Klei Aê Diê Blŭ: Y‑Mathiơ 18:10-14
Êlan kliăng: “Răng bĕ, đăm bi êmut ôh kơ sa čô hlăm phung hđeh điêt anei; kyuadah kâo hưn kơ diih, hlăm adiê phung dĭng buăl jăk diñu dlăng nanao kơ ƀô̆ mta Ama kâo, Pô dôk hlăm adiê.” (Y‑Mathiơ 18:10)
Klei êmuh ksiêm mĭn: Khua Yang Yêsu yua rup “phung hđeh điêt” čiăng bi hmô kơ hlei pô? Si knuih Khua Yang čiăng kơ drei mâo hŏng “phung hđeh điêt” anei? Ya ngă? Si drei khăng bi êdah knuih mưč kơ phung mrâo đăo kơ Khua Yang?
Khua Yang Yêsu yua rup “hđeh điêt” čiăng lač kơ knuih jăk, mngač mơ̆ng phung hđeh leh anăn ăt lač kơ phung mrâo đăo kơ Khua Yang. Khua Yang čiăng kơ phung đăo jing phung tui hlue leh Khua Yang sui leh đăm ôh knuih “bi êmut” hŏng phung mrâo đăo kơ Khua Yang jing phung mâo klei hdĭp mngăt dôk mrâo.
Boh blŭ “bi êmut” mblang jing dlăng hơăi mang amâodah amâo bi mni ôh. Khua Yang amâo čiăng ôh hlăm phung khua ƀĭng kna Ñu mâo ai tiê mđĭ kơ pô leh anăn bi êmut kơ pô mkăn. Khua Yang amâo čiăng ôh hlei pô hlăm phung khua ƀĭng kna dlăng pô yuôm bhăn hĭn leh anăn bi mĭn phung mkăn snăn hơăi mang leh anăn knŏng pô yơh jing tŭ dưn. Khua Yang čiăng kơ phung ƀĭng kna thâo wăt tơdah phung mrâo đăo kơ Khua Yang amâodah phung đăo kơ Khua Yang sui leh mâo klei mđing uêñ leh anăn klei khăp mơ̆ng Aê Diê msĕ sơăi. Ñu mñă kơ digơ̆ hdơr hlăm wang diñu đăm bi tăng ôh “hlei pô jing prŏng hĭn hlăm Ƀuôn ala mtao” čiăng kơ diñu đăm bi tăng mgăl, bi mkă ksiêm dlăng leh anăn bi dlăng hơăi mang hdơ̆ng pô. Khua ƀĭng kna Khua Yang brei tui hlue Khua Yang, thâo khăp, mđing kriê dlăng, đru mđĭ ai hdơ̆ng pô kyua Khua Yang amâo čiăng ôh hlei pô rai luč hĕ.
Hruê anei, phung ƀuôn sang Aê Diê hlăm Sang Aê Diê bi êdah knuih “bi êmut” hŏng ayŏng amai adei mrâo đăo kơ Khua Yang hŏng lu hdră. Tal sa, drei hdĭp ti krah Sang Aê Diê, êpul ƀiădah amâo mđing uêñ ôh kơ phung ayŏng amai adei mrâo đăo kơ Khua Yang, amâo čiăng bi tuôm ăt msĕ mơh đru mđĭ ai klei đăo kơ phung anei ôh. Tal dua, drei hdĭp êngiê đei leh anăn ngă bi têč hnêč kơ phung ayŏng amai adei mrâo đăo hlăm klei blŭ leh anăn bruă ngă. Tal tlâo, drei dlăng hơăi mang kơ klei đăo mrâo digơ̆. Tal pă, drei mâo klei mĭn bi kah kơ klei soh leh êgao mơ̆ng ayŏng amai adei mrâo, mâo klei blŭ mưč mač ngă kơ digơ̆ hêñ kơ klei soh leh anăn đuĕ mơ̆ng êpul phung đăo. Tal êma, drei mjhua klei mrâo ayŏng adei pô čiăng duah klei tŭ dưn kơ pô, ngă bi kah mbha êpul… Brei hdơr Khua Yang thâo klei đăo leh anăn ai tiê mrâo hlăm phung ayŏng amai adei anei, Ñu čiăng răng mgang digơ̆, đru digơ̆ hriê kơ prŏng. Khua Yang ăt jao kơ drei bruă klam mđĭ ai klei đăo hdơ̆ng pô. Khua Yang čiăng kơ drei bi khăp, bi pap klei mrâo hlăm klei đăo digơ̆, đru digơ̆ hriê kơ prŏng čiăng hlăm hruê knhal tuč jih jang drei hrăm mbĭt bi tuôm hlăm war biăp hlăm adiê hŏng Khua Yang bŏ hŏng klei khăp.
Drei dôk dlăng hơăi mang kơ hlei pô hlăm Sang Aê Diê, êpul mơ̆?
Wah lač: Ơ Khua Yang, akâo kơ Ih đru kâo khăp, mđing dlăng đru kơ ayŏng amai adei hlăm klei đăo, đăm brei kâo bi êmut ôh ƀiădah mpŭ leh anăn pap kơ digơ̆, hrăm mbĭt mđĭ ai klei đăo leh anăn bi đru hlăm klei thâo kral Khua Yang êlam hĭn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôsuê 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
