Galati 1:1-5
“Ơ lu đe kon inh, mơ̆ng bĕ nơ̆r bơtho khan đơ̆ng ‘bă, Pơgling bĕ đon, wă kơ lu iĕm băt kơ tơdrong hlôh băt.” (Tơdrong Pơđơ̆k 4:1)
Nơ̆r jet tơchĕng pơwao:
– Kơthơ Galati đơ̆ng bu chih păng chih ăn kơ bu?
– Yua kơ kiơ bơngai chih âu pơma dêh tơm tơdrong jang Jơ̆ng ‘bang lăm sư kơdih?
– Lu bơ̆n đei jơhngơ̆m thoi yơ tơdah đei bơngai bơtho tơ’bôh tơ’blŏk gah bơhngol lu bơ̆n?
Kiơ̆ kơ đei tơm kăl kơ rok kiơ̆ kơthơ đei chih kơ bơngai Rôm, ‘bok Pôl blŭng a chih kơthơ Galati lăm nơ̆r roi tơbăt gah sư kơdih jơ̆ bơngai chih, đơ̆ng noh truh tơ bơngai iŏk kơthơ, hăm nơ̆r kơkuh jet gia. Kơthơ Galati đơ̆ng ‘bok Pôl chih “Lu ‘nhŏng oh bơngai lui tơ inh âu.” Chih ăn kơ “khul bơngai lui tơ dêh Galati” minh pôm tơring lăm dêh gah hơlĕch kơ Isơrael oei lăm dêh char Rôm pơgơ̆r tơ pơlei ei sơ̆ (trong 1-2). Mă khan thoi ei, đơ̆ng tơdrong mă đei chih lăm kơthơ, lu bơ̆n đei ‘bôh ‘bok Pôl bơih bơngai chih kơthơ. Lăm trong blŭng a, sư đei yua lơ nơ̆r wă tơbăt kơdih sư hăm lu bơngai mă đei iŏk kơthơ, jơ̆ lu bơngai mă lui ngăl bơih, đơ̆ng lu sư kơtơ̆ng ‘bok Pôl bơtho (Galati 3:1-5; 4:13-15). Yua kơ kiơ sư athei roi tơbăt kơ sư kơdih ‘noh jơ̆ng ‘bang “Inh pơm jơ̆ng ‘bang Yêsu Krist yua kơ Sư ăn kơ inh pơm jơ̆ng ‘bang Sư.” Rơih păng pơjing (trong 1) hăm lu kon gah bơhngol đêl juăt hăm inh ngăl? yua kơ tơdrong jang jing jơ̆ng ‘bang noh đei lu bơngai lui kư̆m đei bơngai ngĭl ngŭl kơ ‘bok Pôl. Tơdrong pơma rơđah nhen tơdrong jang ‘bok Pôl jing jơ̆ng ‘bang ‘noh đơ̆ng Kră Yang ăn wă pơma tơpăt tơpă wă kơ lui ngeh kơ Tơdrong ‘Nao ‘Lơ̆ng mă Sư đei bơtho wă kơ gơh bơtho ăn kơ lu bơngai đei pơma chrih đơ̆ng rŏng kơ noh mă Sư athei roi ăn kơ lu bơngai jing kon gah bơhngol mă kư̆m đei đe bơtho Tơdrong ‘Nao ‘Lơ̆ng nai wă pơhlŭ pơlung (Galati 1:6).
Kơplah tơ’bơ̆p hăm tơdrong ưh kơ ngeh, lăm tơdrong bơ̆n gơh jang noh lu bơngai đơ̆ng bơ̆n chông anhăk brŏk tơ Kră Yang,’bok Pôl ưh kơ đei sơ’ngon ưh kơ hiôk, chhur nuih kư̆m ưh kơ hil blĕk pơma, mălei oei hreh gô pơmơ̆ng đĕch. Sư tơchĕng chih kơthơ ăn kơ lu sư wă kơ lu sư băt tơpă tơdrong jang jing jơ̆ng ‘bang păng tơ’blŏk kơ lu sư gah dôm tơdrong kăl mă lu sư đei hơtŭt ‘bơm. Jơ̆ bơngai pơm ‘bă gah bơhngol, sư ưh kơ blĕk klai, sư oei chă đon pơm liơ wă kơ gơh tơiung lu kon gah bơhngol, kơplah lu sư ưh kơ băt tơdrong lôch, ưh kơ băt tơchĕng tơdrong arih gah bơhngol, ưh kơ gơh năm tơ’bơ̆p lu sư, ‘bok Pôl khŏm chih kơthơ wă pơlung lu sư.
Dang ei, lu bơ̆n kư̆m gơh đei tơ’bơ̆p tơdrong truh thoi ‘bok Pôl. Adrol hloh bơ̆n kơdih bơwei đon lui mă kơjăp, ưh kơ druh kiơ̆ lu bơngai bơtho tơdrong ‘nao ‘lơ̆ng hlĭch plơ̆ng, păng athei hŭt tơdrong ‘bônh kơ blĕk klai, wă kơ năm tơ’bơ̆p năm pơlung lu bơngai jing kon gah bơhngol mă oei druh kiơ̆ đe chông anhăk trong glăi, ưh kơ trŏ, tơdah ưh kơ gơh tơ’bơ̆p lei athei chih ăn kơthơ, Email, chih tơbăt lăm Điên thoăi… jet gia, tơ’blŏk. Tơdah gơh, kơdih lu bơ̆n bơngai tơbăt gah dôm tơdrong ưh kơ trŏ, bơtho hơlĕnh mă lu bơ̆n đêl tơ’bơ̆p păng băt tơpă gah tơdrong arih lăm tơdrong lui bơ̆n. Athei đei jơhngơ̆m sơng iŏk mă tơpă wă huay kơ yak năm kiơ̆ trong glăi.
Lu bơ̆n pơm kiơ kơplah iŏk kơthơ đei nơ̆r akhan tơbăt đơ̆ng bơngai chông anhăk gah bơhngol bơ̆n? Lu bơ̆n hăm đei chih kơthơ tơgŭm đon lui đei bu noh ưh?
Ơ Kră Yang, apinh Ih tơgŭm inh đei tơdrong gơh hơgei băt kơnăl lu đe bu gơh bơ̆jang đơ̆ng Ih ăn. Apinh Ih tơgŭm inh hlôh băt păng đei đon mơ̆ng kơplah lu bơngai mă đơ̆ng Ih wơh wă bơtho tơ’blŏk kơ inh. Krao khan yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 10
Kênh Youtube BHKTHN:
