Aê Diê Sĭt Suôr – 28/7/2022

812

 

Klei Aê Diê Blŭ: II Klei Yăl Dliê 13:13-22

Êlan kliăng: “Kyua klei khăp sĭt suôr Yêhôwa, hmei amâo tuôm tuč ruê̆ ôh, klei Ñu pap amâo tuôm kƀah ôh; jih klei anăn jing mrâo grăp aguah; klei sĭt suôr Ih jing prŏng snăk”(Klei Čŏk Hia 3:22-23).

Klei êmuh ksiêm mĭn: Si klei tŭ bi blah plah wah Yuđa leh anăn Israel? Ya ngă Mtao Y-Abija amâo jing sĭt suôr klă ôh hŏng Aê Diê ƀiădah Ñu ăt brei klei dưi leh anăn klei hơêč hmưi hlăm tlâo thŭn kiă kriê? Ya klei hriăm drei mâo kơ knuih Aê Diê mơ̆ng klei yăl dliê anei?

Hlăm II Klei Yăl Dliê 13:1-12 drei hriăm leh, Mtao Y-Abija mâo klei thâo săng kơ klei mtă leh anăn klei Aê Diê čiăng jăk snăk. Ñu ăt thâo hƀuê ênuk phung ƀuôn sang Aê Diê leh anăn phung mtao Yuđa ti kwar Dhŭng lŏ čuê Mtao Y-Đawit gưt leh asăp Aê Diê. Ñu pô yua leh lu klei djŏ guôp anei čiăng jak iêô Mtao Y-Jêrôbôam leh anăn Israel ti kwar Dưr lui klei mĭn bi blah hŏng Yuđa. Ƀiădah Mtao Y-Jêrôbôam amâo gưt ôh, brei lĭng kahan dar nah tluôn čiăng ksŭng ngă leh anăn kwang dar Yuđa. Leh phung kahan Yuđa thâo ƀuh, diñu kwưh kơ Aê Diê leh anăn “Aê Diê brei Y-Jêrôbôam leh anăn jih jang phung Israel luč klei bi blah ti anăp Y-Abija leh anăn phung Yuđa”. Aê Diê jao phung Israel hlăm kngan phung Yuđa, leh anăn Mtao Y-Abija mâo mă leh ƀuôn diñu.

Khădah snăn, klei hdĭp kiă kriê hlăm tlâo thŭn bhiâo riâo rit Mtao Y-Abija jing sa klei hdĭp mâo tŭ jing ôh, čih hlăm I Bruă Mtao 15:3 snei: “Ñu êbat hlăm jih jang klei soh ama ñu ngă leh êlâo kơ ñu; leh anăn ai tiê ñu amâo jing sĭt suôr klă ôh hŏng Yêhôwa Aê Diê ñu, msĕ si ai tiê Y-Đawit aê ñu”

Mtao Y-Abija thâo Aê Diê, thâo klă asăp Aê Diê mtă, thâo si Mtao Y-Đawit sĭt suôr klă hŏng Aê Diê, ƀiădah plah wah thâo leh anăn hdĭp amâo msĕ ôh. Snăn ya ngă Aê Diê brei mtao tŭ dưi hŏng Israel, leh anăn lăn čar mtao kiă kriê dưi mdrŏng sah, mtao dôk pluh pă čô mô̆, mâo dua pluh dua čô anak êkei leh anăn pluh năm čô anak mniê (êlan 21)? Pô čih hră Phung Mtao brei thâo kyua Aê Diê jing Pô sĭt suôr. Aê Diê ƀuăn leh hŏng Mtao Y-Đawit leh anăn ñu bi sĭt klei anăn, “Ƀiădah kyua Y-Đawit, Yêhôwa Aê Diê ñu brei kơ ñu leh sa boh pui kđen hlăm ƀuôn Yêrusalem, mdưm anak êkei ñu kiă kriê čuê ñu leh anăn bi kjăp ƀuôn Yêrusalem” (I Bruă Mtao 15:4).

 Klei Aê Diê Blŭ brei thâo sa hlăm dŭm knuih Aê Diê jing sĭt suôr, jing Ñu amâo bi mlih ôh (Y-Malaki 3:6). Klei sĭt suôr Aê Diê amâo jưh hlăm ya klei mkăn ôh, leh anăn Ñu amâo guôn drei sĭt suôr hŏng Ñu kơh Ñu srăng sĭt suôr hŏng drei. Khua ƀĭng kna Y-Pôl bi mklă klei anei hlăm II Y-Timôthê 2:13: “Tơdah drei amâo dôk sĭt suôr ôh, Ñu ăt dôk sĭt suôr —kyuadah Ñu amâo dưi hngah kơ Ñu pô ôh.” Khădah snăn, brei drei ăt mđing, Aê Diê sĭt suôr hlăm klei ƀuăn brei klei hơêč hmưi snăn Ñu ăt sĭt suôr hlăm klei ƀuăn bi kmhal. Thâo klei anei, brei drei rông pô hŏng klei sĭt suôr Ñu leh anăn ăt brei thâo răng hlăm klei hdĭp kyua Aê Diê amâo tŭ klei arăng mưč ôh!

Drei mâo mơ̆ ya klei bi mklă leh thâo Aê Diê jing Pô sĭt suôr?

Wah lač: Ơ Aê Diê jing Aê Diê sĭt suôr! Kâo bi mni lač jăk kơ Ih kyua lu mông kâo amâo sĭt suôr hŏng Aê Diê ôh ƀiădah Ih ăt sĭt suôr hŏng kâo. Akâo kơ Ih pap brei kơ kâo leh anăn đru kâo djă pioh ai tiê sĭt suôr hŏng Aê Diê leh anăn hŏng ayŏng amai adei kâo.

Dlăng Klei Aê Diê Blŭ hlăm tlâo thŭn: Klei Bi Hriêng 1:1-33

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Kênh Youtube BHKTHN:

https://www.youtube.com/c/bhkthn

Bài trướcVajtswv Ua Ncaj – 28/7/2022
Bài tiếp theoĐức Chúa Trời Thành Tín – 28/7/2022