Klei Aê Diê Blŭ: Y-Yôhan 13:3-5, 12-17
Êlan kliăng: “Tơdah Kâo, Khua Yang leh anăn Nai diih, rao leh jơ̆ng diih, snăn msĕ mơh brei diih bi rao jơ̆ng hdơ̆ng diih.” (Y-Yôhan 13:14)
Klei êmuh ksiêm mĭn: Hlăk ya boh klei truh Khua Yang rao jơ̆ng kơ phung ƀĭng kna? Si mblang kơ klei Khua Yang rao jơ̆ng? Si drei mă yua klei hriăm kpă ênô leh anăn thâo khăp mơ̆ng Khua Yang kơ klei hdĭp drei pô?
Hlăm krĭng Israel hlăk ênuk Khua Yang Yêsu, êlan klông ƀhŭl bruih lăn leh anăn arăng čŭt jep, snăn yơh jơ̆ng mnuih êbat jơ̆ng khăng čhŏ kyua ƀruih lăn. Klei Mrâo Mrang Jăk Y-Yôhan kdrêč 13 truh kơ 17 čih klei yăl dliê Khua Yang Yêsu mañ sa boh adŭ tal dlông mơ̆ng sa čô đăo čiăng bi tuôm hŏng knŏng hjăn phung khua ƀĭng kna, huă ƀơ̆ng hrăm mbĭt knhal tuč, leh anăn čiăng mtô lač kơ diñu êlâo kơ arăng mă Ñu leh anăn tŭ klei arăng pơ̆ng msei kđĭn. Ñu thâo klă kluôm Ñu hriê leh mơ̆ng Aê Diê leh anăn srăng lŏ wĭt kơ Ama (êlan 3). Hlăm mnĭt mmông yuôm bhăn anăn, Pô Hrih Mjing kơhưm kơah năng brei jih jang mnuih mă bruă kơ Ñu, ƀiădah Ñu pô yơh lŏ čuôn kơŭt rao jơ̆ng kơ phung ƀĭng kna, jing sa mta bruă ngă knŏng pioh kơ phung dĭng buăl điêt hĭn, êjai anăn “Mâo klei bi mgăl mơh hdơ̆ng phung ƀĭng kna hlei hlăm phung diñu arăng srăng yap prŏng hĭn.” (Y-Luk 22:24).
Khua Yang Yêsu toh hĕ ao jhŭng Ñu, mă čhiăm sut hyuă ti kơiêng, Ñu tuh êa hlăm sa boh hmăm leh anăn rao jơ̆ng kơ grăp čô ƀĭng kna Ñu, wăt kơ Y-Yuđas Iskariôt mơh, jing pô Khua Yang thâo klă srăng lhiăr kơ Ñu! Khua Yang Yêsu mâo jih klei kơhưm klei dưi mơ̆ng Aê Diê (êlan 3), ƀiădah Ñu amâo yua klei kơhưm anăn pioh kiă kriê gai gĭt msĕ si phung mtao amâodah phung khua prŏng ôh, ƀiădah Ñu pioh ngă bruă msĕ si sa čô dĭng buăl ti gŭ hĭn. Anei jing sa bruă ngă kpă ênô tui si hnơ̆ng čuăn ti dlông adiê, amâo djŏ bi kmhal ôh, ƀiădah lŏ bi mrâo. Klei kpă ênô sĭt lŏ dăp dưm jih jang mnơ̆ng bi djŏ anôk: pô ti dlông hĭn brei luă gŭ, pô ti gŭ dưi lŏ bi mđĭ. Bruă ngă rao jơ̆ng kơ phung ƀĭng kna Khua Yang bi dlưh rai hĕ klei bi kah êpul gưl tal mdê mdê, leh anăn klei bhiăn mĭn anak mnuih.
Klei rao jơ̆ng amâo knŏng jing bruă klei bhiăn ƀiădah jing klei luă gŭ mă bruă. Khua Yang Yêsu Pô yơh, Anak Aê Diê, kăp kkui ngă leh bruă anăn. Ñu khăp kơ phung ƀĭng kna Ñu “tơl knhal tuč” (Y-Yôhan 13:1), leh anăn bruă ngă anei jing sa klei bi knăl sĭt êmĭt kơ klei khăp anăn, klei khăp amâo mâo klei čoh čuăn ôh, khăp wăt kơ pô lhiăr kơ Ñu msĕ si kơ Y-Yuđas Iskariôt.
Hlăm Ƀuôn Ala Mtao Aê Diê, klei kpă ênô mblang jing klei khăp, klei mpŭ leh anăn mă bruă kơ hdơ̆ng pô. Khua Yang čiăng kơ drei bi mă bruă kơ hdơ̆ng drei, hlăm klei khăp hŏng klei luă gŭ, amâo tĭng yap ôh si anôk bruă jing hlăm ala ƀuôn amâodah hlăm Phung Sang Aê Diê. Đăm knŏng blŭ klei khăp hŏng klei blŭ mang, ƀiădah brei dôk hdĭp thâo khăp. Hlăm lăn ala bŏ hŏng klei amâo mâo klei mtăp mđơr, Khua Yang čiăng kơ phung anak ƀuôn sang Ñu dôk hdĭp thâo bi khăp bi êdah hŏng bruă ngă, msĕ si Khua Yang pô bi hmô leh, khăp wăt kơ pô dleh khăp, luă gŭ mă bruă, leh anăn dôk hdĭp kpă ênô.
Tơdah Khua Yang Yêsu êmuh: “diih thâo săng mơ̆ ya kâo ngă leh kơ diih?” (êlan 12), Khua Yang amâo knŏng čiăng brei drei dôk bi mĭn, ƀiădah wăt čiăng kơ drei dôk hdĭp tui si klei Ñu bi hmô mơh. Snăn si ngă drei gưt hlue klei Khua Yang bi hmô, hdĭp bi êdah klei kpă ênô hlăm klei khăp hŏng bruă ngă sĭt êmĭt mơ̆?
Wah lač: Ơ Khua Yang Yêsu, bi mni kơ Ih brei kâo ƀuh leh klei siam mơ̆ng klei kpă ênô leh anăn klei ktang mơ̆ng klei khăp hŏng bruă ngă rao jơ̆ng điêt pliê, ƀiădah bŏ hŏng lu klei čiăng mblang. Akâo Yang Mngăt Jăk Aê Diê đru kâo gưt ngă Klei Aê Diê Blŭ mtô: “Hŏng klei khăp ngă dĭng buăl kơ hdơ̆ng diih”. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 38
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
