Nêhêmi 4:6, 15-23
“Thoi noh lu nhôn man hơmet dur pơlei dơ̆ng, lu dur tơklep tơlir băl kơjung truh kơ minh puăt, yua kơ kon pơlei adrin ‘maih jang.” (Nêhêmi 4:6)
Nơ̆r jet tơchĕng pơwao:
– ‘Bok Nêhêmi krao khan, pơtrơp đơ̆ng krao khan noh sư liơ hai dơ̆ng?
– Bơ̆n pơhrăm iŏk đơ̆ng lu sư pơm ei lu tơdrong juăt gĭt kăl gah bơhngol noh kiơ wă yua iŏk lăm chăl arih bơ̆n dang ei?
Đei đon lui jao kơ Kră Yang, đon lui thoi ei ‘nei bơih pơdrŭt jơhngơ̆m’bok Nêhêmi adrin krao khan kơ Kră Yang, kư̆m yua kơ đon lui noh mơ̆n hlôi tơgŭm’bok Nêhêmi păng kon pơlei Kră Yang gruih graih iung đơ̆ng rŏng kơ krao khan, lu sư nuih pơ̆n jang pơtrơp dơ̆ng tơdrong jang Kră Yang pơjao. Tơdrong noh tơ’bôh kơ bơ̆n tơdrong krao khan ‘nâu kăl kơ ‘măn adrol hloh,mălei kư̆m đơ̆ng đon lui tơgŭm bơ̆n jang pơm hloi đơ̆ng rŏng kơ bơ̆n krao khan. Kră Yang tơgŭm dŏng hloi đơ̆ng bơ̆n krao khan păng đơ̆ng bơ̆n jang pơm hăm đon lui gơnang kơ Sư noh. ’Bok Nêhêmi lui tơpă kơ ‘Bok Kei-Dei Tơ’ngla mơsêh mơyang gơh pơm tôm tơdrong, kơplah noh mơ̆n sư gruih iung hloi, pơtrơp jang lăm tơdrong mơsêh pran Kră Yang noh (tr.20). Lu sư jang tôch bơneh kơ lu sư gơh, lu sư kĕ ; mălei lu sư kư̆m băt Kră Yang tơgŭm sư kĕ pran, blah ayăt jei lu sư đơ̆ng Kră Yang ăn. Bơ̆n dang ei kư̆m lei-lăi, khŏm’măn tơdrong krao khan adrol, bơ̆n kư̆m adrin jang pơm kiơ̆ tơdrong gơh hơgei đơ̆ng Kră Yang ăn. Bơ̆n ngăl glăi noh,ưh kơ đơ̆ng tơdrong bơ̆n krao khan năm hơdai hăm tơdrong bơ̆n jang pơm noh ôh,mălei bơ̆n ngăl glăi noh ‘bơ̆t anih ‘nâu: Bơ̆n ngăl lăng găl dêh kơ tơdrong bơ̆n jang pơm noh hloh loi kơ tơdrong krao khan, na ‘măn jơ krao khan tŏ sĕt đĕch.
Bơ̆n kư̆m’bôh tơdrong ‘nâu hai dơ̆ng, mưh bơ̆n pơm glăi na đe hil bơ̆n, pơm plơ̆ kơ bơ̆n noh trŏ’mơ̆i, lăp ‘mơ̆i, bơ̆n trŏ kơ achăng, lê̆ pă pơm hloi bơih tơdrong kơnê̆ noh. Mălei ‘nguaih kơ ‘noh, mă tơdrong kiơ kiơ, tơdah bơ̆n jang pơm‘lơ̆ng trŏ, na đe tă tơ hil areh,pơm kơnê̆ kơ bơ̆n,lei bơ̆n khŏm jang, khŏm pơm‘mơ̆i ưh kơ achăng ôh. ’Bok Nêhêmi ưh kơ pơdơh lê̆ tơdrong jang man hơmet dur pơlei Jêrusalem wă pơjăng pơjăr hăm tơdrong đe hil areh pơm kơnê̆. Đơ̆ng tơdrong ‘noh, sư băt mơn Kră Yang thoi âu: Sư băt mơn Kră Yang oei jê̆ sư hloh dơ̆ng, sư băt kơ Kră Yang rơđah hơđăl hloh dơ̆ng, băt kơ Kră Yang Tơ’ngla ling-lang mơ̆ng nơ̆r krao khan (tr.4,9); băt kơ Kră Yang Tơ’ngla tơpăt hơnơ̆ng, phak lu bơngai pơm kơnê̆. (tr.4), băt kơ Kră Yang Tơ’ngla Tih hloh, gơh pơm tôm tơdrong (tr.14); băt kơ Kră Yang oei pơgơ̆r, «pơrăm lê̆ tơdrong tơchĕng lu ayăt chă đon» (tr.15), păng băt kơ «Kră Yang’Bok Kei-Dei lu bơ̆n gô blah dŏng lu bơ̆n» (tr.20).
Lu ayăt ’nâu, lu sư minh tơdrong wă kơ bơ̆n weh đơ̆ng anih dơ̆ng bơ̆n’nâu, wă kơ bơ̆n weh đơ̆ng tơdrong Kră Yang krao bơ̆n, yua kơ thoi noh, mă tơ’bơ̆p tơdrong anat anot rai dêh, Khul Lui khŏm pôm jơhngơ̆m đon krao khan, bơ̆jang tơdrong Kră Yang rai dêh hloh dơ̆ng. ‘Nĕ kơ tơchĕng kơdŭn tơ rŏng khan tơdrong anat gô tôch hiong, ưh ôh. Tơdah bơ̆n hlôh băt tơdrong pơlong lăng,tơdrong đe hil areh, pơm kơnê̆ noh đơ̆ng Kră Yang ăn kơplah bơ̆n bơ̆jang tơdrong Sư, noh Sư wă tơgŭm bơ̆n rai đunh rai wơ̆ ‘lŏ hloh dơ̆ng,băt kơ Kră Yang rơđah hơđăl hloh dơ̆ng,kơjăp hloh dơ̆ng, lei tơdah bơ̆n kơdŭn tơrŏng ‘noh bơ̆n thuơ bơih, ưh kơ jing bơih. Bơ̆n gơh mơ̆n kơdŭn weh đơ̆ng tơdrong awih-awăn kơ Kră Yang tơdrong kiơ ei wă ‘măn jơ năr tơblah lăm tơdrong krao khan, dah mă wă yak năm tơ tơdrong Kră Yang krao jang tơdrong jang kiơ plơ̆ng dơ̆ng…Mălei ‘nĕ kơ achăng lê̆ tơdrong jang yua kơ tơ’bơ̆p anat anot, đe hil areh, pơm kơnê̆.
‘Bok Gregory Brown bơngai tơblang hlabơar, đei chih: «Tơpă,Nêhêmi păng kon pơlei Isơrael gơh achăng lê̆ tơdrong jang kơplah lu yăt hil mĭl dêh, hơmĕng khan lu ayăt huay pă drŭt blah lu sư. Mă khan lei ră,tơdah achăng lê̆ tơdrong jang lei ưh kơ pơm kơ lu sư tơproh ‘lơ̆ng hơđơ̆ng hloh ôh. Lu bơngai ưh kơ tơnăp kơjăp, lu bơngai noh bơih tơ’bơ̆p tơdrong krê hơmơt hloh. Satan sư ‘maih dêh tơtông tơgar iŏk, ’maih dêh pơrăm pơtôch pơlôch pơđĭ (Yôhan 10 :10). Anih mă hiôk hơđơ̆ng ‘lơ̆ng hơlom ngơngei noh lăm tơdrong ‘Bok Kei-Dei wă noh đĕch».
Kơkuh kơ Ih Kră Yang, Inh bơnê kơ Ih yua kơ Ih ling-lang oei jê̆ inh,oei hơdai inh, Ih Tơ’ngla Pơgơ̆r Mơsêh Mơyang, ‘Lơ̆ng Rŏ. Apinh Ih chông anhăk, bơtho tơ’bôh, ăn gơh hơgei păng đei jơhngơ̆m nuih chơ̆n wă kơ inh ling-lang chu kiơ̆ kơ nơ̆r Ih. Inh krao khan yua anăn Kră Yang Yêsu Krist, Amen!
Bơ̆n hăm gruih iung jang hloi ưh đơ̆ng rŏng kơ rim wơ̆t bơ̆n krao khan ?
Đŏk Sơ̆p Hla bơar ‘Bok Kei-Dei lăm pêng sơnăm: Luka 6
Kênh Youtube BHKTHN:
