Klei Aê Diê Blŭ: Klei Mtô Mñă Klei Bhiăn 21:10‑14
Êlan kliăng: “Snăn Aê Diê hrih mnuih tui si rup Ñu pô; Ñu hrih gơ̆ tui si rup Aê Diê pô, Ñu hrih digơ̆ êkei leh anăn mniê. Aê Diê hơêč hmưi klei jăk jĭn kơ digơ̆ …” (Klei Mphŭn Dơ̆ng 1:27‑28a)
Klei êmuh ksiêm mĭn: Tơdah sa čô êkei Israel čiăng mă sa čô mniê mnă jing mô̆, ya klei brei ñu ngă? Klei ngă anei ya čiăng lač? Klei bhiăn anei bi êdah si ngă Pô Aê Diê jing? Si drei ƀuh êlan Aê Diê răng mgang mniê hlăm Klei Bi Mguôp Hđăp wăt hlăm Klei Bi Mguôp Mrâo?
Trăn Klei Aê Diê Blŭ anei mtô kơ klei bhiăn mă mniê mnă jing mô̆. Klei anei msĕ si bi kpleh hŏng klei bhiăn kăm bi dôk ung mô̆ hŏng phung tue Y‑Môis mtă leh kơ phung Israel êlâo tinăn (Klei Mtô Mñă Klei Bhiăn 7:3). Ƀiădah brei drei mđing bi nik, klei bhiăn anei knŏng yua kơ dŭm boh ƀuôn ti êngao Lăn Aê Diê Ƀuăn (Klei Mtô Mñă Klei Bhiăn 20:10‑15). Kyuanăn, klei êkei Israel čiăng mă mniê mnă jing mô̆ čih hlăm trăn anei amâo dôk hlăm klei kăm ghă anăn ôh. Čiăng dưi mă sa čô mniê mnă jing mô̆, êkei Israel srăng gưt kơ dŭm klei bhiăn mgô̆ mgan snei: Tal êlâo hĭn, brei ñu atăt ba mniê mnă anăn kơ sang ñu pô, brei kơ mâo sa anôk dôk êđăp ênang. Êdei tinăn, brei mniê anăn kuêh hĕ ƀŭk ñu, khăt kkâo kngan, pleh hĕ čhiăm ao mnă, leh anăn kơŭ kyăm kơ amĭ ama ñu êjai jih sa mlan. Anei jing klei ngă čiăng bi êdah klei hnĭng ênguôt kơ amĭ ama, čŏk hia ênguôt kơ klei bi ktlah hŏng gŏ sang leh anăn ƀuôn sang. Êngao kơ klei anăn, jih jang klei ngă anei jing gru knal kơ klei lŏ kčưm mrâo msĕ mơh, dơ̆ng mơ̆ng knuah dôk dơ̆ng ƀơ̆ng huă, klei bhiăn, anôk dôk wăt klei đăo. Leh anăn msĕ mơh mông dôk guôn êjai sa mlan jing mông pioh kơ êkei bi êdah klă klei ñu khăp leh anăn čiăng mă gơ̆ jing mô̆ ñu sĭt amâo djŏ ñu čiăng plah dưn gơ̆ ôh.
Mkă hŏng klei dhar kreh krĭng giăm Ngŏ ênuk anăn, snăn klei bhiăn anei bŏ hŏng klei jăk snăk. Kyuadah tơdah mniê mnă lĕ hlăm kngan phung kahan djuê ana mkăn, diñu srăng dlăng kơ gơ̆ msĕ si mnơ̆ng plah mă mơ̆ng klei bi blah, sa čô mnă, măng ai si arăng čiăng ngă. Ƀiădah hlăm klei bhiăn Aê Diê, Aê Diê ăt čiăng răng mgang mơh knuih kơhưm, knuih knhiêng, klei tŭ dưn kơ phung mniê, wăt kơ phung mniê mnă.
Klei dhar kreh ti čar Yuđa đưm mpŭ kơ êkei, mưč kơ mniê, phung mniê jing phung arăng amâo dlăng yuôm ôh. Tăp năng arăng dlăng msĕ si hlŭn amâodah mnơ̆ng blei mnia.
Ƀiădah mơ̆ng Klei Bi Mguôp Hđăp hlŏng kơ Klei Bi Mguôp Mrâo drei ƀuh mâo klei mdê kluôm dhuôm, klei dhar kreh amâo dưi gai klei bhiăn Aê Diê ôh. Êkei leh anăn mniê Aê Diê sơăi mjing, leh anăn Ñu brei klei jăk jĭn msĕ sơăi kơ jih digơ̆ dua (Klei Mphŭn Dơ̆ng 1:27‑28). Kyuanăn, Aê Diê brei nanao klei bhiăn pioh răng mgang phung mniê, leh anăn Ñu yua lu phung mniê msĕ si phung êkei mơh pioh kơ bruă Ñu. Aê Diê jing Pô jăk leh anăn Ñu brei lu klei bhiăn bŏ hŏng klei jăk, răng mgang phung arăng amâo mpŭ ôh, mdê gah gôk hŏng klei đăo leh anăn klei dhar kreh lăn ala.
Si ngă drei mâo klei mtăp mđơr mơ̆ dlăng kơ êkei mniê?
Wah lač: Ơ Aê Diê, Pô hrih mjing êkei leh anăn mniê, đru kâo đăm brei klei dhar kreh lăn ala kă krañ kâo ôh, ƀiădah brei kâo thâo nanao hlăm Ih, phung êkei leh anăn phung mniê jing mtăp mđơr sơăi čiăng kơ klei kâo dôk dơ̆ng dưi bi mơak kơ Ih.
Dlăng Klei Aê Diê Blŭ hlăm tlâo thŭn: Y‑Ôsê 8:1‑9:9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
