Yakaunpaus 5:19-20
Nqe cim:
“Nej nco ntsoov hais tias tus uas coj tau tus uas ua txhaum rov qab los cuag Vajtswv, ces kuj yog nws pab tau tus uas yuam kev ua txhaum ntawd tus ntsujplig dim txojkev tuag, thiab Vajtswv yuav zam tus uas ua txhaum ntawd tej kev txhaum huv tibsi. (Yakaunpaus 5:20)
Lus nug rau sawvdaws xav:
– Tus neeg “yuam kev” yog tus neeg zoo li cas?
– Peb yuav tsum ua dabtsi thaum paub ib tug tabtom ua yuam kev?
– Yuav ua li cas kom coj tau tus neeg yuam kev rov los?
Yakaunpaus xaus nws tsab ntawv tsis yog ib lo lus nug xov moo, thov Vajtswv lossis foom koob hmoov. Yakaunpaus cob lus rau cov ntseeg hais tias yuav tsum coj cov neeg uas yuam kev lawm tig rov qab los. Tus neeg yuam kev uas Yakaunpaus hais txog no yog cov neeg uas nyob hauv“nej cov” tiamsis tabtom “yuam kev tsis ua raws li Vajtswv Txojlus tseeb”, thiab yog cov neeg “ua txhaum”. Lawv yog cov neeg uas twb ibtxwm nyob hauv Pawg Ntseeg tiamsis nimno tawm hauv npoj neeg ntseeg Vajtswv thiab ua tsis raws li kev ntseeg mus. Lawv tabtom ua neej nrog txojkev txhaum thiab mus yuam kev hauv lub ntiajteb, tsis muaj homphiaj ua neej. Yog tsis muaj kev pab, cov ntsujplig no yuav raug coj mus rau txojkev tuag (nqe 20). Thaum pom cov neeg yuam kev li ntawd, peb tau nqua hu kom mus coj lawv tig rov qab los.
Qhov uas coj tus neeg yuam kev rov los muaj nqis heev. Tim ib, pab cawm nws “tus ntsujplig dim txojkev tuag”. Tim ob, pab “roos tau tej kev txhaum uas ntau kawg.”(HMOWSV), txhais tau hais tias Vajtswv tsis suav nws tej kev txhaum lawm. Lawv dim lub txim tuag thiab tus ntsujplig rov los cuag tau Vajtswv.
Yog tus ntseeg Vajtswv, peb nyob hauv cov neeg ntseeg, tsis yog tus kheej yuav tsum ua neej raws li Vajtswv Txojlus qhia xwb, peb ib leeg yuav tsum saib xyuas ib leeg, ib leeg pab ib leeg nyob hauv kev ua neej. Ntsia rau cov Pawg Ntseeg tamsim no, peb pom muaj cov neeg yuam kev, tso qhov tseeb tseg tsis yog tsawg tus. Muaj qee tus ua ntej ntawd yog cov uas nquag ua Vajtswv haujlwm nyob hauv Pawg Ntseeg, ua tus thawj coj pab pawg, tiamsis nimno mus ua yuam kev lawm. Vajtswv Txojlus qhia kom peb yuav tsum muaj feem xyuam ib leeg coj ib leeg rov los.
Yuav ua li cas kom coj tau tus neeg yuam kev rov los? Muaj qee zaus ibtxhia ntsib ib yam xwmtxheej twg ua rau yus xwbtim zeem paub thiab tig rov los. Tiamsis feem coob mas yuav tsum muaj neeg hlub thiab ua siab ntev coj thiaj tsis tso tseg. Pawg Ntseeg thiab txhua tus ntseeg yuav tau thov Vajtswv tiag rau cov neeg yuam kev, siv sijhawm mus ncig saib, tsob hwb, ua phoojywg nrog, nrhiav tswvyim ntuas… yog qhov uas yuav pab tau cov neeg yuam kev tig rov qab los. Tej zaum peb yuav pom tias qhov uas coj cov neeg yuam kev rov los yog tes haujlwm nyuaj heev tiamsis tsis txhob poob siab, tus Tswv muaj hwjchim yuav tshem lub siab tawv li pobzeb mus thiab pub lub siab mloog lus rau lawv (Exekees 36:26).
Thov Vajtswv,
Tus Tswv, Koj yog tus muaj kev hlub, Koj yeej tsis cia ib tug twg tuag mus ibtxhis hauv ntuj tawg li. Nyuam yaus thov Koj coj cov neeg yuam kev, txav deb Vajtswv, tso kev ntseeg tseg rov los kom lawv tau kev cawm dim. Thov Koj siv nyuam yaus mus ua tes haujlwm pab coj cov neeg ntawd rov los cuag Koj. Nyuam yaus tuav Yexus Khetos lub npe thov, Amees.
Hnub no, leejtwg yog tus neeg uas Vajtswv kom peb thov Vajtswv pab thiab coj lawv tig rov qab los cuag Nws?
Nyeem Vajluskub hauv peb lub xyoo: II Xwmtxheej Vajntxwv 23
Kênh Youtube BHKTHN:
