Klei Aê Diê Blŭ: Klei Mtô Mñă Klei Bhiăn 32:34-43
Êlan kliăng: “Hơ̆k mơak bĕ, Ơ phung găp djuê mnuih mbĭt hŏng phung ƀuôn sang ñu, kyuadah ñu srăng rŭ ênua êrah phung dĭng buăl ñu, leh anăn rŭ ênua kơ phung roh ñu, leh anăn ngă klei bhuah bi doh kơ ala čar ñu, kơ phung ƀuôn sang ñu.” (Klei Mtô Mñă Klei Bhiăn 32:43)
Klei êmuh ksiêm mĭn: Si Aê Diê ngă leh tơdah phung ƀuôn sang Ñu luč jih klei ktang? Klei anei brei ƀuh ya klei khăp Aê Diê hŏng phung ƀuôn sang Ñu? Si drei ngă tơdah ngă soh hŏng Aê Diê?
Hlăm jih klei mmuñ Y‑Môis bi êdah klei Aê Diê ngêñ jih hnơ̆ng ti anăp klei soh lu snăk amâo dưi pap brei ôh mơ̆ng phung ƀuôn sang Israel. Drei bi mĭn mjưh ruê̆ klei mmuñ anei srăng jing sa klei čŏk kơ klei luč ram phung ƀuôn sang Ñu. Kyua mkă hŏng klei phung ƀuôn sang Aê Diê ngă leh hŏng Aê Diê, diñu năng tŭ klei knhal tuč knap mñai msĕ snăn. Khădah snăn, klei bi kngăr snăk jing klei Aê Diê răng mgang phung ƀuôn sang Israel truh knhal tuč ti anăp klei phung ƀuôn sang tue ksŭng ngă, bi hêñ, ngă jhat.
Mơ̆ng mnĭt mmông phung ƀuôn sang Aê Diê lui Ñu čiăng kkuh kơ rup yang mkăn, Aê Diê thâo sĭt srăng mâo hruê phung ƀuôn sang Aê Diê srăng lĕ hlăm êlan klei luč ram. Kyua phung rup yang amâo mâo klei myang diñu kkuh mpŭ amâo dưi đru ôh diñu ti anăp phung roh nao blah. Wăt tơdah Aê Diê ngêñ snăk kyua klei diñu bi kdơ̆ng hŏng Aê Diê, ƀiădah amâo djŏ ôh kyua snăn Ñu ngă ngơi mang tơdah ƀuh phung ƀuôn sang Ñu lĕ hlăm klei knap mñai. Klei pap prŏng prĭn Aê Diê prŏng hĭn kơ klei ngêñ anăn, kyua anăn Ñu bi mtlaih leh phung ƀuôn sang Israel tlaih mơ̆ng klei djiê, pap brei klei soh diñu, rŭ ênua brei kơ diñu, leh anăn phat kđi kpă ênô. Klei Aê Diê bi kmhal prŏng hĭn kơ phung ƀuôn sang Israel jing đuĕ mơ̆ng diñu, lui diñu hlăm kngan phung roh ngă jhat, ƀiădah ka tuôm mâo ôh hlăm hƀuê ênuk phung Israel brei ƀuh Aê Diê lui diñu luč ram hlăm kngan phung roh. Klei khăp amâo knhal Aê Diê brei kơ phung ƀuôn sang Israel, leh anăn hlăm anăn mâo jih jang anak mnuih êgao hĭn kơ klei mĭn leh anăn klei thâo săng anak mnuih.
Hruê anei, ti gŭ klei Yang Mngăt Jăk mtrang, drei ƀuh drei pô jing sa čô mnuih soh kyua klei mĭn, ƀiădah kyua klei thâo kơ klei khăp amâo knhal Aê Diê jing klei đru drei dưi hŏng klei ngă soh, klei awăt leh anăn amâo tŭ jing mơ̆ng pô čiăng lŏ dơ̆ng êbat tui hlue Aê Diê. Lu phung đăo lač klei soh pô ngă prŏng đei, diñu ƀuh pô amâo năng ôh hŏng klei khăp prŏng prĭn Aê Diê brei, kyuanăn ruah leh dôk ti êngao klei khăp Aê Diê. Brei hdơr, knŏng čiăng drei nao kơ Aê Diê hŏng ai tiê hƀlŏk, kmhal jih klei soh pô ngă leh, snăn klei pap leh anăn klei khăp jing klei Aê Diê brei nanao kơ drei, msĕ si Mtao Y‑Đawit thâo leh, “…Ơ Aê Diê, Ih amâo bi êmut ôh kơ ai tiê mčah leh anăn kmhal kơ klei soh” (Klei Mmuñ Hđăp 51:17).
Drei tuôm thâo leh mơ̆ klei khăp Aê Diê prŏng prĭn kơ pô wăt tơdah pô amâo năng ôh?
Wah lač: Ơ Khua Yang, jing Pô hrih mjing leh kâo leh anăn yua klei khăp amâo mâo knhal khăp kơ kâo. Akâo kơ Ih đru kâo thâo kmhal leh lu blư̆ ngă soh hlăm klei hdĭp, čiăng kâo ƀrư̆ khăp kơ Khua Yang hĭn leh anăn hdĭp hlue si klei Ih čiăng grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Bruă Mtao 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
