Klei Aê Diê Blŭ: Rôm 2:17-24
Êlan kliăng: “Kyuadah tui si klei čih leh, “Kyua diih yơh phung tue blŭ dlao wač kơ anăn Aê Diê” (Rôm 2:24)
Klei êmuh ksiêm mĭn: Phung Yuđa bi mni kơ diñu pô kơ ya klei? Ya klei bi klăk plah wah klei diñu thâo săng hŏng bruă diñu ngă? Ya boh jhat mâo? Ya anôk msĕ phung Yuđa ênuk đưm hŏng phung đăo kơ Krist ênuk anei?
Phung Yuđa bi mni kơ diñu pô kyua diñu jing phung ƀuôn sang Aê Diê ruah, mâo klei bhiăn Aê Diê. Diñu hưn ktưn hŏng phung găp djuê mkăn kơ Aê Diê Pô Myang diñu. Kyua mâo klei bhiăn snăn diñu thâo săng klei Aê Diê čiăng leh anăn thâo kral klei soh, klei djŏ. Klei anăn jing djŏ leh, leh anăn Aê Diê čiăng kơ diñu jing phung atăt gai phung bum ală, jing klei mngač kơ phung dôk hlăm klei mmăt, pô bi hriăm phung mluk, pô mtô kơ phung hđeh. Ƀiădah lĕ, klei bhiăn Aê Diê brei amâo djŏ pioh mjing drao mgang amâodah pioh hưn ktưn kơ pô ôh, ƀiădah pioh bi hriăm diñu hdĭp klei hdĭp pioh brei mdê doh jăk kơ Aê Diê.
Khua ƀĭng kna Y‑Pôl mñă kơ phung Yuđa mâo mă knŏng anăn msĕ snei, êlâo hĭn mtô klei bhiăn kơ diñu pô leh anăn kơh mtô kơ arăng. Klei bhiăn Aê Diê brei jing leh mnơ̆ng hưn bi sĭt kčŭt kơ bruă sĭt diñu ngă leh. Y‑Pôl bi êdah hŏng klei klă klei hưn bi sĭt kơ klei bi klăk plah wah klei diñu thâo hŏng klei diñu ngă, yap dŭm klei soh diñu ngă leh msĕ si tlĕ, tlĕ piu, tlĕ mă mnơ̆ng arăng yua pioh kkuh mpŭ kơ rup yang, tlĕ mă mnơ̆ng myơr kơ Sang kkuh mpŭ, mjhua klei đăo čiăng duah klei tŭ dưn kơ diñu pô, ƀơ̆ng mnơ̆ng jing dŏ pô mkăn, tơl diñu mŭt hlăm sang yang phung tue tlĕ mă rup krah mâo ênoh pioh čhĭ. Phung anei “ngă klei mpŭ knŏng ti êngao ƀiădah hngah klei myang mơ̆ng klei kkuh mpŭ anăn” (II Y‑Timôthê 3:5). Khua ƀĭng kna Y‑Pôl bi ruĕ snei, mnuih thâo klei bhiăn ƀiădah gao klei bhiăn jing dôk bi hêñ Aê Diê. Kyua bruă diñu ngă anăn yơh phung tue dlao wač kơ anăn Aê Diê (êlan 23-24). Hdĭp hŏng klei ai ngăm jing ngă soh hŏng Aê Diê yơh.
Phung đăo kơ Krist hruê anei pia jing phung Yuđa hlăm mngăt. Drei mâo klei bhiăn Aê Diê jing hdruôm hră Klei Aê Diê Blŭ, mâo Yang Mngăt Jăk dôk hlăm ai tiê atăt gai leh anăn brei klei ktang čiăng ngă tui si klei Aê Diê čiăng. Arăng bi hmô drei jing hra kơ lăn, klei mngač kơ lăn ala, dĭng ktang kơ Ƀuôn Ala Mtao Adiê, mâo bruă klam jing phung hưn anăn Khua Yang kơ phung ka đăo ôh. Brei jih jang phung đăo kơ Khua Yang ngă tui si klei bi hriăm mơ̆ng Klei Aê Diê Blŭ amâo djŏ knŏng thâo ôh! Brei grăp čô drei êmuh mă kơ drei pô hŏng klei êmuh amâo êbeh ôh snei: Sĭt mơ̆ kâo mâo leh klei bi mtlaih? Kâo gưt asăp kơ Khua Yang leh mơ̆? Hmư̆ bĕ klei Khua Yang Yêsu lač: “Amâo djŏ ôh grăp čô hlei pô lač kơ Kâo, ‘Ơ Khua Yang, Ơ Khua Yang’ srăng mŭt hlăm ƀuôn ala mtao adiê, ƀiădah knŏng hlei pô ngă tui si Ama Kâo hlăm adiê čiăng’” (Y‑Mathiơ 7:21).
Klei hdĭp drei dôk atăt phung ka đăo hriê kơ Khua Yang hĕ amâodah dôk bi hêñ kơ anăn Khua Yang, jing boh tâo gang hĕ êlan hlei pô čiăng hriê kơ Ñu?
Wah lač: Ơ Khua Yang, lač jăk kơ Ih brei kơ kâo mâo Klei Ih Blŭ. Đru kâo thâo huĭ mpŭ kơ Ih, khăp leh anăn čiăng ngă tui si klei Ih čiăng jăk čiăng kơ kâo bi guh kơang kơ anăn Ih leh anăn atăt ba lu mnuih ka đăo ôh hriê kơ Ih. Kâo wah lač hlăm anăn Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Êdah 2:8-3:6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
