Klei Aê Diê Blŭ: Y-Mathiơ 23:25-26
Êlan kliăng: “Rao bĕ diih pô, bi doh bĕ diih pô, mă hĕ klei jhat hlăm klei diih ngă mơ̆ng klei ti anăp ală Kâo, mdei bĕ ngă klei jhat” (Y-Êsai 1:16)
Klei êmuh ksiêm mĭn: Khua Yang Yêsu phat kđi phung khua čih hră leh anăn phung Pharisi kơ ya mta klei? Khua Yang Yêsu yua rup kčok leh anăn jam čiăng bi hriăm kơ ya klei? Hruê anei, si klei dôk dơ̆ng ƀơ̆ng huă hŏng ai ngăm khăng bi êdah?
Khua Yang Yêsu lŏ phat kđi klei ai ngăm phung khua čih hră leh anăn phung Pharisi kyuadah diñu ktư̆ juă mnuih mkăn ƀiădah lui tha diñu pô. Khua Yang yua rup kčok leh anăn jam jing dŏ mưng ƀuh tơdah phung Yuđa jum tue čiăng phat kđi leh anăn bi hriăm diñu kơ klei ai ngăm. Phung Yuđa thâo jum tue snăk, diñu amâo srăng brei ôh tue ƀơ̆ng mnăm hŏng kčok leh anăn jam bi doh knŏng ti êngao ƀiădah hlăm lam čhŏ mrŏ, anăn jing bruă ngă soh leh anăn amâo mâo klei mpŭ ôh. Khua Yang yua mnơ̆ng anei čiăng bi êdah klei jing phung knơ̆ng khua gĭt gai klei đăo ti êngao bi êdah klei sĭt suôr hlăm klei đăo, ngă msĕ si hur har kơ bruă Aê Diê, ƀiădah hlăm lam bŏ hŏng klei čhŏ leh anăn klei soh. Diñu dlăng yuôm kơ klei bhiăn, kơ bruă ngă ti êngao, ƀiădah klei hdĭp čhŏ mrŏ, bŏ hŏng klei soh. Boh blŭ “plah mă” čiăng lač kơ klei diñu plah mă mgô̆ dŏ dô arăng, boh blŭ “ră” čiăng lač kơ klei amâo mâo knhal ôh, kyuadah diñu tluh leh anăn čiăng dưn yua kyuanăn diñu yua djăp mta mnêč jhat čiăng duah klei tŭ dưn kơ diñu pô leh anăn plah mă mgô̆ dŏ mnuih mkăn. Phung khua gĭt gai klei đăo Yuđa dôk hlăm klei mmăt, bum ală hlăm klei hdĭp myang, diñu amâo ƀuh ôh klei hdĭp diñu bŏ hŏng klei soh. Khua Yang mtô kơ diñu êlâo hĭn brei diñu bi doh hĕ klei soh mơ̆ng lam.
Mâo lu blư̆ drei uêñ đei kơ klei bi êdah klei jăk ti êngao čiăng kơ arăng ƀuh leh anăn bi mni, msĕ si klei Khua Yang lač leh hlăm I Y-Samuel 16:7 mñă kơ drei snei: “Kyuadah Yêhôwa amâo dlăng msĕ si mnuih dlăng ôh; mnuih dlăng asei mlei ti êngao, ƀiădah Yêhôwa dlăng kơ ai tiê.” Drei dưi ngă klei ai ngăm ti anăp mnuih ƀiădah amâo dưi ngă klei ai ngăm ti anăp Aê Diê ôh. Brei grăp čô drei ksiêm dlăng ya jing mnơ̆ng mtrŭt drei mă bruă kơ Khua Yang, tơdah drei dlăng yuôm đei kơ klei bhiăn ngă ti êngao ƀiădah lui hĕ klei bi mguôp hŏng Khua Yang, leh anăn amâo ngă jăk ôh kơ phung ayŏng amai adei drei snăn drei dôk ngă klei ai ngăm yơh. Khua ƀĭng kna Y-Pêtrôs mtă kơ phung dôk mă bruă kơ Khua Yang snei: “Brei diih kiă phung biăp Aê Diê jao leh kơ diih, amâo djŏ hŏng klei mgô̆ ôh, ƀiădah hŏng klei čŏng čiăng, amâo djŏ kyua ênoh mưn čhŏ mrŏ ôh, ƀiădah hŏng klei khăp hŏng jih ai tiê” (I Y-Pêtrôs 5:2). Brei drei thâo kral hĕ klei awăt, klei soh drei leh anăn akâo kơ Khua Yang bi doh, bi mlih hĕ ai tiê drei (Y-Êskiêl 36:25-26). Tơdah ai tiê drei mâo leh klei Khua Yang bi mlih kơh drei dưi khăp, uêñ mĭn leh anăn đru phung ayŏng amai adei drei hŏng bruă ngă sĭt. Ƀiădah tơdah ai tiê drei adôk čhŏ, wăt tơdah drei ngă jih klei bhiăn ti êngao dưn, klei anăn ăt jing hơăi mang mơh.
Si ngă drei tuôm leh hŏng Khua Yang leh anăn gưt kơ Ñu čiăng Ñu bi mlih ai tiê drei leh mơ̆?
Wah lač: Ơ Aê Diê, bi doh bĕ klei soh kâo hŏng êrah Yêsu Krist, Anak Ih čiăng kơ mmông anei kâo amâo ngă klei ai ngăm, bi êdah knŏng ti êngao ôh, ƀiădah hdĭp hŏng klei thâo khăp, thâo uêñ leh anăn bi đru hdơ̆ng ayŏng amai adei hŏng ai tiê sĭt. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Ôsê 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
