Chivkeeb 3:1-5
Nqe cim:
“Nej yuav tsum ceevfaj zov zoo tsis txhob nkees, rau qhov dab Ntxwgnyoog tus uas yog nej tus yeebncuab, nws mus mus los los ib yam li tus tsov ntxhuav uas quaj nrhiav tom tsiaj noj” (1 Petus 5:8)
Lus nug rau sawvdaws xav:
– Txoj kev dag ntxias los rau tibneeg li cas?
– Dab Ntxwjnyoog siv tej kev dag ntxias twg los dag ntxias tibneeg?
– Yuav ua cas kom tiv thaiv tau dab Ntxwjnyoog kev dag ntxias?
Nyob hauv lub vaj Edees uas zoo nkauj kawg nkaus, nab los nrog tus pojniam sib tham. Tej zaum Evas xav hais tias ntawd yog tus tsiaj zoo ib yam li lwm tus tsiaj thiab xwb, tiamsis Vajtswv Txojlus qhia paub hauv Tshwmsim 12:9 hais tias, “…ntawd yog tus nab txwj nab laug thaum ub uas sawvdaws hu ua dab Ntxwgnyoog lossis hu ua Xatas tus uas dag ntxias neeg ntiajteb”. Tsis yog nab tiamsis yog dab Ntxwgnyoog los cuag Evas. Peb tsis paub xyov dab Ntxwgnyoog txia ua ib tug nab lossis nws tuaj tom qab siv tus nab, tiamsis tseeb meej dab Ntxwgnyoog yeej npaj muaj tswvyim phem, nrhiav kev los cuab dag ntxias tibneeg. Ntawd yog txoj kev dag ntxias uas peb pheej pom Ntxwgnyoog siv txhua tiam dhau los, nws tsis lam tshwm los ua tus niag ntsej muag phem uas txaus ntshai, tiamsis nws pheej siv tus duab ntawm “cov tim tswv”, ua rau tibneeg nyiam, txaus siab thiab maj mam poob rau nws txoj kev dag ntxias!
Dab Ntxwgnyoog txoj kev dag ntxias xubthawj yog nrog tibneeg sib tham txog Vajtswv Txojlus. “Vajtswv yeej txwv kom neb tsis txhob noj txhua yam txiv ntoo uas nyob hauv lub vaj no tiag los?” (nqe 1). Ntxwgnyoog nug ib lolus tsim kev ua xyem xyav rau tibneeg ntsigtxog Vajtswv Txojlus. “Tej lus ntawd tsis tseeb, neb yuav tsis tuag ib zaug li. Vajtswv hais li ntawd, rau qhov nws paub hais tias thaum twg neb noj tsob txiv ntoo ntawd, neb yuav paub qhov phem thiab qhov zoo” (nqe 4-5). Ntxwgnyoog hais ntxiv tsis raws li Vajtswv qhov kev zoo hauv Nws Txojlus. Dab ntxias tibneeg hais tias qhov uas Vajtswv tsis pub noj “tsob txiv ntoo txwv” yog vim ntshai tibneeg dhau los zoo li Nws loj ib yam li Nws, ntawd ua rau tibneeg lub siab khavtheeb tshwm tuaj. Ntxwgnyoog tsis quav ntsej nuj nqi ntawm txoj kev txhaum uas tibneeg yuav raug, tiamsis tabpov rau tibneeg hais tias “yuav tsis tuag ib zaug li”, ua rau tibneeg xav hais tias ua txhaum, tsis raws Vajtswv siab nyiam los yeej tsis ua cas.
Dab Ntxwgnyoog yeej tseem tabtom dag ntxias tibneeg niaj hnub nim no ib yam li ntawd. Nws mus mus los los nrhiav kev coj peb mus rau hauv kev txhaum (1 Petus 5:8). Yog li ntawd peb yuav tsum ceevfaj thiab txawj ntse zeem paub Ntxwgnyoog lub tswvyim. Cia li vamkhom Vajtswv thiab thov Nws pab, “Thov koj tsis txhob cia tej kev sim siab ntxias tau peb, tiamsis thov koj pab kom peb dim ntawm dab Ntxwgnyoog txhais tes” (Mathais 6:13). Thaum nyob ze Vajtswv, vamkhom Nws, peb yuav zeem pom hais tias yim hnub peb yim zoo li tus Tswv. Ntawd yog nqi zog ntawm txoj kev sib raug zoo nrog Vajtswv tsis yog los ntawm yus tus kheej siv zog ua tau. Thaum ntawd peb yuav zeem paub dab Ntxwgnyoog tej lus dag ntxias thiab khiav deb.
Thov Vajtswv,
Vajtswv, dab Ntxwgnyoog mus mus los los nrhiav kev coj nyuam yaus khiav deb Koj thiab tawm hauv Koj txoj npaj tseg uas zoo kawg nkaus. Thov pab nyuam yaus muaj kev txawj ntse zeem paub dab Ntxwgnyoog lub tswvyim phem, kom ntseeg ruaj thiab tso siab plhuav rau Koj ib leeg xwb. Thov pab kom nyuam yaus kovyeej txoj kev dag ntxias, kom Koj tau ntsejmuag. Nyuam yaus tuav Tswv Yexus Khetos lub npe thov, Amees.
Los ntawm qhov twg peb zeem paub dab Ntxwgnyoog tej kev dag ntxias?
Nyeem Vajluskub hauv peb lub xyoos: Ntawv Nkauj 69
Kênh Youtube BHKTHN:
