Hơriso 103:1-5
“Ơ bơhngol inh, kơkuh bơnê bĕ kơ Kră Yang. ‘Nĕ hiơt dôm tơdrong ‘lơ̆ng Sư pơm.” (Hơriso 103:2)
Nơ̆r jet tơchĕng pơwao:
– Pơtao Đawit tơ’blŏk kơdih sư pơm kiơ kơplah sư hơri bơnê kơ Kră Yang? Yua kơ kiơ?
– Adrol hloh, sư bơnê kơ Kră Yang gah tơdrong kiơ?
– Bơ̆n kăl kơ bơnê kơ Kră Yang lu tơdrong ayơ?
Pơtao Đawit đei chih Sơ̆p hla bơar Hơriso 103 wă hơri bơnê tơdrong iơ̆m dim Kră Yang. Sư tơ’blŏk kơdih sư: “Ơ bơhngol inh, hơri bơnê bĕ kơ Kră Yang!” (trong 1). Ưh kơ sĭ lăp tơ’bôh đĕch jơhngơ̆m băt bơnê kơ Kră Yang đơ̆ng tơdrong pơm tơ’bôh gah ‘nguaih ôh, na kư̆m ưang kơ Kră Yang hăm đĭ bơhngol. Tơdrong băt bơnê ‘nâu gom đĭ hloi đơ̆ng sĕch akâu akar truh tơ bơhngol sư, “Đĭ jơhngơ̆m” hơri bơnê bĕ kơ anăn ‘lơ̆ng rơgoh sư. Nơ̆r bơnê thoi nơ̆r roi kơdranh rơđah hơđăl gah dôm tơdrong kiơ Kră Yang đei pơm kơ sư hlôi mơn. Jơhngơ̆m bơnê, nơ̆r hơri, noh jơhngơ̆m sư hmă đĕch kơplah sư tơchĕng pơwao gah tơdrong ‘lơ̆ng rơgoh, iơ̆m dim Kră Yang tơdrong ‘nâu pơchŭt kơ sư pran, kơjăp wă kơ sư ling lang hơri bơnê kơ Kră Yang.
Pơtao Đawit bơnê kơ Kră Yang lăm tôm tơdrong đơ̆ng tơdrong dŏng pơklaih tơdrong arih sư, tơdrong ăn kơ sư pơm pơtao. Lăp đon hăm dôm tơdrong ‘lơ̆ng, păng tơdrong ji jăn sư gơh klaih thoi đêl. Dôm tơdrong ‘lơ̆ng Kră Yang ăn kơ sư ưh kơ kĕ jô̆. Nơ̆r ưang pơma kơ tơdrong arih pơma kơ tơdrong ling lang ‘blŏk răk tơdrong iơ̆m dim Kră Yang. Kơplah hiơt lê̆ tơdrong iơ̆m dim Kră Yang gô pơm rơdu lê̆ tơdrong bơnê păng nơ̆r hơri bơnê hiơt kơ Kră Yang noh pơtơm wă yak ataih kơ Kră Yang, jing ba tơdrong truh kơ lăm tơdrong arih gah sĕch akar păng gah bơhngol.
Tơdrong arih rim ‘nu bơ̆n phŏ đei tơdrong hiôk ‘lơ̆ng thoi bơ̆n wă mălei phŏ kư̆m đei tơ’bơ̆p tơdrong pơlong, pơmat. Mălei tơdrong truh ưh kơ thoi bơ̆n wă noh phŏ lơ wơ̆t kư̆m pơm kơ bơ̆n bơ̆l hăl, păng lŭch hloh dơ̆ng ‘noh jơhngơ̆m hiơt bơnê kơ Kră Yang. Rim ‘nu kơ bơ̆n kăl kơ tơ’blŏk kơ bơ̆n kơdih băt bơnê păng hơri bơnê kơ Kră Yang: “’Nĕ hiơt dôm tơdrong ‘lơ̆ng Sư pơm (trong 2). Bơ̆n ngăl ưh kơ ‘blŏk răk đunh dêh dôm tơdrong kơnê̆, păng ‘bônh kơ hiơt dôm tơdrong truh hiôk ‘lơ̆ng, păng đơ̆ng noh hiơt lê̆ tơdrong pŭn hiôk Kră Yang ăn. Athei ‘măn jơ năr ‘blŏk ‘bơ̆t jơ đei tơdrong chơt hiôk, dôm tơdrong pŭn hiôk hlôi bơih, păng dơ̆ng wă bơnê kơ Kră Yang yua kơ dôm tơdrong noh. Bơnê kơ Kră Yang yua kơ dôm tơdrong dơ̆ng klokăn, mĕ ‘bă, bơngai lăm hnam dơnŏ đei ‘măn kơ bơ̆n dôm sơnăm hlôi bơih. ‘Nguaih kơ noh, athei bơnê kơ Kră Yang yua kơ tôm tơmam ‘lơ̆ng rŏ Kră Yang ‘măn kơ bơ̆n dôm sơnăm hlôi. Hloh kơ noh, athei bơnê kơ Kră Yang yua kơ tơmam noh bơih kon Sư, Kră Yang Yêsu Krist, ‘Bok mă chu lôch, tuh pham Sư wă kơ bơ̆n gơh arih lăm tơdrong Sư pơgơ̆r ling lang. Athei ‘măn Kră Yang Yêsu pơm tơm kơ chăl arih bơ̆n păng rim năr bơ̆n gơh roi kơ Kră Yang thoi ‘bok Pôk khan: “Bơnê kơ ‘Bok Kei-Dei ăn kơ bơ̆n tơdrong hiôk ưh kơ băt dang yơ wơh Kon Sư kơdih lôch tang bơ̆n.” (II Kôrintô 9:15).
Kơkuh kơ Ih Kră Yang, inh bơnê kơ Ih đei tuh pham wă dŏng pơklaih inh, păng ăn kơ inh pŭn hiôk lăm dôm tơdrong sơnăm hlôi hloh. Apinh Yang ‘Bă ling lang tơ’blŏk kơ inh ling lang arih hăm jơhngơ̆m băt bơnê kơ Kră Yang păng kư̆m băt klaih asong tơdrong pŭn hiôk Kră Yang kơ bơngai nai. Krao khan yua anăn Kră Yang Yêsu Krist, Amen.
Bơ̆n hăm đĭ jơhngơ̆m bơnê păng ưang kơ Kră Yang yua kơ đơ̆ng dôm tơdrong pŭn hiôk Kră Yang ăn ưh?
Đŏk Sơ̆p hla bơar ‘Bok Kei-Dei lăm pêng sơnăm: Jêrêmi 47
Kênh Youtube BHKTHN:
