Mathais 23:25-26
Nqe cim:
“Ntxuav kom nej huv, tso plhuav tej kev phem kev qias uas kuv pom nej ua no tseg. Tso plhuav kev phem kev qias tseg” (Yaxayas 1:16)
Lus nug xav:
– Tswv Yexus cem cov xibhwb qhia Vajtswv txoj kevcai thiab cov neeg Falixais yam twg?
– Tus Tswv siv tus duab tais thiab khob qhia yam dabtsi?
– Nimno, ua neej ntsejmuag ncaj siab nkhaus pheej qhia tawm zoo li cas?
Tswv Yexus rov cem cov xibhwb uas qhia Vajtswv txoj kevcai thiab neeg Falixais vim lawv ua tsis ncaj rau lwm tus tiamsis lawv saib tus kheej muaj nqis. Tus Tswv siv tus duab tais thiab khob uas cov neeg Yudais siv txais qhua los cem thiab qhia txog qhov uas lawv ua ntsejmuag ncaj siab nkhaus. Cov neeg Yudais nyiam qhua heev, lawv tsis kam muab cov tais, cov khob uas so huv sab nraud tiamsis sab hauv tseem qias coj los rau tej qhua tseemceeb noj haus, vim ua li yog ua saib tsis taus qhua. Tus Tswv siv tus duab no los qhia tawm cov thawjcoj thaud kev ua neej, saib sab nraud zoo li ntseeg zoo, paub tus Tswv, tiamsis sab hauv lub siab qias thiab ua txhaum. Lawv muab kevcai, saib sab nraud saib hlob tiamsis kev ua neej ces tsis ncaj, tsis dawbhuv. Lo lus “siab hlob” muaj lub ntsiab tias txhav lwm tus tabmeeg, lo lus “qaug siab rau yam ub yam no”(Hmowsv) muaj lub ntsiab tias tsis muaj nrim, vim lawv ntshaw, xav kom yus tau yog li ua txhua yam kom tau luag li los ua yus li. Cov Yudais cov thawjcoj nyob hauv txojkev tsaus ntuj, digmuag sab ntsujplig, lawv tsis zeem paub lawv tej kev txhaum. Tus Tswv qhia kom lawv yuav tsum muab qhov kev txhaum sab hauv tso tseg huvsi.
Ntau zaus thaum peb rau siab tu sab nraud zoo li yog neeg muaj kev ntseeg kom sawvdaws ntsia pom thiab qhuas, tiamsis Vajtswv Txojlus hauv I Xamuyees 16:7 qhia rau peb tias: “…tus Tswv hais rau Xamuyees hais tias, koj tsis txhob saib qhov uas nws siab thiab zoo nraug xwb. Kuv tsis yuav tus ko, rau qhov kuv tsis saib neeg li noobneej saib. Neeg saib lub cev ntaj ntsug, tiamsis kuv saib neeg lub siab”. Peb ua tau ntsejmuag ncaj siab nkhaus rau tej neeg tiamsis ua tsis tau tabmeeg Vajtswv. Peb txhua tus cheemtsum saib qhov keebtiv peb ua tus Tswv haujlwm, yog peb muab kevcai saib hlob, muab txojkev sib raug zoo nrog tus Tswv thiab kev ua neej nrog cov ntseeg saib tsis muaj nqis ces yog peb tabtom ua neeg ntsejmuag ncaj siab nkhaus. Timthawj Petus twb qhia rau cov neeg ua Vajtswv haujlwm, “nej yuav tsum zoo siab hlo ua tsis txhob lam tuav txoj haujlwm ntawd. Nej yuav tsum muab siab rau ua tiag tiag, tsis txhob pheej xav txog tej nqi zog uas nej yuav tau xwb” (I Petus 5:2). Peb cheemtsum paub tej kev txhaum, tej uas yus ua tsis tau zoo; thov Vajtswv ntxuav thiab hloov kom peb muaj lub neej tshiab (Exekees 36:25-26). Tsuas yog thaum tus Tswv hloov peb lub siab tshiab, peb thiaj muaj kev hlub, hmov tshua thiab pab cov ntseeg los ntawm kev ua haujlwm tawm. Yog peb lub siab tseem ua kev txhaum ces txawm yog coj kevcai saib sab nraud zoo npaum twg los kuj tsis muaj qab hau li.
Thov Vajtswv,
Vajtswv, thov Tswv Yexus cov ntshav ntxuav nyuam yaus tej kev txhaum huvsi mus kom nyuam yaus tsis ua neeg ntsejmuag ncaj siab nkhaus, tsis khav tshwm sab nraud tiamsis ua neej muaj kev hlub, hmov tshua thiab ib leeg pab ib leeg tiag tiag. Nyuam yaus tuav Tswv Yexus lub npe thov, Amees.
Peb twb ntsib tus Tswv thiab ua li Nws hais kom peb ua tau tus neeg tshiab sab hauv lawm los tsis tau?
Nyeem Vajluskub hauv peb lub xyoo: Hauxeyas 6
Kênh Youtube BHKTHN:
