Yôhan 13:3-5, 12-17
“Inh ‘Bok Thây iĕm păng Yŏng iĕm, mă-lei Inh ôp jơ̆ng iĕm dang Inh pơm đĭch iĕm đĕch, mă iĕm athei ôp dih băl jơ̆ng iĕm.” (Yôhan 13:14)
Nơ̆r jet tơchĕng pơwao:
– Ôp jơ̆ng lu Jơ̆ng ‘bang kơplah hơyơ?
– Tơdrong Kră Yang ôp jơ̆ng lu jơ̆ng ’bang noh wă pơma khan thoi yơ?
– Lu bơ̆n yua iŏk thoi yơ gah ‘bai pơhrăm tơpăt păng tơdrong ‘mêm Kră Yang lăm chăl arih?
Tơ dêh Juđê lăm chăl Kră Yang Yêsu, trong năm teh pŭk ‘mui păng đe trô̆ chơ khŏ thoi noh na jơ̆ng lu bơngai yak jơ̆ng ‘bĕnh kơ ‘mui teh pŭk. Tơdrong ‘Nao ‘Lơ̆ng kiơ̆ kơ Yôhan chăl 13 truh tơ chăl 17 đei chih răk tơdrong hơ’mon Kră Yang Yêsu năm apinh pơdơh tơ hnam minh ‘nu bơngai lui tơ kơpal tơ̆ng kơjung wă tơ’bơ̆p lu bơngai pơhrăm păng Sư, wă sŏng sa jơ tuch luch, păng bơtho tơ’bôh kơ lu sư adrol kơ Kră Yang băt hơđăl tơpă Sư đơ̆ng ‘Bok Kei-Dei păng wă jê̆ wih brŏk tơ ‘Bă dơ̆ng (trong 3). Lăm jơ gĭt kăl noh, Tơ’ngla pơjing gơh pơm tôm tơdrong tơplih wă kơ rim bơngai awih awăn. Kră Yang Yêsu rơih iŏk kŭp kơ̆l ôp jơ̆ng lu jơ̆ng ‘bang Sư, minh tơdrong jang trŏ sư ‘măn kơ lu bơngai pơm đĭch mă lŭch hloh, lăm noh “Lu bơngai pơhrăm păng Yêsu pơjah pơjăng dih băl, kơ tơdrong lăm lu sư bu tih hloh kơ tơduă sư” (Luka 22:24).
Kră Yang Yêsu plôh ao ‘nguaih Sư, iŏk kơn chô̆ ‘bơ̆t rơhriĕo Sư kơdih, klaih kơ noh Sư tuh đak lăm kơthao na ôp jơ̆ng lu bơngai pơhrăm păng Sư, lăm noh kư̆m đei Juđa Ikariôt, Kră Yang băt kơ bơngai noh bơih wă plơ̆ plĕch kơ Sư! Yêsu băt kơ ‘Bă Sư ăn kơ Sư gơh pơm tôm tơdrong (trong 3), mălei Kră Yang ưh kơ wă yua tơdrong Sư gơh pơm noh wă pơgơ̆r thoi lu pơtao dah lu ‘bok sek tơlang, mălei Sư wă awih awăn thoi minh ‘nu đĭch mă lŭch hloh. ‘Nâu bơih pơm tơ’bôh tơdrong tơpăt kiơ̆ kơ tơdrong hơgăt ‘lơ̆ng, ưh kơ trŏ wă phak, mălei wă hơmet ming tơdrong tơpăt sĭt đei dan dôm tơdrong trŏ: Bơngai pơm tih athei iŏk đon ala, na bơngai pơm iĕ gô pôk atŏk, tơdrong pơm tơ’bôh gah ôp jơ̆ng lu jơ̆ng ‘bang ‘nâu Kră Yang Yêsu đei pơgăn lê̆ lu tơdrong jang lu tơdrong ưh kơ ‘lơ̆ng.
Ôp jơ̆ng tơdrong juăt đĕch mălei ‘noh pơm tơ’bôh iŏk đon ala, awih awăn. Tơ’ngla Kră Yang Yêsu Kon ‘Bok Kei-Dei, Sư ‘mêm tơpă kơ lu bơngai lui kơ Sư, na Sư khŏm ăn akâu “Sư lôch tang bơ̆n” (Yôhan 13:1). Tơdrong pơm tơ’bôh ‘nâu đei tơ’bôh tơdrong ‘mêm noh. ‘Mêm ưh kơ trŏ kơ đêl sư ‘mêm adrol thoi bơngai plơ̆ plĕch kơ Sư ‘noh Juđa Ikariôt.
Lăm dêh char ‘Bok Kei-Dei, tơpăt wă khan ‘mêm mơnat, pơyom păng awih awăn dih băl Kră Yang wă kơ lu bơ̆n awih awăn dih băl lăm tơdrong ‘mêm yom băl, mă khan bơ̆n thoi yơ hĭ lăm ala teh âu dah lăm khul bơngai lui. ‘Nĕ kơ pơma ‘mêm ‘bơ̆r đĕch, na mălei athei arih băt ‘mêm dih băl. Lăm teh đak ‘bĕnh tơdrong ưh kơ tơpăt Kră Yang wă kơ kon pơlei pơla Sư arih băt ‘mêm mơnat pơm tơ’bôh hloi thoi Sư đei pơm kơmĭl ăn kơ lu bơ̆n, ‘mêm hloi kơ lu bơngai mă bơ̆n areh, iŏk đon ala awih awăn păng arih tơpăt.
Ơ Kră Yang Yêsu, inh bơnê kơ Ih, Ih đei tơbăt ăn kơ inh tơdrong ‘lơ̆ng gah tơdrong tơpăt păng tơdrong ‘mêm pran kơtang đơ̆ng tơdrong ôp jơ̆ng hmă đĕch mălei đei gĭt. Apinh Yang Bơhngol ‘Lơ̆ng tơgŭm inh pơm kiơ̆ nơ̆r Ih bơtho: “Iŏk jơhngơ̆m ‘mêm pơm đĭch đam dih băl,” krao khan yua anăn Kră Yang Yêsu Krist, Amen.
Kơplah Kră Yang Yêsu jet: “iĕm hăm hlôh inh pơm kiơ kơ iĕm thoi noh hei” (trong 12). Kră Yang ưh kơ sĭ wă kơ lu bơ̆n tơchĕng đĕch, mălei wă kơ lu bơ̆n arih kiơ̆ kơmĭl Sư. Lei lu bơ̆n hăm kiơ̆ kơmĭl Kră Yang na arih pơm tơ’bôh tơdrong tơpăt lăm tơdrong ‘mêm đei tơbôh thoi yơ ưh?
Đŏk Sơ̆p hla bơar ‘Bok Kei-Dei lăm pêng sơnăm: Êsêkiên 38
Kênh Youtube BHKTHN:
