II Kevcai 32:34-43
Nqe cim:
“Txhua haivneeg thoob qab ntuj, nej cia li qhuas tus Tswv haivneeg, tus Tswv yuav rau txim rau txhua haivneeg uas tuaj tua nws haivneeg. Nws yuav ua pauj rau nws cov yeebncuab thiab zam txim rau nws haivneeg.” (II Kevcai 32:43)
Lus nug rau sawvdaws xav:
– Vajtswv ua dabtsi thaum Nws haivneeg tsis muaj zog?
– Qhov ntawd qhia paub tus Tswv txojkev hlub Nws haivneeg li cas?
– Peb cheemtsum ua dabtsi thaum ua txhaum rau tus Tswv?
Mauxes zaj nkauj qhia paub Vajtswv chim kawg nkaus thaum Nws haivneeg ua txhaum loj zam tsis tau. Peb yuav xav hais tias thaum xaus zaj nkauj yuav yog ib zaj nkauj quaj ntsuag rau tus Tswv haivneeg txojkev tuag. Vim qhov uas lawv ua rau Vajtswv twb tsimnyog lawv raug kev quaj ntsuag lawm. Tiamsis qhov uas peb xav tsis thoob mas yog Vajtswv tivthaiv Nws haivneeg thaum raug lwm haivneeg tuaj tua, ua saib tsis taus, ua phem mus txog thaum kawg.
Txij ntua thaum tus Tswv haivneeg tso Nws tseg mus pe lwm haivneeg tej mlom, tus Tswv paub tias yeej yuav muaj ib hnub Nws haivneeg yuav raug puastsuaj. Vim tej mlom uas tsis paub hais lus uas lawv pe pab tsis tau lawv thaum yeebncuab tuaj tua. Txawm yog Vajtswv chim heev rau qhov uas lawv tso Nws tseg, los tsis yog vim qhov ntawd es tus Tswv tsis quav ntsej kav liam lawv raug li cas loj xij. Tiamsis Vajtswv nplooj siab hlub loj dua txojkev chim, yog li Nws cawm Nws haivneeg dim txojkev tuag, zam lawv tej kev txhaum, txiav txim, ua pauj rau Nws haivneeg ncaj ncees. Lub txim loj uas Vajtswv rau rau cov neeg Yixalayees yog Nws tawm hauv lawv mus, muab lawv cob rau yeebncuab txhais tes, tiamsis saib keebkwm ntawm cov neeg Yixalayees tus Tswv yeej tsis cia yeebncuab tua lawv tu noob li. Vajtswv txojkev hlub uas tsis paub kawg pub rau cov Yixalayees thiab peb dhau qhov uas peb xav tsis txog thiab paub tsis tau.
Nimno, los ntawm Vaj Ntsujplig txojkev coj qhia, peb zeem paub tias yus yog ib tug neeg txhaum, tiamsis vim qhov uas peb paub Vajtswv txojkev hlub tsis paub kawg no pab kom peb tiv dhau tej kev qaug zog, ua tsis tau, kom yus paub siv zog nrog tus Tswv mus ntxiv. Muaj ntau tus ntseeg Yexus hais tias yus ua txhaum loj heev lawm, lawv pom tau tias yus tsis tsimnyog tau tus Tswv txojkev hlub ntawd, yog li lawv xaiv khiav tawm ntawm Vajtswv txhais tes mus. Yuav tsum nco ntsoov, thaum peb muaj lub siab lees txim tej uas peb tau ua tiag tiag, tig rov los cuag tus Tswv, ces tus Tswv yuav ua siab ntev, zam txim thiab hlub heev, ib yam li uas Vajntxwv Daviv twb tau txais, “Vajtswv… koj yuav tsis fee plhu rau tus uas txo hwjchim thiab lees nws tej kev txhaum ib zaug.” (Phau Ntawv Nkauj 51:17).
Thov Vajtswv,
Tus Tswv, Koj yog tus uas tsim nyuam yaus thiab hlub nyuam yaus kawg nkaus li. Thov pab kom nyuam yaus paub lees txim thaum ua txhaum, kom nyuam yaus yim hnub yim hlub Koj thiab ua rau Koj tau ntsejmuag. Tuav Tswv Yexus lub npe thov, Amees.
Peb puas tau saj dua Vajtswv txojkev hlub loj kawg nkaus uas Nws pub rau peb, txawm tias peb tsis tsimnyog tau txais?
Nyeem Vajluskub hauv peb lub xyoo: I Vajntxwv 21
Kênh Youtube BHKTHN:
