Klei Aê Diê Blŭ: Klei Mtô Mñă Klei Bhiăn 28:30-45
Êlan kliăng: “Jih jang klei tăm pah anei srăng truh kơ diih tiŏ diih leh anăn hmao diih, tơl diih rai tuč, kyuadah diih amâo gưt asăp Yêhôwa Aê Diê diih ôh, čiăng djă pioh klei Ñu mtă leh anăn klei bhiăn Ñu brei leh kơ diih.” (Klei Mtô Mñă Klei Bhiăn 28:45)
Klei êmuh ksiêm mĭn: Trăn Klei Aê Diê Blŭ anei brei ƀuh klei tăm pah hmăi kơ ya mta bruă? Ya ngă phung ƀuôn sang Khua Yang tŭ klei tăm pah snăn? Si ngă čiăng drei thâo klei soh pô čiăng kmhal bi mlih?
Trăn Klei Aê Diê Blŭ anei lač kơ sa pŏk rup bŏ hŏng rŭng răng mơ̆ng phung hdĭp măk ƀai leh anăn amâo gưt asăp Aê Diê. Anei jing klei tăm pah hlăm klei hdĭp grăp čô, leh anăn klei tăm pah kơ djuê ana amâo gưt asăp. Êdah êdi jing phung tăm pah srăng luč klei dưi dưn boh mnga mơ̆ng ai tiê pô mă bruă (êlan 30-33); bi luč klei hrăm mbĭt leh anăn klei jăk mơak mơ̆ng klei hdĭp gŏ sang kyua ung mô̆ bi ktlah leh anăn phung hlăm sang hdĭp msĕ si phung tue êgar (êlan 30, 32, 41); leh anăn knhal tuč bi luč klei êđăp ênang, ai tiê toh hroh kyua phung roh ngă jhat leh anăn juă lin (êlan 33-34). Klei truh jhat mơ̆ng klei tăm pah anei brei ƀuh klei tăm pah srăng tui tiŏ hlăm klei hdĭp phung ƀuôn sang Israel hlăm djăp anôk, hlăm djăp mmông leh anăn hmăi kơ djăp mta bruă hlăm klei hdĭp. Êlan 45 lŏ mñă mta phŭn phung ƀuôn sang Aê Diê tŭ klei tăm pah anei, “kyuadah diih amâo gưt asăp Yêhôwa Aê Diê diih ôh, čiăng djă pioh klei ñu mtă leh anăn klei bhiăn ñu brei leh kơ diih”
Aê Diê jing Pô hrih jih jang mnơ̆ng, jing Khua kiă kriê jih jang mnơ̆ng. Ñu mâo klei dưi yua anak mnuih, ala čar, yan adiê, klei ruă čiăng bi kmhal phung ƀuôn sang Ñu. Dưi lač, klei Aê Diê tăm pah dưi čih hlăm hdruôm hră mtô mñă klei bhiăn amâo djŏ kyua Ñu bi êmut kơ phung ƀuôn sang Ñu ôh, ƀiădah anăn jing boh mơ̆ng sa klei hdĭp, sa gŏ sang, sa djuê ana thâo Aê Diê ƀiădah amâo gưt asăp, amâo djă pioh klei Ñu mtă leh anăn klei bhiăn Ñu, amâo klă sĭt mpŭ Aê Diê jing Khua kơ klei hdĭp pô. Mơ̆ng anăn dưi ƀuh, sa klei hdĭp amâo mâo Aê Diê, bi kruh klei bi mguôp hŏng Aê Diê srăng lă lar amâo ƀuh ôh klei êđăp ênang, klei jăk mơak klă sĭt kơ klei hdĭp. Klei anei mñă grăp čô anak Aê Diê amâo dưi dlăng hơăi mang ôh klei bi kmhal ƀiădah anăn jing klei găl lŏ dlăng wĭt klei hdĭp, kmhal klei soh hŏng Aê Diê.
Klei tăm pah amâo djŏ knŏng jing klei bi kmhal mơ̆ng Pô kpă ênô, Doh jăk ôh ƀiădah lŏ jing asăp blŭ ktang mơ̆ng Pô bŏ hŏng klei khăp ăt adôk ktuê dlăng klei hdĭp grăp čô ƀuôn sang Ñu. Aê Diê yua nanao lu hdră čiăng đru drei thâo klei soh pô, thâo mâo sa Pô Bi Mtlaih yua nanao djăp klei găl čiăng mñă kơ drei thâo ƀuh wĭt hŏng Pô kiă kriê jih lăn ala êngĭt adiê.
Drei dôk mđing hmư̆ asăp Khua Yang leh anăn thâo ƀuh klei soh hlăm klei hdĭp pô brei kmhal bi mlih mơ̆?
Wah lač: Ơ Khua Yang, akâo kơ Ih đru kâo thâo mđing hmư̆ asăp Ih, kmhal klei soh čiăng wĭt huĭ mpŭ leh anăn mpŭ Ih klă sĭt jing Khua kơ klei hdĭp kâo. Akâo kơ Ih đru kâo thâo kơ klei khăp leh anăn klei pap Ih, gưt nanao asăp Ih leh anăn djă pioh klei bhiăn Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Yap 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
