II Kevcai 21:10-14
Nqe cim:
“Yog li ntawd, Vajtswv thiaj tsim neeg, kom lawv muaj yam ntxwv zoo li Vajtswv ntag. Nws tsim muaj tus txivneej thiab tus pojniam, Vajtswv foom koob hmoov rau nkawd…” (Chivkeeb 1:27-28a).
Lus nug rau sawvdaws xav:
- Yog ib tug txivneej Yixalayees xav yuav ib tug ntxhais ntes tau los ua pojniam, nws yuav tsum ua dabtsi?
- Qhov ntawd txhais tau li cas?
- Txoj kevcai no qhia paub tus Tswv yog tus zoo li cas?
- Peb pom tus Tswv tiv thaiv cov pojniam hauv tiam Vajluskub Qub thiab tiam Vajluskub Tshiab li cas?
Ntu Vajluskub no qhia txog txoj cai yuav cov ntxhais ntes tau los ua pojniam. Qhov no zoo li uas tawmtsam txoj cai txwv tsis pub yuav lwm haivneeg uas Mauxes qhia rau cov Yixalayees ua ntej ntawd (II Kevcai 7:3). Tiamsis peb yuav tau ua tib zoo saib, txoj cai no tsuas yog siv rau cov neeg uas tsis nrog lawv nyob hauv lub tebchaws tus Tswv coglus tseg xwb (II Kevcai 20:10-15). Yog li, qhov uas ib tug txivneej Yixalayees xav yuav ib tug ntxhais ntes tau los ua pojniam hauv ntu Vajluskub no tsis nyob hauv txoj cai txwv. Cia kom yuav tau ib tug ntxhais ntes tau los ua pojniam, tus txivneej Yixalayees yuav tsum tau ua raws li qee yam kevcai. Thawj yam, yuav tsum coj tus ntxhais ntawd los hauv tsev, kom nws muaj ib qhov chaw nyob. Tom qab ntawd, tus ntxhais ntawd yuav tsum chais plaub hau, txiav rau tes, hloov tsho, thiab quaj ntsuag rau niamtxiv puv ib lub hlis. Qhov no yog qhia tshwm lub siab hlub tshua niamtxiv, quaj ntsuag txog txojkev tu siab uas raug ntes tawm hauv tebchaws los. Dhau qhov ntawd, ua li no kuj yog ib lub cim pib dua tshiab, kev ua neej, kev coj noj coj ua, qhov chaw nyob thiab kev ntseeg. Thiab lub sijhawm tos ib hlis kuj yog lub sijhawm tus txivneej ua timkhawv qhia hais tias nws yeej hlub tiag thiab xav yuav tus ntxhais ntawd los ua pojniam, tsis yog raug yuam.
Raws li kev coj noj coj ua nyob rau ntu nruab nrab ntiajteb lub sijhawm ntawd, txoj cai no zoo heev. Rau qhov cov ntxhais raug ntes tau mus rau lwm haivneeg cov tubrog, lawv suav cov ntxhais ntawd zoo li ib qho khoom, ib tug qhev, leejtwg yuav ua li cas los tau tagnrho. Tiamsis hauv tus Tswv txoj kevcai, Nws xav tiv thaiv cov ntxhais raug ntes tau los lub koob npe, lub neej thiab lub meejmom.
Kev ua neej ntawm cov neeg Yudais, lawv saib taus cov txivneej dua pojniam, cov pojniam yog cov uas tsis muaj nqis nyob hauv lub tebchaws, qee lub sijhawm raug suav zoo li ib tug qhev lossis ib yam khoom xwb. Tiamsis hauv Vajluskub Qub thiab Vajluskub Tshiab qhia rau peb muaj qhov kev ntsia txawv, tus Tswv txoj cai tsis txuam yuaj kev coj noj coj ua. Tus txivneej thiab tus pojniam puavleej yog tus Tswv tsim, thiab Nws foom koob hmoov rau nkawd ob leeg (Chivkeeb 1:27-28). Yog li ntawd, tus Tswv muaj txoj kevcai tiv thaiv cov pojniam thiab Nws kuj siv ntau tus pojniam zoo ib yam li cov txivneej thiab. Vajtswv yog tus ua ncaj ncees rau tej kevcai uas Nws muab, Nws tiv thaiv cov neeg uas raug lwm tus saib tsis taus, txawv lwm txojkev ntseeg lossis neeg kev coj noj coj ua.
Thov Vajtswv,
Tus Tswv, Koj yog tus tsim thiab hlub pojniam txivneej huvsi. Thov Koj pab kom nyuam yaus paub hais tias hauv tus Tswv, txhua tus tsis hais pojniam txivneej puavleej muaj vaj huam sib luag, nyuam yaus thiaj paub ua haum Koj siab. Amees.
Peb puas muaj vaj huam sib luag ntawm pojniam thiab txivneej?
Nyeem Vajluskub hauv peb lub xyoo: Hauxeyas 8:1-9:9
Kênh Youtube BHKTHN:
