Klei Aê Diê Blŭ: Klei Bi Hriêng 29:25
Êlan kliăng: “Klei huĭ kơ mnuih jing kđông ƀêč, ƀiădah hlei pô knang kơ Yêhôwa mâo klei hơĭt.” (Klei Bi Hriêng 29:25)
Klei êmuh ksiêm mĭn: Ya dua mta klei čuăn ruah mtao Y-Salômôn bi êdah kơ klei đăo? Dưm klei đăo soh anôk atăt truh kơ ya boh jhat srăng tŭ? Ya klei brei drei ngă čiăng dưi hĭn kơ “klei huĭ kơ mnuih”?
“Mnuih” jing klei ktang lăn ala, mtao Y-Salômôn lač čiăng bi mkă hŏng Yêhôwa. “Klei huĭ” mblang jing “ktư̆ yơ̆ng kyua huĭ mduĭ”, boh blŭ anei hlăm klei blŭ phŭn amâo msĕ hŏng boh blŭ yua lač kơ klei huĭ mpŭ kơ Aê Diê ôh. Hrô kơ lač kơ klei huĭ mpŭ, boh blŭ anei hưn mdah klei huĭ mduĭ ktư̆ yơ̆ng ti anăp klei srăng truh bhiâo riâo rit (Y-Êsêkiêl 26:15-16). Bi dră hŏng klei “knang kơ Yêhôwa”, “Klei huĭ kơ mnuih jing kđông ƀêč” mblang jing knang kơ mnuih hrô kơ knang kơ Yêhôwa. Hlăm klei hdĭp mâo lu mnuih huĭ kơ mnuih mkăn, huĭ kơ arăng amâo čiăng tŭ ư ôh pô, huĭ kơ arăng đuĕ kbưi mơ̆ng pô leh anăn amâo čiăng đru ôh pô.
Ƀiădah lĕ, mtao Y-Salômôn hưn mdah sa klei hưn êlâo brei răng ktang tĭt, “Klei huĭ kơ mnuih jing kđông ƀêč”. Jing dleh thâo săng êdi, êjai lu mnuih knang kơ mnuih, hmăng hmưi kơ arăng đru bi mtlaih, ƀiădah jing hĕ kđông ƀêč lĕ. “Klei huĭ kơ mnuih [tuôm leh] jing kđông ƀêč”, mâo đa đa phung dĭng buăl Aê Diê prŏng hĭn msĕ si Y-Abraham huĭ kơ mtao Abimêlek leh anăn dua blư̆ ñu blŭ luar kơ mô̆ ñu pô (Klei Mphŭn Dơ̆ng 12:11-13; 20:2, 11), leh anăn êdei tinăn, anak êkei ñu Y-Isăk lŏ tui hlue êlan ama ñu mơh (Klei Mphŭn Dơ̆ng 26:7). Kyua “Klei huĭ kơ mnuih” yơh mtrŭt khua ƀĭng kna Y-Pêtrôs hngah leh kơ Khua Yang (Y-Mathiơ 26:69-74), leh anăn tơl wăt ñu dưi lŏ bi mrâo leh, leh anăn Yang Mngăt Jăk trŭn leh, klei huĭ anei adôk guôm jŭm ñu mơh (Galati 2:11-13).
Klei huĭ ktư̆ yơ̆ng ti anăp klei mnuih mkăn dưi ngă kơ drei, bi mjing sa čô mnuih jing blao gưt ngă hlue klei diñu mtrŭn mtă soh amâo mâo klei djŏ ôh, kyua čiăng bi mơak kơ diñu, leh anăn tŭ klei Khua Yang ăl ngêñ, msĕ si klei soh tal sa mtao Y-Sôl ngă hlăk ñu ngă yang myơr mnơ̆ng čuh (I Y-Samuel 13:8-15). Jing klei dleh thâo săng êdi, kyuadah lu hlăm klei drei huĭ anăn amâo sĭt ôh, ƀiădah knŏng kbiă hriê mơ̆ng klei bi mĭn pô, huĭ hĕ êlâo. Brei drei hdơr snei, “Klei huĭ kơ mnuih” knŏng jing sa kđông ƀêč, kyuadah anak mnuih amâo klă kluôm ôh leh anăn kdriêl knhal, ya klei diñu dưi brei kơ drei (Y-Yêrêmi 17:5-8)? Leh anăn kyuadah anak mnuih jing jhat ƀai, si diñu dưi ba klei jăk kơ drei (Y-Yêrêmi 17:9)?
Mklăk wĭt, “ƀiădah hlei pô knang kơ Yêhôwa mâo klei hơĭt”. Anei jing sa klei blŭ hlăm phung ling kahan, mblang jing “dưm ti dlông”, čiăng lač arăng dưm leh diñu ti dlông klei huĭ hyưt mơ̆ng phung roh (Klei Mmuñ Hđăp 27:1-6; 69:29). Dưm klei đăo drei hlăm Aê Diê srăng mă tŭ klei răng mgang leh anăn klei đru dŏng mơ̆ng Ñu.
Čiăng dưi hĭn hŏng “Klei huĭ kơ mnuih” brei drei mâo klei đăo kơ Aê Diê leh anăn ƀuăn rơ̆ng dôk hdĭp gưt Klei Aê Diê Blŭ (Bruă Phung Khua Ƀĭng Kna 5:29). Mbĭt djiêô anăn, jing klei bi mguôp klei khăp sĭt suôr hŏng Khua Yang (I Y-Yôhan 4:18). Hlăk anăn drei dưi lač: “Khua Yang jing Pô đru kâo, kâo amâo srăng huĭ ôh; ya mnuih dưi ngă kơ kâo?” (Hêbrơ 13:6).
Si ngă drei khăng huĭ kơ mnuih amâodah djă pioh klei huĭ mpŭ kơ Aê Diê nanao?
Wah lač: Ơ Khua Yang, kâo đăo kơ Ih, đăo kơ klei jăk Ih. Kâo ƀuăn čhuang êbat grăp hruê hlăm klei hdĭp hŏng klei huĭ mpŭ kơ Khua Yang leh anăn gưt Klei Ih Blŭ. Akâo Khua Yang đru kâo sĭt suôr hŏng kei kâo ƀuăn hruê anei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 78
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
