Loos 11:11-24
Nqe cim.
“Yeej yog li ntawd tiag. Twb yog vim lawv tsis ntseeg, Vajtswv thiaj muab lawv txiav povtseg, thiab muab nej los txuas rau lawv qhov chaw. Tiamsis nej yuav tsum ceevfaj; nej tsis txhob khav hais tias nej tau los nyob lawv qhov chaw.” (Loos 11:20)
Lus nug rau sawvdaws xav.
– Timthawj Paulus nug txog yam dabtsi hauv nqe 11?
– Nws xav qhia dabtsi rau cov Yixalayees thiab cov ntseeg uas yog lwm haivneeg nyob hauv ntu Vajluskub no?
– Peb kawm tau dabtsi hauv zaj no?
Nyob hauv ntu Vajluskub no, Timthawj Paulus tau siv ib zaj pivtxwv hais txog kev muab ceg txiv ntoo roj qus txuas rau tsob txiv nyeg lossis piav txog Vajtswv lub homphiaj pub rau cov Yixalayees thiab lwm haivneeg. Peb los sibcog kawm kom paub tus kheej nyob qhov chaw twg hauv tus Tswv txojkev cawmdim.
Timthawj Paulus nug ib los nyob hauv nqe 11: “Thaum cov Yudais dawm ntog, lawv twb raug kev puastsuaj lawm los?” thiab nws teb khov kho hais tias: “Tsis yog li ntawd!”. Tus Tswv yeej xaiv ib pab neeg ncaj ncees hauv tus Tswv haivneeg tseg cia rau Nws lawm (Loos 11:5). Tus Tswv yog tus tswjkav txhua yam, txawm yog tus Tswv haivneeg ntxeev siab thiab tsis txais yuav Nws txojkev cawmdim, los tes haujlwm ntawd yeej mus taus. Tus Tswv tau qhib kev rau lwm haivneeg los txais Nws txojkev cawmdim. Qhov ntawd tsis yog qhov xaus rau cov Yixalayees. Zaj no yuav ua rau cov Yixalayees sib txeeb nrog lwm haivneeg. Lawv yuav tig rov saib tus kheej, ua tib zoo xav thiab ntshaw tau txojkev cawmdim zoo li lwm haivneeg tabtom tau txais. Timthawj Paulus qhia paub vimchiv tus Tswv haivneeg zoo li tsob txiv ntoo roj aulib uas muaj tej ceg raug txiav povtseg yog vim lawv tsis muaj kev ntseeg, kom tej ceg txiv ntoo roj qus, uas piv txog lwm haivneeg, tau muab los txuas rau vim lawv muaj kev ntseeg (nqe 20). Timthawj Paulus kuj txhawb zog thiab qhib kev rau cov Yixalayees saib pom ib lubneej ci ntsa iab tomntej yog hais tias lawv tso qhov uas lawv tsis ntseeg tseg, tus Tswv yuav cev tes txais tos lawv rov qab los (nqe 23-24), coglus yuav pub rau lawv muaj kev vammeej sab ntsujplig rau yav tomntej.
Hais txog cov ntseeg uas yog lwm haivneeg, Timthawj Paulus qhuab ntuas lawv nco txog tus kheej qhov chaw pib, lawv tsuas yog tej ceg txiv ntoo roj qus, txhais tau tias tsis yog haivneeg tus Tswv xaiv. Tiamsis vim muaj kev ntseeg Tswv Yexus lawv thiaj tau Vajtswv hlub, Nws muab cov ceg txiv ntoo roj qus los txuas rau tsob txiv ntoo roj nyeg, uas yog Tswv Yexus, kom thiaj tau tsob txiv ntoo roj nyeg cov cag nqus dej los yug. Timthawj Paulus kuj muaj lus ceebtoom rau cov ntseeg uas yog lwm haivneeg txhob khavtheeb, txhob saib tsis taus cov ceg txiv ntoo roj nyeg uas raug txiav povtseg, tiamsis yog yuav khav, ces khav txog “tus cag” uas yug peb (nqe 18). Txhais tau hais tias, cov ntseeg uas yog lwm haivneeg tsis txhob khavtheeb, yog yuav khav ces tsuas khav txog tus Tswv txoj koob hmoov hlub tau coj peb los rau hauv Nws lub cuabyig loj. Yog li ntawd tsis txhob khavtheeb tiamsis cia li hwm tus Tswv, tuav ruaj kev ntseeg thiab tswj tus kheej nyob hauv Nws txojkev hlub. Yog tsis ua li ntawd, peb kuj yuav raug puastsuaj ib yam li cov ceg txiv ntoo roj uas raug txiav povtseg.
Thov Vajtswv,
Tus Tswv, thov ua Koj tsaug vim Koj txojkev hlub tau coj nyuam yaus los rau hauv Koj lub cuabyig loj, tau txojsia thiab tau txhua yam koob hmoov koj muab pub rau koj cov menyuam. Thov pab nyuam yaus paub ua neej nco Koj txiajntsig, txo hwjchim thiab ua neej tawg paj txi txiv hauv Koj tsevneeg. Nyuam yaus tuav Yexus Khetos lub npe thov, Amees.
Peb puas zeem paub txoj koob hmoov hlub tus Tswv pub rau peb cov uas yog cov txiv ntoo roj qus tau muab txuas rau tsob txiv ntoo roj nyeg lawm tau?
Nyeem Vajluskub hauv peb lub xyoos: Lukas 9
Kênh Youtube BHKTHN:
