Mathiơ 10:1-7
Trong tơm: “Iĕm năm bơtho lu sư khan: ‘Năr âu trŏ năr ‘Bok Kei-Dei wă pơgơ̆r iĕm boih.”(Mathiơ 10:7)
Nơ̆r jet tơchĕng pơwao:
– Kră Yang Yêsu ăn kơ lu bơngai pơhrăm păng Sư tơdrong kiơ păng wơh lu sư năm tơ yơ?
– Kră Yang pơkă khan kơ lu sư athei bơtho tơdrong kiơ?
– Lu bơ̆n Kră Yang krao bơ̆n pơm tơdrong kiơ ăn kơ Sư?
Đơ̆ng rŏng kơ Kră Yang Yêsu krao lu bơngai pơhrăm păng Sư “athei năm lăng” (Yôhan 1:39) păng “athei kiơ̆ Inh” (Markôs 1:17;2:14), na jơ ‘nâu Kră Yang wă kơ lu sư đei năm ră roi tơdrong kăl ăn kơ đĭ đăng rim bơngai. Kră Yang đei ‘măn jơ kơ lu sư bơtho tơ’bôh kơ lu sư pơhrăm rok. Na truh kơ jơ ‘nâu, lu sư kăl kơ năm ră roi Tơdrong ‘Nao ‘Lơ̆ng. Lăm Sơ̆p hla bơar mă bơ̆n đei đŏk ‘nâu, Kră Yang ăn kơ lu Sư đei tơdrong mơsêh ăn kơ lu sư năm ră roi, puh yang kơnê̆ păng pơklaih tơdrong jĭ jăn (trong 1).
Jơ’nâu, Kră Yang Yêsu đei 12 ‘nu jơ̆ng ‘bang. Lu sư đei pha ra kơ tơdrong jang păng đei hŏk pơhrăm hlôh băt kŭm pha ra (trong 2-4) mă lei lu sư đei minh tơdrong lei lăi noh jơ̆ lu sư đei kơ tơ̆ng nơ̆r Kră Yang krao păng yak kiơ̆ Kră Yang. Lu sư đei oei hơdai hăm Kră Yang, yak năm hăm Kră Yang kŭm đei Kră Yang bơtho tơ’bôh lăm pêng sơnăm Kră Yang oei lăm teh đak âu. Jơ’nâu trŏ kơ jơ ‘năr Kră Yang wơh lu sư jang dôm tơdrong mă đêl Kră Yang bơtho lu sư đei pơhrăm. Hơdrol hloh, Kră Yang wă kơ lu sư chă “lu triu jrok kơ trong lăm lu bơngai Israel” păng bơtho minh tơdrong kăl dêh noh jơ̆ “Dêh char ‘Bok Kei-Dei wă jê̆ truh bơih” (trong 5-7).
“Athei tơbral yua kơ Dêh char ‘Bok Kei-Dei wă jê̆ truh bơih” noh jơ̆ nơ̆r bơtho đơ̆ng ‘Bok Yôhan pơm batem đei bơtho bơih (Mathiơ 3:2). Đơ̆ng rŏng kơ noh gơ̆p tah sư lăm hnam bơnă păng pơlôch sư, Kră Yang Yêsu pơtơm tơdrong jang păng roi tơbăt tơdrong mă gĭt kăl âu, Kră Yang bơtho tŏ sĕt đei 7 wơ̆t gah “Dêh char ‘Bok Kei-Dei wă jê̆ truh bơih” hăm đei “truh bơih tơ lu sư” (Mathiơ 4:17, 10:7; Markôs 1:15; 12:34; Luka 10:9,11;21:31). Thoi noh tơdrong bơtho ‘nâu jing minh tơdrong kăl dêh păng jah tĕnh hrĕnh ră roi mă Kră Yang đei kơnhăm tơdrong ră roi. Kră Yang kŭm wă kơ lu bơngai pơhrăm păng Sư hăm lu bơ̆n dang pơtrơp ră roi tơdrong bơtho gĭt kăl ‘nâu ăn kơ lu bơngai hiong răm.
Lăm dôm tơdrong đei truh lăm teh đak dang ei, lu bơ̆n đei ƀôh tơdra hơđăl dêh kơ năr wă jê̆ tôch tơpă bơih. Năr Kră Yang Yêsu jur ưh pă đunh bơih păng Dêh Char ‘Bok Kei-Dei wă jê̆ truh bơih. Lu bơ̆n jơ̆ bơngai pơhrăm păng Kră Yang Yêsu, lu bơ̆n kăl kơ yua iŏk hloi dôm jơ năr wă krao rim bơngai tơbral tơdrong yoch yua kơ Dêh Char ‘Bok Kei-Dei wă jê̆ truh bơih. Mă lei tơpă, kơnh đei lơ tơdrong hơnat kơ plah bơ̆n wă jang tơdrong ră roi âu, yua kơ đei lơ bơngai gô “chĭt đon ưh kơ wă mơ̆ng tơdrong trŏ tơpă, mă lei lu sư ‘maih mơ̆ng tơdrong kư̆ kă” (II Timôthê 4:4). Wă kơ yak hlôi đơ̆ng tơdrong pơlong păng đei jơhngơ̆m pran ră roi Tơdrong ‘Nao ‘Lơ̆ng, hơdrol hloh lu bơ̆n kăl kơ băt mơn dêh char ‘Bok Kei-Dei wă jê̆ truh tơpă mơ̆i. Păng athei pơih măt gah bơhngol wă kơ ‘bôh lơ bơngai hiong răm lu sư oei wă năm lăm tơdrong lôch ling lang lăm jum dăr bơngai jê̆ bơ̆n. Ding mă lu bơ̆n ƀôh păng băt mơn tơdrong kăl kơ jah năm ră roi kiơ̆ thoi nơ̆r bơtho âu lei na bơ̆n gô đĭ jơhngơ̆m năm ră roi Tơdrong ‘Nao ‘Lơ̆ng.
Lu bơ̆n hăm đei băt kơ tơdrong kăl jah gah tơdrong Dêh char ‘Bok Kei-Dei wă jê̆ truh bơih ưh? Lu bơ̆n hăm pơnam ră roi tơdrong ‘nâu hăm trong kiơ?
Ơ Kră Yang, apinh tơgŭm Ih tơgŭm inh đei jơhngơ̆m ‘mêm mơnat nhen thoi Ih ‘mêm mơnat kơ lu bơngai hiong răm wă kơ inh kĕ yak hlôi đơ̆ng dôm tơdrong pơlong lăng na ră roi tơdrong Dêh Char Pơtao Ih wă jê̆ truh bơih! Yua anăn Kră Yang Yêsu Krist, A-men.
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 10
Kênh Youtube BHKTHN:
