtswv,
Vajtswv, nyuam yaus ntseeg Koj, cia siab rau Koj. Thov Koj pab nyuam yaus ua neej txhua hnub paub hwm thiab mloog Koj lus. Kom txhob ntshai ib txoj kev ntshai twg hauv lub ntiajteb no tiamsis ua neej tso siab plhuav rau Koj. Nyuam yaus tuav Tswv Yexus Khetos lub npe thov, Amees.
Peb pheej ntshai tibneeg lossis peb ceev lub siab ntshai Vajtswv?
Nyeem Vajluskub hauv peb lub xyoos: Ntawv Nkauj 78
Kênh Youtube BHKTHN:
