Tơdrong Pơđơ̆k 28:13
“…Mă-lei đei bu tơbral păng achăng lê̆ sư gô đei mơnat.” (Tơdrong Pơđơ̆k 28:13b)
Nơ̆r jet tơchĕng pơwao:
– Tơbral tơpă păng athei pơm tơ’bôh hăm tơdrong kiơ?
– Bơngai tơbral gô iŏk tơdrong kiơ?
– Nơ̆r lăm Tơdrong Pơđơ̆k ‘nâu tơgŭm kơ bơ̆n đei jơhngơ̆m păng pơm tơdrong trŏ hơyơ kơplah pơm yoch?
Pơtao Sôlômôn tơlĕch tơdrong tơm kăl kơplah tơ’bưh hăm tơdrong yoch bơ̆n pơm; ‘noh “’nĕ kơ ôn – athei tơbral bĕ. “Tơbral” pơma kơ tơdrong roi tơbral ưh kơsĭ lăp tơdrong yoch na kư̆m roi tơbral dôm tơmam păng tơdrong jang ‘Bok Kei-Dei, pơma gah tơdrong kơkuh bơnê (Hơriso 89:5). Mă khan thoi ei ră, nơ̆r lăm Tơdrong Pơđơ̆k ‘nâu “tơbral” wă pơma kơ tơdrong tơbral tơdrong yoch bơ̆n kơdih. Wă kơ mơn băt jơhngơ̆m ‘mêm ‘Bok Kei-Dei, bơ̆n athei băt kơdih bơngai ayăt kơ ‘Bok Kei-Dei ‘lơ̆ng rơgoh. Dah pơgơ̆p ‘bar tơdrong đơ̆ng nơ̆r “tơbral” lei wă khan athei hơri păng ưang bĕ kơ ‘Bok Kei-Dei hăm trong chu iŏk minh ‘nu bơngai kăl wă kơ tơdrong mơnat wă kơ gơh klaih đơ̆ng tơdrong yoch”. Tơdrong ‘nâu kăl kơ đei ‘bar tơdrong đơ̆ng bơngai tơbral: Mă mônh, ưang gah tơdrong tih tin ‘Bok Kei-Dei yua kơ đe ưh kơ gơh ôn tơdrong yoch hăm Kră Yang: Ưang gah tơdrong tơpăt ‘Bok Kei-Dei yua kơ Sư gơh păng phak lu bơngai pơm yoch; păng ưang gah tơdrong ‘mêm mơnat đơ̆ng ‘Bok Kei-Dei yua kơ Sư mơnat păng pơklaih. Mă ‘bar, băt kơdih yoch ayăt kơ ‘Bok Kei-Dei.
Tơbral yoch gơh sơng iŏk hăm tơdrong “achăng lê̆”. Nơ̆r ‘nâu tơbăt tơdrong wei tơ nai, achăng dah mă pơm tơhiong lê̆ minh tơmam kiơ nai. Kơlih kơ thoi noh “tơbral yoch” ưh kơsĭ wă kơ bơ̆n băt tơdrong yoch bơ̆n đĕch ôh, na kư̆m minh tơdrong wă pơm hloi, đơ̆ng tơdrong Kră Yang ‘mêm mơnat, wă weh ataih păng ưh pă pơm dơ̆ng tơdrong yoch bơ̆n. Thoi noh, tơbral trŏ tơ’bôh hăm tơdrong hơri ưang kơ ‘Bok Kei-Dei hăm trong băt tơdrong yoch păng tŭk lê̆ dôm tơdrong noh (Mathiơ 3:8; Tơdrong jang 26:20). Lơ bơngai dang ei băt păng hmach dêh gah tơdrong yoch mălei ưh kơ kĕ achăng lê̆!
Dah ưh tơdrong yoch gô ưh kơ đei pŭn lei na tơplơ̆ dơ̆ng tơdrong tơbral yoch păng achăng lê̆ “gô đei mơnat” nơ̆r tơm sư noh “tơpu kon”. Rup tơdrong ‘mêm đơ̆ng bơngai mĕ ‘mêm kơ kon hơ’lơ̆p. Nơ̆r ‘nâu ling lang yua pơgơ̆p hăm tơdrong ‘mêm mơnat ăn đơ̆ng kơpal truh tơ ala, mĕ ‘bă truh kơ kon hơ’lơ̆p. Bơngai kĕ jei truh bơngai thuơ răm, bơngai đei tôm tơmam truh bơngai hiong tơmam (I Yôhan 1:8-9; Hơriso 32:1-2, 19-11).
Jing kon Kră Yang, athei ling lang ‘blŏk dah bơ̆n ôn tơdrong yoch bơ̆n lei na ‘Bok Kei-Dei gô tơbăt, mălei dah bơ̆n tơbral tơdrong yoch păng achăng lê̆ na ‘Bok Kei-Dei gô “ôn” hăm tơdrong mơnat Sư – ‘Bok Kei-Dei gô mơnat kơplah bơ̆n băt tơdrong yoch bơ̆n kơdih, tơbral, achăng lê̆ păng Sư gô hơmet ming tơdrong arih bơ̆n.
Kơkuh kơ Ih Kră Yang, apinh Ih mơnat dôm yoch inh đei pơm hăm Ih. Apinh Ih ăn kơ inh băt hli kơ tơdrong yoch, tơbral păng achăng lê̆. Apinh Ih tơgŭm kơ inh ling lang băt ‘blŏk thoi âu yua kơ Ih ‘lơ̆ng rơgoh thoi noh inh kư̆m kăl kơ arih ‘lơ̆ng rơgoh. Krao khan yua anăn Kră Yang Yêsu Krist, Amen!
Kơplah tơbral yoch, bơ̆n hăm wă achăng lê̆ tơdrong yoch noh ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Yôhan 2
Kênh Youtube BHKTHN:
