Yelemis 29:4-14
Nqe cim:
“Nej cia li thov kuv pab tej nroog ntawd, yog tej nroog ntawd vammeej ces nej yuav vammeej” (Yelemis 29:7b)
“Thov Yawmsaub pab lub nroog ntawd rau qhov yog lub nroog ntawd noj qab nyob zoo nej kuj yuav tau kev noj qab nyob zoo thiab” (HMOWSV)
Lus nug rau sawvdaws xav:
– Tus Cevlus Yelemis qhia rau cov Yixalayees paub, Vajtswv hais kom lawv ua dabtsi?
– Vim li cas lawv yuav tsum thov kev vammeej rau lub tebchaws uas ntes yus los ua qhev?
– Peb yuav tsum ua neej thiab thov Vajtswv li cas rau qhov chaw uas peb tabtom nyob?
Ntu Vajluskub no yog tsab ntawv uas tus Cevlus Yelemis xa mus rau cov Yixalayees uas tabtom ua cev qhev nyob hauv Npanpiloos (nqe 4). Yelemis qhia lawv paub Vajswv nqua hu lawv yeejmeem ua vajtsev, nyob muaj chaw, yuav pojniam, yuav txiv thiab kom huamvam hauv lwm haivneeg lub tebchaws (nqe 5-6). Tsimnyog saib Npanpiloos yog lawv lub tebchaws tim ob thiab ua neej li ibtxwm ua, tsis txhob nyuaj siab lossis xav kom tau rov qab los kiag rau yus lub qub tebchaws. Txawm yog tabtom raug ua cev qhev los lawv yuav tsum thov kev vammeej rau qhov chaw lawv tabtom nyob thiab nquag ua haujlwm, rau qhov yog qhov chaw lawv nyob ntawd noj qab nyob zoo ces lawv kuj yuav tau kev noj qab nyob zoo thiab (nqe 7). Nov yog yam uas tsis yoojyim ua, tiamsis ntawd yog Vajtswv tej lus uas Nws hais rau cov Yixalyees.
Tus Cevlus Yelemis kuj ntuas lawv tsis txhob ua neej cia siab ntsoov rau yam tsis muaj tseeb ntawm cov cevlus cuav tej lus dag, cov ua yeessiv thiab cov uas tham kev npau suav. Lawv tshaj tawm tej lus cogtseg hais tias cov Yixalayees yuav ntxov tau rov los rau Yeluxalees. Vajtswv tej lus ntuas kom lawv tsis txhob ua yoj yees rau tej lus qhia yuam kev ntawd (nqe 8-9). Yelemis txhawb kom lawv ua neej muaj kev cia siab, ntseeg li Vajtswv coglus tseg, 70 xyoo tom qab ua cev qhev, Vajtswv yuav coj lawv rov qab los rau lawv qub tebchaws (nqe 10). Txawm li ntawd los, cov Yixalayees paub zoo txog Vajtswv twb txiav txim rau lawv lub tebchaws lawd thiab hauv kev xav ntawm cov neeg poob ua cev qhev, lawv yuav yoojyim xav yuam kev hais tias Vajtswv npaj yuav rau txim thiab tso lawv tseg. Tiamsis dhau ntawm tus Cevlus Yelemis, Vajtswv tab pov rau lawv hais tias Nws muaj kev npaj tseg zoo rau lawv, thiab Nws txoj kev xav rau lawv yog kev thajyeeb. Vim li ntawd, lawv yuav tsum nrhiav Vajtswv kawg siab ntsws thiab thov Vajtswv (nqe 11-13). Vajtswv nyob qhov txhia chaw Nws yeej hnov thiab txais yuav tej lus thov. Lawv tej lus thov Vajtswv thiab Vajtswv lo lus teb yog ib feem rau yav tom ntej thiab kev cia siab ntawm Vajtswv haivneeg. Vajtswv tsis yog nrog lawv nyob thiab foom koob hmoov rau lawv hauv Npanpiloos xwb tiamsis thaum kawg tseem pub cai rau lawv tau rov qab los rau qub tebchaws (nqe 14).
Vajtswv cov menyuam tabtom ua neej rau ntawm yus lub tebchaws thiab thoob qhov txhua chaw hauv lub ntiajteb no nrog rau ntau txoj kev ua neej sib txawv. Txawm yog kev ua neej tau zoo txomnyem los peb txhua tus kuj yuav tsum nrhiav paub Vajtswv siab nyiam, ntseeg ruaj rau Nws kev coglus tseg. Cia li thov Vajtswv kawg siab ntsws, thov pab rau lub tebchaws thiab qhov chaw yus nyob kom muaj kev thajyeeb vammeej kom peb kuj tau txais tej yam zoo ntawm lub tebchaws. Cia li thov Vajtswv kawg siab ntsws thiab ua neej li Vajtswv Txojlus qhia kom dhau ntawm peb lub neej Vajtswv lub npe tau txhawb nqa.
Thov Vajtswv,
Vajtswv, thov pub rau nyuam yaus paub thov Koj kawg siab ntsws pab rau lub tebchaws thiab rau qhov chaw nyuam yaus tabtom nyob kom tau Koj foom koob hmoov. Thov pab nyuam yaus thiab tsev neeg kev ua neej pheej paub ua rau Koj lub npe tau qhuas hauv cov neeg uas tsis paub Koj. Nyuam yaus tuav Tswv Yexus Khetos lub npe thov, Amees.
Peb puas thov Vajtswv tiag tiag hauv lub siab tuaj rau lub tebchaws yus tabtom nyob?
Nyeem Vajluskub hauv peb lub xyoos: 2 Xwmtxheej Vajntxwv 35
Kênh Youtube BHKTHN:
