Titus 1:15-16
Nqe cim:
“Cov neeg uas muaj lub siab dawb siab zoo, lawv saib yam twg los puavleej yog yam uas zoo; tiamsis cov neeg siab phem thiab tsis cia siab rau Vajtswv, tej uas lawv saib tsis muaj ib yam uas lawv yuav hais tias yog yam uas zoo…” (Titus 1:15a)
Lus nug rau sawvdaws xav:
– Yuav ua li cas kom muaj lub neej dawbhuv?
– Muab dabtsi los ntaus nqi yam twg qias lossis huv?
– Peb ua dabtsi kom muaj lub neej dawbhuv hauv lub siab, txojkev xav tuaj?
Timthawj Paulus tabtom hais txog kev dawbhuv thiab kev phem. Lo lus “siab phem lossis qias” yog hais txog cov neeg piam sij, ua phem ua qias, tsis ntseeg. Yam uas Paulus niaj hnub qhia kom tus ntseeg lub neej dawbhuv yog ntseeg Tswv Yexus txojkev tuag txhiv, tsis yog vamkhom qhov uas caiv tsis noj tej khoom Vajtswv tsim. Cov xibhwb cuav, lawv tsuas siv lub npe hu ua tus ntseeg Yexus, hauv lub siab twb tsis ntseeg tus Tswv, txawm yog yuav caiv kev noj, txuag tus kheej zoo los kuj ua tsis tau kom lawv dawbhuv tabmeeg Vajtswv. Rau qhov lawv twb piam sij hauv txojkev xav thiab lub siab lawm (nqe 15).
Qhov uas ntaus nqi ib yam dabtsi tias qias lossis dawbhuv nws nyob ntawm tus neeg uas ntaus nqi ntawd kev ua neej. Rau qhov thaum chivthawj “Ib puas tsav yam uas Vajtswv tsim cia rau neeg noj puavleej zoo huv tibsi, tsis tas peb yuav caiv ib yam dabtsi li. Peb yeej noj tau txhua yam huv tibsi, tiamsis thaum peb yuav noj peb yuav tsum xub ua Vajtswv tsaug tso man li noj.” (I Timautes 4:4). Kev txhaum los rau hauv ntiajteb, tiamsis Tswv Yexus twb them tus nqi kev txhaum saum tus ntoo khaublig lawm. Cia kom ntaus nqi tau ib tug neeg hais tias dawbhuv lossis qias, peb tsis yog saib sab nraud, rau qhov “neeg saib lub cev ntaj ntsug, tiamsis Kuv saib neeg lub siab.” (I Xamuyees 16:7). Cov neeg uas sab hauv tsis dawbhuv, muaj lub siab phem… ua txuj ua zoo li tus neeg zoo, dawbhuv, xwbtim lees hais tias lawv paub Vajtswv, tham tus Tswv Txojlus zoo heev, ua tus neeg txwv tej kev ua tsis zoo, paub qhov dawbhuv thiab qhov qias huvsi, tiamsis vim lub siab thiab txojkev xav phem yog li nyob ntawm tus Tswv xubntiag lawv yog neeg ntsejmuag ncaj siab nkhaus. “Lawv hais tias lawv yog cov uas paub Vajtswv, tiamsis lawv tsis ua lawv lub neej zoo li cov uas paub Vajtswv ua, lawv yog neeg siab phem thiab tsis mloog leejtwg lus. Koj tsis txhob muab ib txog haujlwm tseebceeb tso rau cov neeg ntawd ua hlo li, rau qhov lawv yeej ua tsis tau.” (nqe 16).
Yog li ntawd, cia kom ua tau lub neej dawbhuv raws li Vajtswv tus lw, txhua tus yuav tsum paub thiab qhib siab ntseeg Yexus tiag tiag, Nws cov ntshav thiaj ntxuav tau peb tej kev txhaum huvsi mus. Cia li ua neeg muaj lub qhov muag thiab txojkev xav zoo rau txhua yam ntawm kev dawbhuv thiab lub siab ua tus Tswv tsaug. Cov ntseeg Yexus tsis txhob lam muab txojkev ywjpheej siv mus ua raws siab xav, tiamsis “peb yuav tsum ua peb lub neej kom tsimnyog qhov uas peb yog neeg nruab hnub, tsis txhob qw ua nqaj ua nqug thiab haus cawv qaug, tsis txhob ua nkauj ua nraug thiab ua neeg tsis paub cai, tsis txhob sib cav sib ceg thiab sib khib.” (Loos 13:13). Yog ntsib tej kev tsis zoo “yuav tsum zam kom dhau txhua yam kev phem huv tibsi.” (I Thexalaunikes 5:22).
Thov Vajtswv,
Vajtswv tus uas dawbhuv, thov Koj qhia kom nyuam yaus zeem paub thiab ntseeg Koj tas siab. Paub txais yuav thiab paub ua Koj tsaug. Thov Vaj Ntsujplig ntxiv zog kom nyuam yaus tuav tau kev ntseeg ruaj thiab ua tau lub neej dawbhuv, haum Vajtswv siab. Nyuam yaus tuav Tswv Tswv lub npe thov, Amees.
Peb txiav txim siab ua neej zoo li cas kom dawbhuv mus txog hnub peb ntsib tus Tswv?
Nyeem Vajluskub hauv peb lub xyoo: I Xamuyees 28
Kênh Youtube BHKTHN:
