Jô̆ Bơngai 21:4-9
“Na tơ char glă sơ̆ ki sơ̆ kach Môis pơm minh dăng ‘bih păng mam kong, sư tơ’băk ‘bih ei kơpal ‘long wă kơ đe lăng ‘bih ei na huay kơ lôch đơ̆ng ‘bih choh. Kư̆m thoi noh mơ̆n đe gô atŏk Inh Kon Bơngai tơ ‘long pơglang tơpă ning-mônh. Thoi noh mơ̆n na bơngai bu lui kơ Sư, bơngai ‘noh sư gô iung arih oei hơdai hăm ‘Bok Kei-Dei ling lang.” (Yôhan 3:14-15)
Nơ̆r jet tơchĕng pơwao:
– Yua kơ kiơ Kră Yang phak kon pơlei Israel?
– Tơdrong jang ‘bok Môis pơm ‘bih păng kong wă khan kiơ?
– Lu bơ̆n pơhrăm wă kơ băt ‘bar tơdrong kiơ lăm ‘Bok Kei-Dei đơ̆ng tơdrong hơ’mon ‘bih pơm păng kong?
Kon pơlei Israel oei năm rok trong yak wă jê̆ truh tơ dêh mă Kră Yang pơkă, đơ̆ng rŏng kơ kĕ jei đơ̆ng pơtao Arat, lu sư năm đơ̆ng kông Hôr năm gah đak dơsĭ ‘brê wer dăr kơ char Êđôm. Tơ rok trong, lu sư ơh klai pă kĕ ĕnh yua ưh kơ đei đak nhă păng ‘maih ‘bĕng đơ̆ng dêh Êgiptơ, mă khan Kră Yang tam mă ăn ‘bĕng mana đơ̆ng plĕnh kơ lu sư “ lu nhôn đĭ bơ̆l boih kơ sa tơmam sa tơdrong kơ đei lâu.” (trong 5). Tơpă nơ̆r pơm ưh kơ băt bơnê! Jơhnơr đơ̆ng ‘nâu kơplah tơ’bơ̆p tơdrong anat kư̆m tơtok tơtăm ưh phara kiơ jơhnơr adrol, lu ‘bôh minh tơdrong tam mă keh jing đĕch mă ưh kơ ‘bôh kơplah lăm puăn jĭt sơnăm, hăm tơdrong ‘mêm mơnat hăm tơdrong mơsêh mơyang tih tin, Kră Yang ‘Bok Kei-Dei wei rong dang ‘bar triê̆u ‘nu bơngai lăm char glă, ưh kơ đei minh năr ayơ pơngot! Hloh kơ noh dơ̆ng, Kră Yang khan: “ Inh chông lu iĕm puăn-jĭt sơnăm boih lăm char glă ao lu iĕm ưh kơ so hiah, chơkhŏ lu iĕm ‘bot tơ jơ̆ng ưh kơ huach luih.” (Bơtho Khôi Juăt 29:5) trŏ tơpă tơdrong wei lăng hlĭch chrơp.
Lăm tơdrong ‘lơ̆ng tơpăt ‘Bok Kei-Dei sek tơlang tơdrong pơma plơ̆, ưh kơ băt bơnê đơ̆ng kon pơlei hăm tơdrong ăn ‘bih tang, noh bơih ‘bih hơkăm, pơm kơ jĭ dêh păng kăp jing lôch, kơplah noh, kon pơlei gơh băt kơdih yoch glăI hơtŭt ‘bơm hăm Kră Yang păng yua kơ đơ̆ng ‘bok Môis krao khan tang, Kră Yang ưh kơ pơrăm ‘bih choh hơkăm, mă-lei hăm tơdrong mơnat đĕch, Sư pơkă khan kơ ‘bok Môis pơm minh dăng rup ‘bih tang tơ’băk tơ tơ̆r ‘long gơgiĕr, tơdah bơngai bu ‘bih choh sư, hăm đon lui athei lăng tơ ‘bih noh na gơh arih.
‘Bih pơm păng mam kong ưh kơsĭ wă kơ kơkuh nhen thoi đơ̆ng kơ noh kon pơlei Israel đei pơm (II Lu Pơtao 18:4), kơplah pơma dơnuh hăm Nicôđem, minh ‘nu bơngai bơtho khôi juăt đe Juđê. Kră Yang Yêsu hơ’mon gah ‘bih pơm păng mam kong tơ’băk tơ tơ̆r ‘long gơgiĕr, na gơh klaih, kư̆m thoi noh, kon bơngai yoch bơih trŏ kơ wă hiong răm, ưh kơ gơnang kơ tơdrong kơdih adrin pơm ‘lơ̆ng mă-lei yua kơ đon lui gơnang kơ Kră Yang Yêsu chu lôch tơ ‘long pơglang, lôch tang tơdrong yoch bơ̆n na gơh mơnat ăn păng gơh đei tơdrong arih ling lang (Êphêsô 2:8,9; II Kôrintô 5:21)
Tơdrong hơ’mon ‘bih tang păng kong wă tơ’bôh ‘bar tơdrong lăm ‘Bok Kei-Dei, Sư ‘bơih Tơ’ngla ‘lơ̆ng tơpăt, dah bơngai bu pơm yoch bơngai noh kơdih su gô pŭ iŏk tơdrong phak (Êsêkiên 18: 20). ‘nguaih kơ noh dơ̆ng, Sư bơih Tơ’ngla ‘mêm mơnat, bơngai yoch băt tơbral, achăng tŭk tơdrong yoch na gơh mơnat ăn tôm tơdrong (Jêrêmi 31:24b). pơhrăm wă kơ hlôh băt gah Kră Yang tơgŭm lu bơ̆n arih ‘lơ̆ng tơpăt păng ‘mêm mơnat băl lăm chăl arih.
Kơkuh kơ Ih ơ Kră Yang, Ih bơih Tơ’ngla mă ‘bĕnh tơdrong ‘mêm mơnat, apĭnh Ih tơ’blŏk kơ inh Ih bơih Tơ’ngla ‘lơ̆ng tơpăt, ưh kơ lăp kơ tơdrong yoch, apĭnh ăn kơ inh băt tơchĕng, pơma pơm dôm tơdrong mă Kră Yang lăp đon păng arih ‘mêm mơnat băl, krao khan yua anăn Kră Yang Yêsu Krist. Amen.
Lu bơ̆n hăm arih ‘lơ̆ng tơpăt kiơ̆ thoi Nơ̆r Kră Yang păng ‘mêm mơnat dih băl?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Tơdrong Jang Jơ̆ng ‘Bang 23
Kênh Youtube BHKTHN:
