Mathais 18:10-14
Nqe cim:
“Nej yuav tsum ceevfaj, tsis txhob saib tsis taus cov menyuam no ib tug: Kuv qhia rau nej hais tias, cov timtswv ceebtsheej uas nyob ntawm kuv Txiv tus uas nyob saum ntuj Ceebtsheej lub xubntiag niaj hnub tsomkwm cov menyuam no.” (Mathais 18:10)
Lus nug rau sawvdaws xav:
– Tswv Yexus siv tus duab “menyuam” los piv txog leejtwg?
– Tus Tswv xav kom peb muaj tus cwjpwm twg rau cov “menyuam” no? Vim li cas?
– Peb pheej muaj tus cwjpwm thuam cov neeg nyuam qhuav ntseeg zoo li cas?
Tswv Yexus siv tus duab “menyuam” los hais txog lub siab mos muag, dawbhuv ntawm menyuam yaus thiab kuj hais txog cov neeg nyuam qhuav los ntseeg tus Tswv. Nws xav kom cov thwjtim uas nrog Nws mus ntev lawm tsis txhob muaj tus cwjpwm “saib tsis taus” cov uas nyuam qhuav los ntseeg hais tias lawv kev ntseeg tseem yau.
Lo lus “saib tsis taus” muaj lub ntsiab hais tias saib tsis muaj nqis, thuam lossis saib tsis rau nqi. Tus Tswv tsis xav kom hauv Nws cov thwjtim muaj cov uas saib lawv tsimtxiaj dua lwm tus. Tus Tswv tsis xav kom hauv Nws cov thwjtim saib lawv muaj nqis dua es xav hais tias lwm tus tsis muaj nqis, siv tsis tau. Tus Tswv xav kom cov thwjtim paub tias txawm yog cov neeg uas nyuam qhuav los ntseeg Vajtswv thiab cov neeg uas twb ntseeg ntev lawm puavleej tau txais kev hmov tshua thiab Vajtswv kev ua zoo ib yam nkaus. Nws hais rau lawv tias kom tsis txhob muaj kev sib cav txog “leejtwg yog tus uas loj nyob saum ntuj ceebtsheej” kom lawv tsis sib txeeb, sib piv thiab ib leeg saib tsis taus ib leeg. Tus Tswv cov thwjtim yuav tsum xyaum Nws, sib hlub, hmov tshua, ib leeg pab ib leeg rau qhov Nws tsis xav cia ib tug twg puastsuaj.
Nimno, Vajtswv cov menyuam hauv Pawg Ntseeg kuj muaj cov uas “saib tsis taus” cov uas nyuam qhuav los ntseeg ntau seem. Thib ib, peb nyob hauv Pawg Ntseeg, pab pawg tiamsis tsis hmov tshua txog cov kwvtij uas nyuam qhuav los ntseeg li, tsis xav nrog lawv sib tham, tsis xav pab lawv txhim kho lawv txojkev ntseeg. Thib ob, peb ua neej ywjsiab tas zog thiab ua rau cov nyuam qhuav los ntseeg poob kev ntseeg los ntawm tej lus hais thiab haujlwm ua. Thib peb, peb saib lawv zoo li cov tsis muaj kev ntseeg. Thib plaub, peb muaj qhov kev cais vim tej kev txhaum lawv ua tas los, muaj tej lus thuam ua rau lawv txajmuag khiav deb cov ntseeg. Thib tsib, peb ntxab ntxawm siv qhov uas lawv nyuam qhuav los ntseeg tshiab ua kom zoo rau yus tus kheej, ua rau muaj kev sib faib ua pab ua pawg… Cia li nco ntsoov hais tias Vajtswv paub lawv txojkev ntseeg thiab lub siab lawm, Nws xav tsomkwm lawv, pab kom lawv loj hlob. Tus Tswv kuj muab feem xyuam rau peb ua txhawb lawv zog. Tus Tswv xav kom peb sib hlub, ua siab ntev pab lawv txojkev ntseeg loj hlob, txog hnub kawg peb sawvdaws thiaj tau mus nyob ntawm Vajtswv.
Thov Vajtswv,
Tus Tswv, thov Koj pab nyuam yaus kom muaj kev hlub, hmov tshua pab cov kwvtij ntseeg, tsis thuam lawv, muaj kev saib taus thiab ua siab ntev, sib pab txhim tsa kev ntseeg kom loj hlob rau txojkev paub tus Tswv. Nyuam yaus tuav Tswv Yexus lub npe thov, Amees.
Peb puas tabtom saib tsis taus cov kwvtij twg nyob hauv Pawg Ntseeg, pab pawg?
Nyeem Vajluskub hauv peb lub xyoo: Yausuas 10
Kênh Youtube BHKTHN:
