Klei Aê Diê Blŭ: Klei Mmuñ Hđăp 100:1
Êlan kliăng: “Ur hơ̆k bĕ kơ Yêhôwa, Ơ jih jang phung dôk ti lăn ala” (Klei Mmuñ Hđăp 100:1)
Klei êmuh ksiêm mĭn: Hlei pô brei thâo hdơr knga kơ Aê Diê hlăm Klei Mmun Hđăp 100? Hŏng si ênhă êlan brei hdơr knga bi mni kơ Aê Diê? Si drei mă yua ênhă êlan anei hlăm klei hdĭp?
Bi kngăr êdi tơdah thâo Klei Mmuñ Hđăp 100 jing sa Klei Mmuñ Hđăp hưn klă kñăm “Klei Mmuñ Hđăp pioh kơ klei hdơr knga bi mni”. Mâo lu Klei Mmuñ Hđăp mkăn ăt yua pioh kơ hdơr knga bi mni kơ Aê Diê mơh, ƀiădah knŏng hjăn Klei Mmuñ Hđăp 100 bi êdah klă mngač čih hưn mơ̆ng akŏ phŭn kñăm knŏng pioh kơ klei hdơr knga bi mni.
Klei Mmuñ Hđăp 100 pŏk kčưm hŏng klei iêô mthưr “Jih jang phung dôk ti lăn ala”, mblang jing kluôm jih jang mnơ̆ng dhơ̆ng Aê Diê hrih mjing leh (êlan 3). Leh anăn Pô kơ klei kkuh mpŭ leh anăn hdơr knga bi mni jing Yêhôwa. Anăn pia hjăn kơ Aê Diê anei, yua mâo 4 blư̆ hlăm Klei Mmuñ Hđăp 100. Tinei, drei ƀuh mâo dua klei sĭt nik yuôm bhăn. Tal sa, mmuñ bi mni leh anăn hdơr knga bi mni kơ Aê Diê jing bruă čuăn kơ jih jang mnuih hlăm grăp ƀuôn sang, grăp dhar kreh, grăp djuê ana leh anăn grăp gưl thŭn. Hruê anei, lu mnuih ênưih thâo lač jăk kơ hlei pô đru ñu, ƀiădah dŭm čô mnuih thâo hdơr knga bi mni sĭt êdi kơ Aê Diê hlăm grăp mnĭt mmông klei hdĭp drei? Tal dua, sa čô mnuih knŏng thâo bi mni leh anăn hdơr knga sĭt kơ Aê Diê tơdah thâo kral hlei Ñu jing, amâo djŏ ôh knŏng thâo săng hŏng klei mĭn, ƀiădah wăt thâo kral hlăm klei bi mguôp hjăn hŏng Ñu. Ai tiê thâo hdơr knga sĭt, kbiă mơ̆ng klei bi mguôp djŏ hŏng Aê Diê, Pô Hrih Mjing leh anăn Pô thiê brei jih jang mnơ̆ng kơ anak mnuih.
Mmuñ bi mni leh anăn hdơr knga bi mni kbiă mơ̆ng klei mĭn thâo săng kơ hlei Aê Diê jing, hlei drei pô jing, leh anăn mâo ai tiê thâo hdơr knga bi mni kơ jih klei Aê Diê ngă leh kơ drei pô, biădah ai tiê thâo hdơr knga brei bi êdah truh ti êngao hŏng klei hơ̆k mơak. Tinei, pô čih hră iêô mthưr jih jang mnuih “Ur hơ̆k bĕ” . Boh blŭ “Ur hơ̆k” čiăng lač kơ klei “bi ênai” amâodah “asăp ayŭ ki”. Pô čih hră iêô mthưr jih jang phung kkuh mpŭ brei mmuñ kraih ktang mpŭ mni kơ Aê Diê kyuadah ai tiê bŏ dlai hŏng klei hơ̆k mơak leh anăn ai tiê hdơr knga bi mni kơ Ñu tơl amâo dưi lŏ kơ̆ng mkhư̆ ôh klei bluh ai tiê drei.
Drei khăng ƀuh nanao klei hơ̆k mơak hŏng klei ur driâo, knhuang jơ̆ng čhuang êbat ruăt hmăr, păl kngan kmiêk leh anăn wăt êa ală hơ̆k mơak mơ̆ng phung găp djuê, hdơ̆ng pô khăp bi tuôm mbĭt ti sang mjưh anôk drông êdeh phiơr, êdeh treng. Hŏng ai tiê klei mĭn hơ̆k mơak hdơr knga bi mni kơ Aê Diê, grăp čô anak Ñu brei thâo ƀuh klei pap Aê Diê brei kơ drei grăp hruê amâo dưi yap, čiăng êran nao phă Khua Yang, kmiêk Ñu leh anăn ur driâo hơ̆k mơak kơ Pô khăp êdimi kơ drei tơl săn asei mlei Ñu Pô kơ drei. Akâo kơ Aê Diê brei drei wĭt lač kơ klei pô čih Klei Mmuñ Hđăp 100: “Ur hơ̆k bĕ kơ Yêhôwa, Ơ jih jang phung dôk ti lăn ala!”
Tal êdei hĭn mơ̆ng anei, hbĭl drei tuôm sĭt êmĭt hdơr knga bi mni kơ Aê Diê hŏng ai tiê hơ̆k mơak leh anăn ur driâo?
Wah lač: Ơ Khua Yang, kâo bi mni kơ Anăn Doh Jăk Ih. Ai tiê kâo hdơr knga bi mni kơ klei pap, klei khăp, klei jăk Ih tuh brei leh kơ kâo êbeh dlai.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Y‑Samuel 23:8-39
Kênh Youtube BHKTHN:
