Yauhas 13:3-5, 12-17
Nqe cim:
“Kuv yog nej tus Tswv thiab yog nej tus Xibhwb, kuv twb ntxuav nej kotaw lawm; yog li ntawd, nej ib leeg yuav tsum ntxuav ib leeg kotaw.” (Yauhas 13:14)
Lus nug xav:
– Tus Tswv ntxuav cov thwjtim kotaw hauv lub tsamthawj li cas?
– Tus Tswv qhov kev ntxuav cov timthawj kotaw muaj lub ntsiab lus li cas?
– Peb yuav muab zaj kawm txog tus Tswv txojkev ncaj ncees thiab kev sib hlub coj los siv rau peb lubneej li cas?
Tebchaws Yudais tiam Tswv Yexus nyob, tej kev taug muaj hmoov av kawg li thiab tibneeg rau khau khiab ces cov neeg taug kev kotaw feem ntau lo av heev. Phau Moo Zoo Yauhas tshooj 13 txog 17 sau tseg txog zaj xwm Tswv Yexus qiv ib tug ntseeg ib chav tsev tshooj saud los ntsib cov timthawj, noj pluas hmo zaum kawg, thiab qhia lawv ua ntej Tswv Yexus yuav raug ntes thiab raug ntsia rau saum ntoo khaublig. Nws yeej paub meej hais tias Nws los ntawm Vajtswv los thiab tabtom yuav rov mus cuag Leej Txiv (nqe 3). Nyob hauv lub sijhawm tseemceeb ntawd, Tus Tsim Ib Puas Tsavyam uas muaj hwjchim loj kawg nkaus tsis taij kom sawvdaws tu Nws, tiamsis Tswv Yexus ho xaiv txhos caug ntxuav cov thwjtim kotaw, ntawd yog ib txoj haujlwm ntawm tus tub qhe qis tshajplaws nkaus xwb, hos cov thwjtim tseem “sib cav zom zaws, saib leejtwg yuav tau ua tus loj dua ntais” (Lukas 22:24).
Tswv Yexus hle Nws lub tsho ntev, muab ib txoj phuam los sia ntawm duav, muab dej hliv rau hauv lub phiab thiab nqa los ntxuav cov thwjtim kotaw, ntxuav leej Yudas Ixakhali-us yog tus uas Nws paub meej hais tias yuav ntxeev siab rau Nws huv tibsi! Tswv Yexus muaj tagnrho Vajtswv lub hwjchim (nqe 3), tiamsis Nws tsis siv lub hwjchim ntawd los kav li tej vajntxwv lossis tej nomtswv, tiamsis siv los tu lwm tus zoo li ib tug tubtxib uas qis tshajplaws. No yog ib tes haujlwm ncaj ncees raws li Ntuj Ceeb Tsheej txojcai, tsis yog los rau txim, tiamsis yog los kho kom rov zoo. Txojkev ncaj ncees tseeb rov muab txhua yam tso rau qhov yog: Tus meejmom siab yuav tsum txo hwjchim, tus nyob qis ho raug tsa kom siab tuaj. Tus Tswv qhov kev ntxuav cov thwjtim kotaw tau tsoo daim phab ntsa faib qib thiab xaiv ntsejmuag puas tsuaj lawm.
Kev ntxuav kotaw tsis tsuas yog raws li kevcai xwb tiamsis yog tes haujlwm txo hwjchim, pab tu lwm tus. Tswv Yexus, uas yog Vajtswv Leej Tub, tau txaus siab khoov qis los ua txoj haujlwm ntawd. Nws hlub Nws cov thwjtim “mus txog hnub kawg li” (Yauhas 13:1), thiab tes haujlwm no yog ua qhia tshwm txojkev hlub ntawd, hlub tsis yuav pauj, hlub tagnrho tus ntxeev siab li Yudas Ixakhali-us.
Nyob hauv Vajtswv Lub Tebchaws, kev ncaj ncees yog kev sib hlub, saib taus thiab sib pab. Tus Tswv xav kom peb sib pab hauv txojkev sib hlub nrog nplooj siab txo hwjchim, txawm yog peb nyob qib twg hauv lub neej lossis hauv Pawg Ntseeg los xij. Txhob tsuas yog hais lo lus sib hlub ntawm ncauj xwb, tiamsis yuav tsum muaj lubneej sib hlub tiag. Nyob hauv lub ntiajteb uas muaj ntau txojkev tsis ncaj ncees, tus Tswv xav kom Nws cov menyuam ua lubneej sib hlub dhau ntawm tes haujlwm ua raws li Nws tau ua qauv tseg, hlub cov neeg yus tsis xav hlub, txo hwjchim pab lwm tus, thiab ua lubneej ncaj ncees.
Thov Vajtswv,
Tswv Yexus, ua Koj tsaug vim Koj pub rau nyuam yaus pom txojkev ncaj ncees uas zoo nkauj thiab lub zog ntawm txojkev hlub dhau ntawm qhov kev ntxuav kotaw uas yooj yim tiamsis muaj nqis kawg li. Thov Vaj Ntsujplig pab nyuam yaus ua raws li Vajluskub qhia hais tias: “yuav tsum sib hlub thiab ib leeg txaus siab hlo pab ib leeg”. Nyuam yaus tuav Tswv Yexus Khetos lub npe thov, Amees.
Thaum Tswv Yexus nug hais tias: “Qhov uas kuv ua rau nej no, nej puas totaub?” (nqe 12), tus Tswv tsis tsuas yog xav kom peb xav hauv siab xwb, tiamsis Nws xav kom peb ua lubneej raws li Nws tus qauv. Yog li ntawd, peb puas niaj hnub kawm Tswv Yexus tus qauv ua lubneej qhia tshwm txojkev ncaj ncees hauv kev sib hlub dhau ntawm tes haujlwm sab nraud lawm tau?
Nyeem Vajluskub hauv peb lub xyoos: Exekees 38
Kênh Youtube BHKTHN:
