Klei Aê Diê Blŭ: I Y-Pêtrôs 2:11-12
Êlan kliăng: “Brei diih dôk dơ̆ng ƀơ̆ng huă jăk nanao ti krah phung amâo đăo,…” (I Y-Pêtrôs 2:12)
Klei êmuh ksiêm mĭn: Ya ngă khua ƀĭng kna Y-Pêtrôs bi msĕ phung đăo dôk hdĭp ti lăn ala msĕ si phung tue? Si mblang dôk dơ̆ng ƀơ̆ng huă jăk? Si klei dưi bi hmăi kơ phung amâo đăo mơ̆ng klei dôk dơ̆ng ƀơ̆ng huă phung đăo?
Khua ƀĭng kna Y-Pêtrôs bi msĕ phung đăo kơ Krist dôk hdĭp ti krah lăn ala msĕ si “phung tue, phung dôk ti êngao čar pô”. Hră mơĭt Hêbrơ ăt lač klă phung aê đưm drei mphŭn dô jing “jing tue leh anăn phung hiu bhiâo ti lăn ala” leh anăn čang guôn sa boh čar jăk siam hĭn (Hêbrơ 11:13-14). Leh jing phung đăo kơ Krist drei jing phung ƀuôn sang Ƀuôn Ala Mtao Adiê yơh. Drei knŏng dôk hdĭp bhiâo ti lăn ala dôk guôn hruê wĭt kơ čar drei hlăm adiê Khua Yang mprăp brei leh kơ drei (Y-Yôhan 14:1-3). Kyuanăn khua ƀĭng kna Y-Pêtrôs mtă kơ phung đăo brei “hngah hĕ kơ klei kđeh tluh dôk bi blah ngă kơ mngăt diih”. Hră mơĭt Galati 5:16-21 răk dŭm mta anăn klei kđeh tluh brei phung đăo kơ Krist ñĕ đuĕ hĕ, čiăng hdĭp tui si klei Yang Mngăt Jăk atăt gai. Tơdah thâo săng klă klei hdĭp ti lăn ala knŏng jing bhiâo, drei amâo srăng lŏ khăp čiăng amâodah pioh lu hruê mmông đei kơ lăn ala anei ôh. Bi mklăk wĭt, drei uêñ mĭn čiăng ngă tui si klei Khua Yang čiăng leh anăn duh kơ klei hdĭp hlŏng lar (I Y-Yôhan 2:15-17).
Klei khua ƀĭng kna Y-Pêtrôs lŏ mtă mơh kơ phung đăo anăn jing “Brei diih dôk dơ̆ng ƀơ̆ng huă jăk nanao ti krah phung amâo đăo” (êlan 12). Boh blŭ “dôk dơ̆ng ƀơ̆ng huă” čiăng lač kơ kluôm jih klei ngă, klei blŭ hrăm, knhuah hdĭp sa čô mnuih. Bi boh blŭ “jăk” čiăng lač kơ klei jăk siam kpă ênô, thâo khăp čiăng kơ arăng. Khua ƀĭng kna Y-Pêtrôs hmăng hmưi phung đăo dôk hdĭp jăk siam, mâo klei blŭ tlao nao hriê ênuah ênô, jăk mơak leh anăn bi êdah klei siam mnuih mâo Khua Yang dôk mbĭt. Mơ̆ng anăn, wăt tơdah “phung amâo đăo” jing phung kreh mưč, mčeh luar ăt srăng ƀuh klei juh mlur mơ̆ng knhuah hdĭp phung đăo, čiăng kơ truh hruê mmông Khua Yang čuă, diñu srăng mpŭ mni kơ Aê Diê. Khua Yang Yêsu Pô ăt mtô mơh kơ phung ƀĭng kna snei, brei klei hdĭp diñu mtrang mngač ti anăp arăng čiăng kơ arăng ƀuh bruă jăk diñu srăng mpŭ mni kơ Ama hlăm adiê (Y-Mathiơ 5:16).
Klei mtă “dôk dơ̆ng ƀơ̆ng huă jăk” jing yuôm snăk hŏng phung đăo hlăm gưl ênuk tal êlâo, kyuadah digơ̆ dôk tŭ klei phung amâo đăo kčŭt mčeh hŏng klei blŭ luar kơ klei đăo digơ̆. Phung anak ƀuôn sang Aê Diê amâo lŏ bi kdơ̆ng wĭt ôh, ƀiădah ăt dôk dơ̆ng ƀơ̆ng huă jăk nanao. Hŏng knhuah hdĭp kpă ênô, êdu êun yơh srăng dưi juh mlur phung mnuih dôk bi kdơ̆ng hŏng pô. Klei hưn bi sĭt hdĭp leh anăn ktang phĭt hĭn mơ̆ng sa čô pô đăo kơ Krist, čiăng dưi brei arăng thâo kral Khua Yang, anăn jing klei dôk dơ̆ng ƀơ̆ng huă jăk hlăm knhuah hdĭp grăp hruê yơh. Leh anăn knhuah hdĭp jăk sĭt kpă ăt srăng brei phung roh bi mni kơ Aê Diê mơh. Akâo Khua Yang brei drei mtrang klei mngač Khua Yang kơ jih jang mnuih ƀuh knhuah hdĭp jăk kpă drei, srăng mpŭ mni Ama drei hlăm adiê. Anăn yơh jing mnơ̆ng bi blah ktang hĭn đru drei dưi găn gao klei lông dlăng êjai hdĭp klei hdĭp đăo ti krah lăn ala.
Si ngă sĭt mơ̆ drei hlăk dôk “dôk dơ̆ng ƀơ̆ng huă jăk” grăp hruê, čiăng kơ arăng dưi ƀuh Khua Yang mơ̆ng knhuah hdĭp drei?
Wah lač: Ơ Khua Yang, akâo Ih đru kâo hdĭp klei hdĭp jăk kpă nanao, leh anăn êdu êun ti krah jih jang mnuih, čiăng kơ hŏng klei anăn arăng dưi thâo kral Khua Yang leh anăn mpŭ mni Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
