Tơdrong Pơđơ̆k 28:14a
“Bơngai bu băt hli yom kơ Kră Yang gô đei pŭn hiôk…” (Tơdrong Pơđơ̆k 28:14a)
Nơ̆r jet tơchĕng pơwao:
– Tơdrong kiơ ba tơdrong pŭn hiôk kơ minh ‘nu bơngai?
– Nơ̆r krao ‘nâu đei yua kiơ?
– Bơ̆n yua iŏk nơ̆r lăm Tơdrong Pơđơ̆k ‘nâu kơ bơ̆n thoi yơ?
Đang kơ bơtho kăl kơ đei đơ̆ng rŏng kơ pơm yoch (Tơdrong Pơđơ̆k 28:13). Pơtao Sôlômôn bơtho dơ̆ng kơ kon sư gah tơdrong arih wei bơ̆n kơdih wă huay kơ pơm yoch păng đơ̆ng tơdrong noh wă kơ Kră Yang ăn tơdrong pŭn hiôk. Pơtao khan wă kơ mơn đei tơdrong pŭn hiôk lăm tơdrong arih, minh ‘nu bơngai kăl kơ “hli yom ling lang.” “Hli yom” wă khan hli tơtơ̆, jing tơtơ̆, dah mă hli tơrơ. Păng gĭt găl hloh noh tơdrong tơtơ̆ ‘nâu ưh kơsĭ lăp ‘bơ̆t jơ hơyơ ‘nei đĕch ôh na athei hli ling lang lăm tơdrong arih bơ̆n.
Kiơ kơ trong 13 păng trong 14b, nơ̆r bơtho lăm âu noh “hli yom” ‘bơ̆t tơdrong ‘lơ̆ng rơgoh, dah “hli yom” ‘bơ̆t kon bơngai kơnê̆ bơ̆n, jơ̆ minh ‘nu bơngai đêl mơn đei oei jê̆ Kră Yang, ling lang ‘maih pơm kơ Kră Yang lăp đon, đơ̆ng ‘bônh kơ băt hăm tơdrong yoch. ‘Nâu bơih tơdrong mă ‘bok Pôl đei mơn kơplah sư ôr krao lăm tơdrong pơmat. “Tơdrong pơm ‘lơ̆ng, inh tôch adrin adran ră boih, oei ưh kơ kĕ ‘mơ̆i, chu pơm yoch hơnơ̆ng… Na inh âu boih bơngai ưh kơ yua tơpă, tơdrong kơnê̆ ‘bĕnh kơ akâu ling lang, na inh wă lôch đĕch boih. Dang ei bu gơh dŏng inh âu?” (Rôm 7:21, 24). ‘Nâu kư̆m tơdrong hlôi mơn đơ̆ng bơngai chih ‘bai hơri Ơ Kră Yang, Tơ’ngla inh kăl kơ wă ling lang, “Ơ Kră Yang, Tơ’ngla inh kăl wă ling lang, kơplah chơt hiôk dah sơ’ngon. Chăl arih inh dah ataih đơ̆ng Kră Yang, hiong răm, kư̆ kă”. Lu bơngai lui mă đei tôm tơmam lăm teh đak khan thoi âu: “oei tơ lăm hnam akŭm rai đunh dang yơ rai ‘bôh bơ̆n ‘lơ̆ng hloh kơ bơngai nai,” mălei minh ‘nu bơngai lui gah bơhngol bô băt hơđăl minh tơdrong: “Oei jê̆ Kră Yang dang yơ rai ‘bônh băt tơdrong yoch, rai ‘bôh bơ̆n kơdih kơnê̆.”
Pơthim lăm noh dơ̆ng, “ling lang hli” kư̆m wă pơma kơ minh ‘nu bơngai kơplah oei lăm Kră Yang pơgơ̆r, lei na nơ̆r lăm Tơdrong Pơđơ̆k ‘nâu bơtho ling lang ‘blŏk kơ tơdrong Kră Yang oei hơdai pơgơ̆r rim jơ phŭt lăm tơdrong arih rim năr. Kơplah ‘blŏk kơ Kră Yang, bơ̆n gô wei tơdrong ‘lơ̆ng rơgoh lăm tơdrong arih păng ưh kơ pơm yoch hăm Kră Yang, păng dah ‘blŏk kơ Kră Yang, bơ̆n kư̆m gơh pơm hloi tơdrong arih băt ‘mêm, mơnat. Lăm tơdrong pơtih gia gah bơngai đĭch đam ưh kơ băt mơnat (Mathiơ 18:23-25), bơngai đĭch đam noh ưh kơ băt mơnat kơ buăl sư mă hre kơ sư yua kơ sư ưh kơ ‘blŏk kơ yŏng tơ’ngla đei mơnat ăn kơ sư mă đêl hre kơ yŏng tơ’ngla sư. Rim wơ̆t bơ̆n ‘maih blĕk hil kơ bơngai bu nai, dah bơ̆n arih oei lăm Kră Yang ‘Bok Kei-Dei pơgơ̆r, ‘blŏk kơ Kră Yang đei chu lôch tơ ‘long pơglang yua kơ bơ̆n lei na rŏ lăng bơ̆n kư̆m gơh mơnat ăn kơ lu ‘nhŏng mai oh bơ̆n păng đơ̆ng tơdrong thoi noh na ưh kơ đei pơm yoch kơ Kră Yang.
Pơtao Đawit đei chih: “Inh ‘măn Kră Yang ling lang ‘bơ̆t anăp inh; Inh ưh kơ đei hli kiơ, yua kơ Sư oei gah ‘ma kơ inh.” (Hơriso 16:8). Dah bơ̆n hli yom dơ̆ng ‘bơ̆t anăp Kră Yang, bơ̆n gô pơ’lơ̆ng gah tơdrong arih bơ̆n, arih pơm tơdrong ‘mêm, mơnat kơplah noh gô ưh kơ đei tơdrong kiơ gơh pơm kơ bơ̆n tơlơ̆ dơ̆ng.
Kơkuh kơ Ih Kră Yang, inh bơnê kơ Ih yua kơ Ih tuh pham wă dŏng inh jing kon Ih. Apinh ăn kơ inh băt gĭt kăl kơ tơdrong arih ‘nao mă Ih ăn kơ inh ling lang, “đei jơhngơ̆m hli yom jing pơm tơdrong dŏng pơklaih inh”. Krao khan yua anăn Kră Yang Yêsu Krist, Amen!
Bơ̆n hăm đei tơdra mơn pŭn hiôk kơplah arih băt ‘mêm, mơnat ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Yôhan 3
Kênh Youtube BHKTHN:
