Klei Aê Diê Blŭ: Y-Mathiơ 20:8-16
Êlan kliăng: “Snăn kyuadah diih jing phung Aê Diê ruah leh, jing phung doh jăk leh anăn phung Aê Diê khăp, hơô bĕ klei thâo pap, ai tiê jăk, klei luă gŭ, klei êdu êun, leh anăn klei gĭr.” (Kôlôs 3:12)
Klei êmuh ksiêm mĭn: Si pô đang boh kriăk ƀâo tla prăk mưn leh kơ phung mă bruă leh anăn ya ngă lŏ mâo pô blŭ dŭñ dŭñ hŏng khua? Si pô đang boh kriăk ƀâo wĭt lač kơ phung blŭ dŭñ dŭñ anei? Si ai tiê klei mĭn Khua Yang čiăng drei mă bruă kơ Ñu?
Leh sa hruê mă bruă, pô đang boh kriê ƀâo iêô phung mă bruă čiăng tla prăk mưn kơ diñu. Tơdah phung ñu yua dơ̆ng mă bruă hlăk êma mmông tlam leh anăn phung mă bruă hlăk năm mmông aguah grăp čô digơ̆ mă tŭ klei mưn sa đơniê sơăi, phung mă bruă mơ̆ng aguah ưm blŭ dŭñ dŭñ kyua lač khua amâo mtăp mđơr hŏng pô. Khădah snăn, diñu wơr hĕ khua tla leh hlue si klei kuôl kă tal êlâo (êlan 2), amâo mâo ktư̆ juă amâodah yua êgao hnơ̆ng ai tiê mă bruă digơ̆ ôh, khua tla leh mtăp mđơr djŏ si klei bhiăn kpă ênô. Bi phung nao mă bruă hlăk êma mmông tlam ăt mâo mă sa đơniê jing kyua ai tiê khua pap brei. Tơdah ñu knŏng mâo mă sa kdrêč pluh dua đơniê snăn srăng amâo djăp rông gŏ sang ôh. Khua brei thâo amâo djŏ ñu alah ôh ƀiădah amâo mâo pô mưn ôh kyuanăn jih sa hruê ñu amâo mâo bruă mă ôh.
Anei kluôm dhuôm jing klei pap mơ̆ng khua. Ñu mâo klei dưi pap brei leh anăn mâo klei dưi brei, ñu čiăng kơ phung mă bruă dŭm mmông tal êlâo năng ai brei thâo săng leh anăn ăt mâo ai tiê thâo pap kơ ayŏng adei pô; ƀiădah lĕ, ai tiê čuôt klih keh nač leh anăn klei phĭ ngă kơ diñu blŭ dŭñ dŭñ kyua amâo thâo kral ôh klei khua pap leh anăn ăt kăn mâo mơh ai tiê pap kơ pô mkăn.
Hlăm Sang Aê Diê hruê anei, ăt ƀuh klei bi keh nač hlăm klei mă bruă kơ Khua Yang. Drei srăng bi mĭn ya ngă pô mă bruă kơ Khua Yang sui hĭn ƀiădah Ñu amâo brei klei pap msĕ si phung mrâo mŭt mă bruă? Drei amâo mơak ôh tơdah mă bruă kơ Khua Yang, ƀiădah mâo ai tiê phĭ hŏng Khua Yang leh anăn bi msĕ, bi lông hŏng phung ayŏng adei mă bruă kơ Khua Yang mbĭt hŏng pô. Drei mâo klei bi keh nač tơdah ƀuh pô mkăn dưi mă ya bruă pô amâo dưi ngă ôh anăn mâo ai tiê phĭ hlăm ai tiê, blŭ dŭñ dŭñ hŏng Khua Yang leh anăn hdơ̆ng pô. Khua Yang čiăng drei mă bruă kơ Ñu hŏng ai tiê hdơr knga kyua “Diih amâo tuôm ruah kâo ôh, ƀiădah kâo ruah leh diih leh anăn pioh brei diih…” (Y-Yôhan 15:16), dưi dôk hlăm Sang Aê Diê, dưi mă bruă kơ Ih jing sa klei pap prŏng prĭn Aê Diê brei kơ drei. Tơdah mă bruă sui thŭn hlăm Sang Aê Diê drei ƀrư̆ thâo săng ai tiê Khua Yang hĭn, Ñu čiăng drei ăt bi êdah ai tiê thâo pap hdơ̆ng pô “hơô bĕ klei thâo pap, ai tiê jăk, klei luă gŭ, klei êdu êun, leh anăn klei gĭr” (Kôlôs 3:12). Tơdah bi nač, drei ênưih hngah hĕ amâodah kdŭn tluôn hlăm klei mă bruă kơ Khua Yang, knhal tuč jing luč hĕ klei găl dưi mă bruă kơ Ñu, leh anăn ăt srăng amâo mâo ôh klei mưn Aê Diê brei kơ hlei pô mă bruă sĭt suôr truh knhal tuč.
Drei dôk hdĭp hŏng ai tiê thâo pap kyua drei mâo leh klei Aê Diê pap mơ̆?
Wah lač: Ơ Khua Yang, akâo kơ Ih đru kâo amâo blŭ dŭñ dŭñ, amâo bi nač ôh hŏng ayŏng amai adei hlăm klei mă bruă kơ Khua Yang, ƀiădah brei thâo pap, thâo khăp leh anăn bi đru čiăng hrăm mbĭt mă bruă kơ Aê Diê leh anăn mđĭ kyar Phung Sang Aê Diê. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
