Mathais 20:8-16
Nqe cim:
“Nej yog Vajtswv haivneeg. Vajtswv hlub nej thiab xaiv nej cia ua nws cov menyuam lawm; yog li ntawd, nej yuav tsum hlub lwm tus thiab ua siab zoo tsis txhob khavtheeb, tiamsis muaj lub siab mos siab muag thiab ua siab ntev.” (Kaulauxais 3:12)
Lus nug rau sawvdaws xav:
- Tus tswv tau muab nqi zog rau cov tub zog li cas, thiab vim li cas qee leej ho yws?
- Tus tswv tau teb cov uas yws li cas?
- Vajtswv xav kom peb ua Nws haujlwm los ntawm nplooj siab zoo li cas?
Thaum ua haujlwm txog tsaus ntuj, tus tswv hu cov tub zog los them lawv tej nqi zog. Thaum cov uas tuaj ua haujlwm thaum tsib teev tsaus ntuj thiab cov uas tuaj ua haujlwm thaum rau teev sawv ntxov puavleej tau txais ib lub nyiaj tib yam nkaus. Cov uas tau ua haujlwm txij thaum sawv ntxov txawm yws, lawv xav tias tus tswv tsis ncaj ncees rau lawv. Tiamsis lawv tsis nco qab tias tus tswv twb them nqi rau lawv raws li qhov lawv tau thooj yim txij thaum pib lawm (nqe 2). Tus tswv tsis tau quabyuam lossis dag lawv lub zog noj, nws them raws li txojcai ncaj ncees. Qhov uas cov ua haujlwm lig kuj tau txais ib lub nyiaj twb yog vim tus tswv txojkev hlub, kev khuvleej xwb. Yog tias lawv tsuas tau ib feem kaum ob ntawm ib lub nyiaj, ces yuav tsis txaus los yug lawv tsev neeg. Tus tswv paub tias tsis yog lawv tub nkeeg, tiamsis yog vim tsis muaj leejtwg ntiav, lawv thiaj nrhiav tsis tau haujlwm ua.
Tus tswv ua li no tsuas yog vim nws kev hlub, kev khuvleej nkaus xwb. Nws muaj cai hlub thiab muaj cai pub rau lwm tus, nws xav kom cov uas ua haujlwm txij thaum sawv ntxov yuav tsum nkag siab thiab muaj kev khuvleej rau lawv cov kwvtij, tiamsis vim lub siab khib thiab qia dub thiaj ua rau lawv yws, vim lawv tsis pom tus tswv lub siab khuvleej thiab lawv kuj tsis muaj kev khuvleej lwm tus.
Niaj hnub nimno nyob hauv Pawg Ntseeg, tseem muaj tej kev khib thiab sib tw hauv kev ua Vajtswv haujlwm. Tej zaum peb yuav xav tias vim li cas kuv tau ua haujlwm ntev dua, tiamsis Vajtswv ho tsis foom koob hmoov rau kuv npaum li cov uas nyuam qhuav pib ua haujlwm? Peb tsis txaus siab thaum ua Vajtswv haujlwm, tiamsis muaj kev chim siab thiab sib piv, sib tw nrog cov kwvtij uas koom nrog peb ua haujlwm. Peb khib thaum pom lwm tus ua tau tej yam uas peb ua tsis tau thiaj ua rau muaj kev chim siab, yws Vajtswv thiab yws lwm tus. Vajtswv xav kom peb ua haujlwm rau Nws los ntawm nplooj siab ua Nws tsaug, vim Nws hais tias “tsis yog nej xaiv kuv, tiamsis yog kuv xaiv nej thiab tsa nej…” (Yauhas 15:16). Tau nyob hauv Vajtswv Pawg Ntseeg, tau ua Nws haujlwm yog ib txoj koob hmoov loj uas Vajtswv pub rau peb. Thaum ua haujlwm ntev xyoo hauv Vajtswv Pawg Ntseeg, peb yuav tsum yim totaub Vajtswv lub siab heev dua qub, Nws xav kom peb muaj kev sib hlub, sib khuvleej raws li Vajtswv Txojlus hais tias: “nej yuav tsum hlub lwm tus thiab ua siab zoo tsis txhob khavtheeb, tiamsis muaj lub siab mos siab muag thiab ua siab ntev” (Kaulauxais 3:12). Thaum muaj kev khib, peb yoojyim tso tseg lossis thim rov qab hauv kev ua Vajtswv haujlwm, thaum kawg peb yuav poob txoj koob hmoov ua Nws txoj haujlwm, thiab txais tsis tau tej nqi zog uas tus Tswv pub rau cov uas ua haujlwm ncaj ncees mus txog thaum kawg.
Thov Vajtswv,
Tus Tswv, thov pab kom nyuam yaus txhob yws, txhob khib rau cov kwvtij uas ua haujlwm rau Koj, tiamsis yuav muaj kev sib nkag siab, sib hlub, thiab sib pab ua Koj haujlwm thiab ua kom Pawg Ntseeg loj hlob. Nyuam yaus tuav Yexus Khetos lub npe thov, Amees.
Peb puas tau ua neej nrog kev hlub, kev khuvleej vim Vajtswv twb hlub peb lawm?
Nyeem Vajluskub hauv peb lub xyoos: Yaxayas 19.
Kênh Youtube BHKTHN:
