Tơdrong Pơđơ̆k 29:25
“Tơdrong hli kơ kon bơngai thoi hơđong hơ’năk; Mă-lei bơngai bu đei gơnang kơ Kră Yang Yêhôwa oei hơđơ̆ng.” (Tơdrong Pơđơ̆k 29:25)
Nơ̆r jet tơchĕng pơwao:
– Pơtao Sôlômôn tơlĕch ‘bar tơdrong rơih iŏk ayơ kơ tơdrong lui?
– Đon lui ưh kơ trŏ ba tơdrong truh thoi yơ?
– Lu bơ̆n kăl kơ pơm kiơ wă kơ kĕ jei “hli kơ kon bơngai”?
“Kon bơngai” jơhngơ̆m pran Pơtao Sôlômôn đei chih roi pơting hă Kră Yang Yêhôwa. “Tơdrong hli” wă khan “Tơtơ̆ yua kơ hli” nơ̆r ‘nâu kiơ̆ kơ lăm nơ̆r ưh kơ thoi lăm nơ̆r pơma gah hli yom kơ Kră Yang. Tơplih kơ tơdrong pơyom nơ̆r ‘nâu tơ’bôh tơdrong hli tơtơ̆ kơplah đei tơdrong truh ưh kơ tam băt (Êsêkiên 26:15-16). Tơplơ̆ hăm “lui gơnang kơ Kră Yang ‘Bok Kei-Dei”. Lăm tơdrong tơpă đei bơngai hli tơduă bơngai, hli lu sư ưh kơ drơ̆ng sơng iŏk, hli lu sư weh ataih păng ưh kơ wă tơgŭm bơ̆n.
Mă khan lei ră, Pơtao Sôlômôn đei tơlĕch nơ̆r tơbăt, “hli kơ kon bơngai thoi hơđong hơ’năk”. Tơplơ̆ tơpă kơplah kon bơngai gơnang tơduă kon bơngai, chang gô đei tơdrong tơgŭm mălei tă kơ thoi hơđong hơnăk. “hli kơ kon bơngai đêl” thoi hơđong hơnăk đei lu đĭch đam Kră Yang ‘Bok Kei-Dei thoi kơ ‘bok Abraham li kơ pơtao Abimêlĕk păng đei ‘bar ‘măng pơma hơlĕnh gah akăn sư (Blŭng a 12:11-13; 20:2, 11), păng đơ̆ng rŏng kơ ‘noh Isăk kon drŏnglo sư ‘moi kiơ̆ trong ‘bă sư (Blŭng a 26:7). “Hli kơ kon bơngai” kư̆m dai pơhlŭ ‘bok Pêtrôs sơngah kơ Kră Yang (Mathiơ 26:69-74). Păng đơ̆ng rŏng kơ đei hơmet ming păng Yang Bơhngol ‘Lơ̆ng jur, sư oei hli hơnơ̆ng (Galati 2:11-13).
Hli tơtơ̆ tơdrong kiơ ‘bơ̆t bơngai nai gô pơm hăm bơ̆n na pơm kơ minh ‘nu bơngai jing lêl pơm kiơ̆ lu tơdrong ưh kơ trŏ wă pơm kơ lu sư lăp đon păng pŭ iŏk tơdrong phak đơ̆ng Kră Yang, tơm sư thoi tơdrong glăi blŭng a pơtao Sôlômôn kơplah pơyơ̆r tơmam soi ‘buh (I Samuel 13:8-15). Tơplơ̆ dêh gah tơdrong mă bơ̆n nŏng kơ hli mă ưh kơ tơpă lăm đon tơchĕng lu bơ̆n đĕch, chă rŏ lăng, tơchĕng ataih dêh. Athei ‘blŏk “Hli kơ kon bơngai” ‘noh thoi hơđong hơ’năk đĕch, yua kơ kon bơngai bơ̆n kơtul dêh na đei kiơ wă tơgŭm kơ bơ̆n (Jêrêmi 17:5-8)? Yua kơ kon bơngai bơ̆n kơnê̆ răm tơpă liơ mă đei ba ăn kơ bơ̆n tơdrong ‘lơ̆ng (Jêrêmi 17:9)?
Tơplơ̆ dơ̆ng, bơngai “lui gơnang kơ Kră Yang ‘Bok Kei-Dei oei hơnơ̆ng”. ‘Nâu bơih đei chih roi todrong tơpă “dan tơ kơpal” wă khan mă đei tơdrong kiơ wă truh bơngai ayăt wă kơ pơm kơnê̆ (Hơriso 27:1-6; 69:29). Lui gơnang kơ Kră Yang gô đei Sư bơwei păng dŏng tơgŭm.
Wă kơ kĕ jei “hli kơ kon bơngai” lu bơ̆n kăl kơ đei đon lui kơ Kră Yang păng pơkă arih chu kiơ̆ nơ̆r Sư (Tơdrong jang 5:29). Lăm noh đei tơdrong tơ’bưh ‘mêm mơnat hăm Kră Yang (I Yôhan 4:18). Kơplah noh lu bơ̆n gơh pơma: “Thoi noh na bơ̆n athei lui kơ tơdrong Sư khan noh, bơ̆n athei khan kơdih thoi âu: “Inh đei Kră Yang tơgŭm inh, inh ưh kơ hli kơ đe ôh, ưh kơ đei bu kĕ pơm kơ inh.” (Hêbrơ 13:6).
Ơ Kră Yang, inh lui kơ Ih, lui kơ dôm tơdrong ‘lơ̆ng Ih. Inh apinh yak kiơ̆ Ih rim năr lăm chăl arih inh hăm jơhngơ̆m hli yom kơ Ih păng chu kiơ̆ nơ̆r Ih. Apinh Ih tơgŭm inh pơm kiơ̆ nơ̆r Ih đei pơkă năr âu, krao khan yua anăn Kră Yang Yêsu Krist, Amen.
Lu bơ̆n ngăl hli kơ kon bơngai dah mă wei jơhngơ̆m hli yom kơ Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 78
Kênh Youtube BHKTHN:
