Jêrêmi 29:4-14
“Krao apinh Kră Yang bĕ; yua kơ lu iĕm đei hiôk jơnap ‘noh đơ̆ng pơlei noh hiôk jơnap”(Jêrêmi 29:7b)
Nơ̆r jet tơchĕng pơwao:
– ‘Bok Jêrêmi ‘bok khan lê̆ hơdrol kơ kon pơlei Isơrael băt kơ Kră Yang athei lu sư pơm kiơ?
– Yua kơ kiơ lu sư athei krao apinh tơdrong hiôk jơnap ăn kơ teh đak rôp pơgŏ pơm đĭch đam?
– Bơ̆n thei arih păng krao khan thoi yơ kơ anih mă lu bơ̆n oei?
Sơ̆p Hla ar ‘Bok Kei-Dei âu jơ̆ hla ar Jêrêmi ‘bok khan lê̆ hơdrol chih gơih kơ lu bơngai Isơrael oei tơ dêh char ‘Ba’bylôn (tr.4). Sư tơbăt ăn ‘Bok Kei-Dei krao iŏk lu sư athei pơm hnam,athei pơjing pơlei, chă klo ,chă akăn păng wă kơ thim bơngai rai lơ tơ teh đak tơmoi (tr.5-6). Lu sư athei lăng ‘Babylôn thoi teh đak mă ‘bar lu sư păng arih lăm tơdrong arih hmă đĕch, tơplih kơ ơh sơ’ngon dah wă kơ ‘maih brŏk hrei hrei. Lu sư kư̆m athei krao khan ăn hiôk jơnap kơ anih mă lu sư oei păng adrin bơ̆jang, mă khan oei tơ anih đe puh oei, yua kơ kơplah anih lu sư oei đei hiôk jơnap noh trŏ kơ lu sư kư̆m đei hiôk jơnap (tr.7). Tơdrong âu ưh kơ ‘bônh ôh, mă-lei noh jơ̆ nơ̆r Kră Yang akhan kơ lu bơngai Isơrael.
Jêrêmi ‘bok khan lê̆ hơdrol bơtho lu bơngai Isơrael ‘nĕ kơ arih lăm tơdrong chang hơmĕng kư̆-kă đơ̆ng lu ‘bok khan lê̆ hơdrol hơ lĕnh, lu ‘bok lăng ti păng tơblang tơdrong hơpo. Lu sư roi akhan gah nơ̆r pơkă khan lu sư jah brŏk tơ Jêrusalem. Nơ̆r Kră Yang tơ’blŏk kơ lu sư ‘nĕ kơ đei tơdrong wă pơrŭng đơ̆ng lu tơdrong hơmĕng kư̆-kă glăi răm (tr.8-9). Sư bơtho pơlung kon pơlei Kră Yang arih lăm tơdrong chang hơmĕng, lui gơnang kơ Nơ̆r Kră Yang pơkă, đơ̆ng rŏng kơ 70 sơnăm đe puh jăk, Kră Yang ba lu sư wih brŏk tơ pơlei lu sư kơdih (tr.10). Mă khan thoi ei,kon pơlei Isơrael đêl mơn đei Kră Yang sek tơlang lu sư păng lăm jơhngơ̆m lu bơngai oei tơ teh đak đe puh oei, lu sư ‘bônh kơ tơchĕng khan Kră Yang wă phak lu sư păng achăng lê̆ lu sư. Mă-lei đơ̆ng Jêrêmi ‘bok khan lê̆ hơdrol, Kră Yang pơma pơsĭt hăm lu sư khan Sư đei tơchĕng ăn tơdrong đei yua kơ lu sư, păng tơdrong tơchĕng Sư noh wă ăn kơ lu sư hiôk-hian rơnuk rơnua. Yua thoi noh, lu sư kăl kơ chă Kră Yang mă đĭ jơhngơ̆m păng krao khan hăm Sư (tr.11-13). Kră Yang ‘Bok Kei-Dei oei jơ̆p nih na Sư ling-lang mơ̆ng nơ̆r păng tơl tơwih. Nơ̆r lu sư krao khan păng nơ̆r Kră Yang tơl tơwih jơ̆ tơdrong chang hơmĕng lăm kon pơlei Kră Yang tơ anăp. Kră Yang ‘Bok Kei-Dei ưh kơ sĭ ăn pŭn hiôk păng oei hơdai lu sư tơ ‘Babylôn đĕch, mă lei đơ̆ng kơ noh ăn kơ lu sư wih brŏk tơ pơlei lu sư kơdih (tr.14).
Kon pơlei Kră Yang dang ei oei tơ teh đak bơ̆n kơdih păng jơ̆p kơ dêh char hăm tơdrong đei truh pha ra pha. Lăm rim tơdrong truh đei yua dah hơnat hơnot, lu bơ̆n athei chơchă wă kơ băt kiơ̆ thoi Kră Yang wă. Lui gơnang kơ Nơ̆r Kră Yang pơkă. Athei đĭ jơhngơ̆m krao khan păng krao khan kơ teh đak, păng ăn kơ kon pơlei pơla mă anih lu bơ̆n oei gơh hiôk hian păng hiôk jơnap wă kơ lu bơ̆n gơh đei yua iŏk lơi yua đơ̆ng teh đak. Athei đĭ jơhngơ̆m krao apinh păng arih pơm kiơ̆ Nơ̆r Kră Yang bơtho wă kơ đơ̆ng chăl arih lu bơ̆n wă kơ anăn Kră Yang gơh ư-ang.
Ơ Kră Yang, apinh tơgŭm inh đĭ jơhngơ̆m krao khan kơ teh đak pang lăm pơlei pơla mă inh arih wă kơ Kră Yang đei ăn pŭn hiôk. Apinh ăn kơ chăl arih inh păng hnam dơnŏ inh ling-lang ư-ang anăn Kră Yang tŏk bŏk lơ bơngai tam mă băt kơ Ih.Yua anăn Kră Yang Yêsu Krist, Amen.
Lu bơ̆n hăm đei jơhngơ̆m krao khan kơ teh đak mă bơ̆n arih ưh?
Đŏk Sơ̆p Hla ar ‘Bok Kei-Dei lăm pêng sơnăm: II Hơ’mon 35
Kênh Youtube BHKTHN:
