Klei Aê Diê Blŭ: Y-Yêrêmi 29:4-14
Êlan kliăng: “Leh anăn wah lač kơ Yêhôwa đru anôk anăn, kyuadah tơdah anôk anăn mâo klei jăk, diih srăng mâo klei jăk msĕ mơh” (Y-Yêrêmi 29:7b)
Klei êmuh ksiêm mĭn: Ya klei Khua pô hưn êlâo Y-Yêrêmi hưn kơ phung ƀuôn sang Israel klei Khua Yang mtă brei diñu ngă? Si ngă brei diñu wah lač brei kơ lăn čar mă diñu jing mnă mâo klei đĭ kyar? Si brei drei dôk dơ̆ng ƀơ̆ng huă leh anăn wah lač brei kơ anôk drei dôk hdĭp?
Trăn Klei Aê Diê Blŭ anei jing hră Khua pô hưn êlâo Y-Yêrêmi mơĭt kơ phung Israel arăng mă mđuĕ leh mơ̆ng čar, jing mnă kơ čar Ƀaƀilôn (êlan 4). Ñu hưn Aê Diê iêô mthưr diñu brei mdơ̆ng pưk sang, dôk hlăm sang anăn ngă war djam leh anăn ƀơ̆ng djam gơ̆, dôk mô̆, mă ung kơ phung anak mniê leh anăn lar êngŭm ti čar tue (êlan 5-6). Brei diñu yap čar Ƀaƀilôn jing ƀuôn sang diñu tal dua leh anăn hdĭp mda mă bruă duah ƀơ̆ng msĕ si yang đar, hrô kơ klei dôk ênguôt hnĭng amâodah čang hmăng dưi lŏ wĭt djăl mtam. Brei diñu ăt wah lač brei kơ anôk diñu dôk hdĭp mâo klei jăk đĭ kyar leh anăn mơak ai tiê mă bruă, wăt tơdah êjai dôk jing mnă dưn, kyuadah tơdah anôk anăn mâo klei jăk snăn diñu pô ăt srăng mâo klei jăk msĕ mơh (êlan 7). Klei anei amâo ênưih ngă ôh, ƀiădah klei anăn Khua Yang mtă kơ phung ƀuôn sang Israel brei ngă.
Khua pô hưn êlâo Y-Yêrêmi mtă mtăn mơh kơ phung ƀuôn sang Aê Diê đăm dôk hdĭp hŏng klei čang hmăng hơăi mang ôh, kyua hmư̆ klei phung khua pô hưn êlâo soh, phung mdian, phung mblang klei diñu êpei. Diñu hiu hưn kơ klei ƀuăn srăng lŏ wĭt ưm kơ ƀuôn Yêrusalem. Klei Aê Diê Blŭ mñă kơ diñu đăm mgei ôh kyua mơ̆ng klei čang hmăng soh čhuai msĕ snăn (êlan 8-9). Ñu bi mđĭ ai phung ƀuôn sang Aê Diê dôk hdĭp hlăm klei čang hmăng, đăo knang kơ klei Aê Diê ƀuăn, êdei kơ 70 thŭn jing mnă, Khua Yang srăng lŏ atăt ba diñu wĭt kơ ƀuôn sang diñu pô (êlan 10). Wăt tơdah snăn dưn mơh, phung ƀuôn sang Israel tuôm thâo kral leh klei Aê Diê phat kđi kơ lăn čar diñu, leh anăn êjai dôk hdĭp hlăm boh klei jing phung mnă, diñu ênưih snăk bi mĭn Aê Diê čiăng bi kmhal diñu leh anăn lui hĕ diñu. Ƀiădah hŏng Khua pô hưn êlâo Y-Yêrêmi, Khua Yang rơ̆ng kơ diñu, Ñu mâo hdră tŭ dưn kơ diñu, leh anăn klei mĭn Khua Yang pioh kơ diñu jing klei êđăp ênang. Kyuanăn, brei diñu tui duah Khua Yang hŏng jih ai tiê leh anăn wah lač kơ Ñu (êlan 11-13). Aê Diê dôk tar ƀar anôk, snăn Ñu dôk mđing hmư̆ leh anăn wĭt lač kơ diñu. Klei diñu wah lač leh anăn klei Khua Yang wĭt lač jing sa kdrêč hruê êdei anăp leh anăn klei čang hmăng kơ phung ƀuôn sang Aê Diê. Aê Diê amâo knŏng hơêč hmưi kơ diñu leh anăn dôk mbĭt hŏng diñu ti čar Ƀaƀilôn ôh, ƀiădah ti knhal tuč ăt lŏ brei diñu dưi lŏ wĭt kơ ƀuôn sang diñu pô (êlan 14).
Phung anak ƀuôn sang Aê Diê hruê anei dôk hdĭp ti lăn čar pô leh anăn tar ƀar anôk ti lăn ala mbĭt hŏng lu boh klei găn mdê mdê. Hlăm grăp boh klei găl ênưih amâdah dleh, brei drei ăt tui duah klei Aê Diê čiăng, đăo kjăp kơ klei Aê Diê ƀuăn. Hŏng jih ai tiê wah lač leh anăn wah lač brei kơ lăn čar, kơ anôk drei dôk hdĭp mâo klei êđăp ênang đĭ kyar, čiăng kơ drei ăt mâo klei dưn mbĭt klei tŭ dưn mơ̆ng lăn čar msĕ mơh. Kwưh akâo bĕ hŏng jih ai tiê leh anăn dôk hdĭp tui si Klei Khua Yang mtô, čiăng kơ hŏng klei hdĭp drei Anăn Aê Diê dưi mâo klei mpŭ mni.
Si ngă drei hŏng ai tiê sĭt êmĭt wah lač brei kơ lăn čar anôk drei dôk hdĭp mơ̆?
Wah lač: Ơ Khua Yang, brei kâo hŏng jih ai tiê wah lač brei kơ lăn čar leh anăn kơ anôk kâo dôk hdĭp, čiăng kơ Khua Yang hơêč hmưi. Brei klei hdĭp kâo pô mbĭt hŏng gŏ sang kâo bi guh kơang kơ Anăn Khua Yang nanao, êjai dôk hdĭp ti krah lu mnuih ka thâo kral Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 35
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
