I Petus 2:11-12
Nqe cim:
“Nej yuav tsum ua nej lub neej kom zoo, txawm yog cov neeg tsis ntseeg Vajtswv uas nrog nej koom zej koom zos nyob ua ke” (I Petus 2:12)
Lus nug rau sawvdaws xav:
– Vim licas Timthawj Petus muab cov ntseeg piv li cov neeg tuaj ua qhua?
– Ua lubneej kom zoo muaj lub ntsiab licas?
– Dhau ntawm cov ntseeg lubneej muaj qabhau licas rau cov tsis ntseeg?
Timthawj Petus piv tus ntseeg Yexus ua neej nyob hauv ntiajteb no zoo li “cov neeg uas taug kev tuaj ua qhua xwb”. Tsab ntawv Henplais kuj qhia meej hais tias peb cov yawgkoob thaum ub kuj “tsis muaj teb tsis muaj chaw nyob hauv ntiajteb no, lawv taug kev tuaj ua qhua xwb” thiab lawv tabtom tos ntsoov ib lub tebchaws uas zoo rau lawv nyob (Henplais 11:13-14). Tus ntseeg Yexus thaum los ntseeg ces tau los ua pejxeem hauv tebchaws Ceeb Tsheej. Peb tsuas ua neej nyob ib ntus hauv ntiajteb no tos hnub tau mus nyob tebchaws saum ntuj uas tus Tswv twb npaj tseg rau peb lawm (Yauhas 14:1-3). Vim li ntawd, Timthawj Petus ntuas cov ntseeg hais tias: “Nej tsis txhob cia tej kev phem kev qias uas niaj hnub tawmtsam nej kav nej lub siab.” Tsab ntawv Kalatias 5:16-21 hais txog tej yam sab nqaij tawv ntshaw uas tus ntseeg Yexus yuav tsum qaij deb kom xwv ua tau lubneej raws Vaj Ntsujplig coj. Thaum zeem paub tseebmeej hais tias lubneej hauv ntiajteb tsuas yog ibvuag, peb yuav tsis ntshaw lossis poob ntau sijhawm rau lub ntiajteb no. Tiamsis, peb yuav ib siab ua raws tus Tswv siabnyiam thiab nqis peev rau lub tebchaws nyob mus ibtxhis (I Yauhas 2:15-17).
Yam uas Timthawj Petus qhia txuas ntxiv rau cov ntseeg yog “cia li ua zoo kawg nkaus rau hauv lwm haiv neeg” (nqe 12 HMOWSV). Lo lus “ua” hais txog txhua tes haujlwm, kev xav, kev hais lus, kev ua neej ntawm ib tug neeg. Tshuav lo lus “zoo kawg nkaus” txhais hais tias zoo nkauj, raug siab, ntxim nyiam, rub tau lwm tus lub siab. Timthawj Petus ntshaw kom cov ntseeg muaj lubneej zoo, hais lus los sim, ntxim hlub thiab qhia tshwm qhov zoo ntawm tus neeg muaj tus Tswv nyob nrog nraim. Dhau tej ntawd, txawm yog “lwm haivneeg” yuav thuam hais tias cov ntseeg ua phem los lawv yeej yuav pom tej haujlwm zoo uas cov ntseeg ua thiab thaum txog hnub Tswv Yexus rov qab los, lawv yuav qhuas Vajtswv. Tswv Yexus kuj qhia cov ntseeg hais tias: “nej yuav tsum ci rau sawvdaws pom tej haujlwm zoo uas nej ua, lawv thiaj yuav qhuas nej Leej Txiv tus uas nyob saum ntuj ceebtsheej” (Mathais 5:16).
Lo lus ntuas “ua zoo kawg nkaus” tseemceeb heev rau cov ntseeg nyob tiam xubthawj, vim lawv tabtom raug lwm haivneeg uas tsis paub Vajtswv thuam, iab liam los ntawm tej lus ua timkhawv tsis tseeb txog lawv txojkev ntseeg. Tus Tswv cov menyuam tsis tawmtsam tiamsis pheej ua lubneej zoo kawg nkaus. Los ntawm lubneej ncajncees, mos muag yuav rub tau cov neeg uas tabtom tawmtsam lawv lub siab. Lo lus ua timkhawv uas ciaj sia thiab muaj zog tshajplaws ntawm tus ntseeg Yexus yaum tau lwm tus paub tus Tswv yog kev ua lubneej zoo txhua hnub. Thiab thaum ua lubneej zoo, ncajncees kuj ua rau yeebncuab qhuas Vajtswv. Thov tus Tswv pab peb niaj hnub ci tus Tswv qhov kaj rau sawvdaws kom thaum lawv pom peb lubneej uas zoo kawg nkaus, lawv yuav qhuas peb Leej Txiv uas nyob saum Ntuj Ceebtsheej. Ntawd yog yam cuabyeej ua rog muaj zog tshajplaws pab peb tiv dhau kev sim siab thaum ua neej ntseeg nrog neeg ntiajteb.
Thov Vajtswv,
Tus Tswv, thov pab nyuam yaus niaj hnub ua lubneej zoo kawg nkaus, ncaj ncees thiab txo hwjchim tabmeeg lwm tus kom xwv lawv paub Koj thiab qhuas Koj. Nyuam yaus tuav Yexus Khetos lub npe thov, Amees.
Peb puas hais khov kho hais tias peb tabtom “ua zoo kawg nkaus” txhua hnub kom lwm tus pom tus Tswv dhau ntawm peb kev ua neej lawm tau?
Nyeem Vajluskub hauv peb lub xyoos: II Kevcai 14
Kênh Youtube BHKTHN:
