II Kevcai 28:30-45
Nqe cim:
“Tej kev siv kev npog no yuav los raug nej, mus txog thaum nej puastsuaj tas, rau qhov nej tsis mloog tus Tswv uas yog nej tus Vajtswv lus, thiab tsis ua raws li tej kevcai uas tus Tswv qhia rau nej.” (II Kevcai 28:45).
Lus nug rau sawvdaws xav:
– Ntu Vajluskub no qhia paub tej lus foom ua raug cov seem twg?
– Vim li cas tus Tswv haivneeg raug foom tsis zoo li ntawd?
– Yuav ua li cas peb thiaj zeem paub yus qhov txhaum kom paub tig los lees txim?
Ntu Vajluskub no hais txog ib tug duab nyob nyuaj siab ntsuav ntawm tus neeg phem thiab tsis ua raws li tus Tswv tej lus cog tseg. Nov yog tej lus foom tsis zoo rau tus kheej kev ua neej, txuas ntxiv tej lus foom yog raug tagnrho haivneeg uas tsis ua li tej lus cog tseg. Qhov tseemceeb yog tus neeg raug foom tsis zoo poob kev tau txais ntawm nws txhais tes ua tau (nqe 30-33); poob txojkev sib raug zoo, poob tej koob hmoov hauv lub neej txij nkawm thiab tsevneeg ib leeg saib ib leeg zoo li tus qhua (nqe 30, 32, 41); thiab thaum kawg yog poob txojkev kaj siab, qaug zog vim raug yeebncuab tsimtxom thiab saib tsis taus (nqe 33-34). Qhov kev tu siab ntawm tej lus foom no qhia paub txojkev foom tsis zoo nyob nrog nraim cov Yixalayees kev ua neej mus txhua qhov chaw, txhua lub sijhawm thiab ua hiam lawv txojkev ua neej. Nqe 45 hais txog qhov vimchij uas tus Tswv haivneeg raug foom tsis zoo, “rau qhov nej tsis mloog tus Tswv uas yog nej tus Vajtswv lus, thiab tsis ua raws li tej kevcai uas tus Tswv qhia rau nej.”
Vajtswv yog tus uas tsim ntuj tsim teb, yog tus Tswv kav ib puas tsav yam. Nws muaj hwjchim siv tibneeg, tebchaws, huab cua, mob nkeeg los rau txim rau Nws haivneeg. Hais tau tias, Vajtswv tej lus foom tsis zoo uas muab sau hauv Nws phau Kevcai tsis yog vim Nws ntxub Nws haivneeg, tiamsis yog nqi zog ntawm ib lub neej, ib tsevneeg, ib haivneeg paub tus Tswv tiamsis tsis mloog tus Tswv lus, tsis ua raws li Nws tej kevcai, tsis muab tus Tswv ua tus thawj kav lawv. Yog li peb pom tias, lub neej uas tsis nyob hauv tus Tswv, rhuav tus Tswv tej lus cog tseg yuav tsis muaj kev kaj siab, tsis tau koob hmoov li. Qhov no qhia rau tus Tswv cov menyuam paub tias thaum Nws raug txim yog lub zoo sijhawm tig rov los saib kev ua neej, lees txim rau tus Tswv.
Tej lus foom tsis zoo tsis yog kev rau txim ncaj ncees, dawbhuv xwb, tiamsis tseem yog tus Tswv uas muaj kev hlub lub suab hu tseem saib ntsoov Nws cov menyuam kev ua neej. Tus Tswv siv ntau lub tswvyim los pab kom peb zeem paub yus qhov yuam kev, zeem muaj ib tug Cawmseej niaj hnub cia sijhawm ntuas kom peb tig rov los cuag tus Tswv uas kav lub ntuj lub ntiajteb.
Thov Vajtswv,
Tus Tswv, thov Koj qhia kom nyuam yaus paub mloog Koj lus, lees txim tig rov los ua li Koj hais thiab cia tus Tswv kav nyuam yaus lub neej. Thov Koj pub kom nyuam yaus tau txais Koj txojkev hlub, mloog Koj lus thiab ua raws li Koj tej kevcai. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Peb puas tabtom mloog tus Tswv hais thiab zeem paub yus qhov yuam kev, lees txim hloov tshiab?
Nyeem Vajluskub hauv peb lub xyoo: Teev Npe 18
Kênh Youtube BHKTHN:
