Klei Aê Diê Blŭ: Rôm 11:11‑24
Êlan kliăng: “Klei anăn jing sĭt. Arăng khăt hĕ diñu leh kyuadah klei diñu amâo đăo ôh. Ƀiădah ih dôk kjăp knŏng kyua klei ih đăo. Snăn đăm jing mgao ôh, ƀiădah brei ih huĭ” (Rôm 11:20)
Klei êmuh ksiêm mĭn: Ya klei êmuh Khua ƀĭng kna Y‑Pôl êmuh hlăm êlan 11? Ya klei ñu čiăng mtă kơ phung Israel leh anăn kơ phung tue đăo kơ Krist hlăm trăn Klei Aê Diê Blŭ anei? Ya klei hriăm drei mâo mơ̆ng klei hriăm anei?
Hlăm trăn Klei Aê Diê Blŭ anei, Khua ƀĭng kna Y‑Pôl yua klei bi hriêng hŏng bruă bi mtuôp mƀlir adhan ôliwơ čiăng bi hmô kơ hdră Aê Diê pioh kơ phung Israel leh anăn phung tue. Drei ksiêm mĭn mbĭt čiăng thâo ti anôk drei dôk hlăm klei yăl dliê kơ klei Aê Diê bi mtlaih.
Hlăm êlan 11 Khua ƀĭng kna Y‑Pôl mâo sa klei êmuh snei: “djŏ mơ̆ phung Israel têč hnêč leh tơl êbuh leh anăn rai luč?” Leh anăn ñu wĭt lač: “Hơăi, amâo djŏ ôh!” Aê Diê pioh leh kơ Ñu pô phung dôk sĭt suôr hŏng Ñu ti krah phung ƀuôn sang Ñu ruah leh (Rôm 11:5). Aê Diê kiă kriê jih jang klei, wăt tơdah phung ƀuôn sang Ñu ruah leh bi kdơ̆ng leh anăn hngah kơ Ñu dưn, Ñu ăt bi leh hdră klei bi mtlaih Ñu mkra leh. Ñu pŏk êlan čiăng kơ phung tue dưi mă tŭ klei Ñu bi mtlaih. Anei amâo djŏ klei tuč ruĕ kơ phung Israel ôh. Klei anei srăng bi mčhur brei phung Israel nač kơ phung tue. Digơ̆ srăng lŏ dlăng wĭt, ksiêm mĭn leh anăn čiăng snăk mâo klei bi mtlaih msĕ si phung tue mâo leh. Khua ƀĭng kna Y‑Pôl brei thâo ya ngă phung Israel jing msĕ msi ana boh ôliwơ arăng khăt leh đa đa adhan, kyuadah diñu amâo mâo klei đăo ôh, leh anăn brei adhan ôliwơ dliê, bi hmô kơ phung tue, arăng bi mtuôp mƀlir kyuadah digơ̆ mâo klei đăo (êlan 20). Ñu bi mđĭ ai leh anăn pŏk mơh êlan brei phung Israel ƀuh klei hdĭp kơ anăp bŏ hŏng klei guh kơang tơdah digơ̆ lui hĕ klei digơ̆ amâo đăo. Aê Diê srăng yơr kngan hŏng klei hơ̆k drông digơ̆ wĭt kơ sang (êlan 23‑24). Klei anăn ƀuăn rơ̆ng srăng mâo klei bi êrâo prŏng hlăm klei hdĭp myang phung ƀuôn Aê Diê ruah leh kơ êdei anăp.
Bi phung đăo kơ Krist jing phung tue, Khua ƀĭng kna Y‑Pôl mñă brei digơ̆ hdơr kơ digơ̆ jing adhan ôliwơ dliê, čiăng lač amâo djŏ phung ƀuôn sang Aê Diê ruah ôh. Ƀiădah kyua mâo klei đăo kơ Khua Yang Yêsu Krist snăn Aê Diê pap brei leh, Ñu bi mtuôp mƀlir adhan ôliwơ dliê hlăm ana boh ôliwơ jăk jing Khua Yang Yêsu, dưi mâo ktăk hdĭp mơ̆ng agha ana boh ôliwơ jăk čiêm rông. Khua ƀĭng kna Y‑Pôl ăt mtă mơh kơ phung đăo jing phung tue đăm ngă mgao hĭn kơ adhan ôliwơ arăng khăt leh ôh, ƀiădah tơdah bi mni, bi mni bĕ kơ “agha krơ̆ng ih” (êlan 18). Čiăng lač, phung đăo phung tue amâo dưi bi mni kơ drei pô ôh, tơdah bi mni brei drei bi mni kơ klei pap yuôm bhăn Aê Diê atăt ba leh drei kơ gŏ sang êngŭm Aê Diê. Snăn yơh, đăm ngă mgao ôh ƀiădah huĭ mpŭ bĕ kơ Khua Yang. Răng leh anăn djă pioh kjăp klei đăo hlăm klei khăp Aê Diê. Tơdah amâo ngă msĕ snăn ôh, klei hdĭp drei ăt jing msĕ si adhan ôliwơ arăng khăt hwiê anăn mơh.
Si ngă drei thâo kral mơ̆ klei pap Aê Diê brei kơ drei tơdah drei jing adhan ôliwơ dliê arăng bi mtuôp mƀlir hlăm ana boh ôliwơ jăk?
Wah lač: Ơ Khua Yang, kâo lač jăk kơ Ih kyuadah hŏng klei pap Ih brei leh kơ kâo klei dưi jing anak hlăm sang Ih. Dưi mă tŭ klei hdĭp leh anăn klei brei mdê ih pioh leh kơ phung anak Ih khăp hơiêng. Đru kâo hdĭp thâo hdơr knga bi mni kơ Ih, êbat hŏng klei luă gŭ leh anăn đru kâo hdĭp mâo boh tŭ dưn kơ sang Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Luk 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
