Klei Aê Diê Blŭ: Klei Yap 21:4-9
Êlan kliăng: “Msĕ si Y-Môis yơr ala kông ti dlông hlăm kdrăn tač, msĕ snăn mơh arăng srăng yơr Anak Mnuih ti dlông, čiăng kơ hlei pô đăo kơ Ñu dưi mâo klei hdĭp hlŏng lar.” (Y-Yôhan 3:14-15)
Klei êmuh ksiêm mĭn: Ya ngă phung ƀuôn sang Israel tŭ klei Khua Yang bi kmhal? Si mblang kơ klei Y-Môis ngă sa drei ala hŏng kông? Ya klei drei hriăm kơ dua knuih Aê Diê, mơ̆ng klei yăl dliê kơ ala kông?
Phung ƀuôn sang Israel hlăk dôk hlăm gưl knhal tuč ktuê êlan wĭt kơ Lăn Čar Aê Diê Ƀuăn. Leh dưi bi blah hŏng mtao Arat, diñu đuĕ nao mơ̆ng čư̆ Hor hlue êlan Êa Ksĭ Hrah dar ala čar Êđôm. Ti krah êlan, diñu bi êdah klei bi kdơ̆ng kyua kƀah êa mnăm leh anăn mhao kơ ƀêñ čar Êjip. Wăt tơdah Khua Yang ăt thiê brei mana mơ̆ng adiê kơ diñu, ƀiădah diñu lač “hmei bi êmut kơ mnơ̆ng ƀơ̆ng huă hơăi mang anei.” (êlan 5). Jing sa klei blŭ amâo thâo hdơr knga êdi yơh! Phung gưl ênuk tal dua anei tơdah tuôm hŏng klei dleh dlan ăt blŭ dŭñ dŭñ amâo mdê hĭn hŏng phung gưl êlâo ôh. Diñu knŏng ƀuh klei amâo mơak ti anăp ƀiădah amâo ƀuh ôh hlăm pă pluh thŭn êgao, klei khăp leh anăn klei myang prŏng prĭn, Aê Diê čiêm rông diñu hlăm brô dua êklai čô mnuih hlăm kdrăn tač, amâo mâo sa hruê ư̆ êpa ôh! Hĭn mơh, Khua Yang lač hŏng diñu: “‘Kâo atăt diih leh êjai pă pluh thŭn hlăm kdrăn tač; čhiăm ao diih hơô amâo tuôm sô tĭ ôh, leh anăn klĭt juă diih čŭt amâo tuôm lhuih hĕ ôh.” (Klei Mtô Mñă Klei Bhiăn 29:5), sa klei răng kriê yuôm bhăn êdimima!
Hŏng knuih jing kpă ênô, Aê Diê bi kmhal klei bi kdơ̆ng, klei amâo thâo hdơr knga phung ƀuôn sang ngă, hŏng klei Ñu mơĭt ala pui, jing djuê ala yuôm, bi ruă knap leh anăn čoh bi mdjiê lu mnuih. Hlăk anăn kơh, phung ƀuôn sang tŭ klei soh diñu ngă hŏng Aê Diê leh anăn akâo kơ Y-Môis wah lač brei kơ diñu. Aê Diê amâo bi rai ala pui ôh, biădah hlăm klei Ñu pap, Ñu brei Y-Môis ngă sa drei ala kông leh anăn kƀăk gơ̆ ti dlông giê ênơr, grăp čô hlei pô ala čoh, tơdah hŏng klei đăo dlăng kơ ala kông ñu srăng dưi hlao.
Ala kông amâo djŏ jing rup yang pioh kơ diñu kkuh mpŭ ôh, msĕ si kơ êdei phung ƀuôn sang Israel ngă leh (II Bruă Mtao 18:4). Tơdah blŭ hrăm hŏng Y-Nikôđem, sa čô nai mtô phung Israel, Khua Yang Yêsu bi mguôp klei yăl dliê kơ ala kông kƀăk ti dlông giê ênơr hŏng klei Ñu srăng tŭ klei arăng pơ̆ng ti kyâo bi kal (Y-Yôhan 3:14-15). Mnuih ala čoh, knŏng hŏng klei đăo dlăng kơ ala kông ñu srăng hlao. Msĕ snăn mơh, mnuih soh năng kơ klei djiê, amâo djŏ knang kơ klei jăk kpă ñu pô ôh, ƀiădah knŏng hŏng klei ñu đăo kơ Khua Yang Yêsu tŭ klei arăng pơ̆ng ti kyâo bi kal, djiê hrô brei kơ klei soh ñu srăng mâo klei pap brei klei soh leh anăn dưi dưn klei hdĭp hlŏng lar (Êphêsô 2:8-9; II Kôrantô 5:21).
Klei yăl dliê kơ ala kông bi êdah dua knuih Aê Diê jing. Ñu jing Pô Kpă ênô, snăn hlei pô ngă soh srăng tŭ klei bi kmhal (Y-Êsêkiêl 18:20). Tĭng nah mkăn, Ñu jing Pô bŏ hŏng klei khăp, tơdah mnuih soh kmhal sĭt, lui êlan jhat ƀai ñu srăng dưi mâo klei bi mtlaih kluôm dhuôm (Y-Yêrêmi 31:34b). Hriăm thâo săng knuih Khua Yang jing, đru drei dôk hdĭp kpă ênô leh anăn thâo bi khăp hdơ̆ng pô hlăm klei hdĭp.
Si ngă drei dôk hdĭp kpă ênô leh anăn thâo bi khăp hdơ̆ng pô tui si Klei Aê Diê Blŭ mơ̆?
Wah lač: Ơ Aê Diê jing Pô bŏ hŏng klei khăp, akâo Ih mñă kơ kâo snei, Ih ăt jing Pô Kpă ênô mơh, Pô amâo dưi tŭ ôh klei soh. Brei klei kâo mĭn, blŭ, ngă klei bi mơak kơ Khua Yang nanao, leh anăn dôk hdĭp thâo bi khăp hdơ̆ng pô. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
