Klei Aê Diê Blŭ: Y-Yêrêmi 49:1-6
Êlan kliăng: “Kyuanăn, nĕ anei hruê srăng truh,” Yêhôwa lač,“tơdah kâo srăng brei arăng hmư̆ asăp ki kơ klei bi blah ngă kơ ƀuôn Raba hlăm čar Amôn; ƀuôn anăn srăng jing sa kbuôn ênguôl…” (Y-Yêrêmi 49:2a)
Klei êmuh ksiêm mĭn: Ya klei phung Amôn djŏ tuôm hŏng phung ƀuôn sang Israel? Ya klei soh kjham phung Amôn ngă leh? Ya klei brei drei ƀuh Aê Diê jing Pô bŏ hŏng klei jăk, klei thâo pap? Ya klei brei drei ngă tơdah thâo drei pô ngă soh hŏng klei bhiăn Aê Diê?
Msĕ si phung ƀuôn sang Môap, phung Amôn jing ênuk êdei mơ̆ng Y-Lot hŏng anak mniê ñu tal dua (Klei Mphŭn Dơ̆ng 19:36-38). Wăt tơdah jing găp djuê hŏng phung Israel ƀiădah Amôn jing phung roh mơ̆ng phung Yuđa kyua phung Amôn kkuh kơ rup yang Malkôm, ăt lŏ pia jing yang Môlek (I Bruă Mtao 11:5,7), leh anăn jing sa ƀuôn sang jhŏng ktang, khăng nao blah Israel. Khădah snăn, Aê Diê mtô phung ƀuôn sang Aê Diê brei hdĭp jăk hŏng digơ̆ (Klei Mtô Mñă Klei Bhiăn 2:18-19).
Trăn Klei Aê Diê Blŭ anei čih hlue si klei blŭ hưn êlâo kơ klei bi kmhal phung Amôn kyua diñu ngă soh kjham. Klei soh tal sa, tơdah arăng brei phung ƀuôn sang Aê Diê nao jing hlŭn Asiri, diñu mă jih lăn ala phung Gat, mă Raba jing ƀuôn prŏng phŭn. Anăn jing mta phŭn Aê Diê mâo dŭm klei êmuh, “Čar Israel amâo mâo anak êkei hĕ? Diñu amâo mâo ôh hĕ pô dưn ngăn? Snăn si ngă yang Malkôm plah mă dŏ dô phung Gat, leh anăn phung ƀuôn sang ñu dôk hlăm ƀuôn prŏng digơ̆?” (êlan 1). Klei soh tal dua, phung Amôn kkuh kơ yang Malkôm, jing Môlek, hlăm anăn mâo klei bhiăn ngă yang myơr hđeh điêt. Msĕ si mnuih ƀuôn sang Môap, kkuh kơ rup yang leh anăn myơr hđeh điêt kơ yang jhat jing klei soh Aê Diê bi êmut kheh. Klei soh tal tlâo, Amôn hưn tlung bŏ mnga, boh kroh mơ̆ng diñu êđăp ênang snăk kyua mâo čư̆ mgang jih tlâo tĭng, ngăn drăp bŏ hjiê, yang diñu myang hĭn kơ Aê Diê kyua brei diñu dưi blah lăn Israel (êlan 4).
Yêhôwa Aê Diê lač truh mmông Aê Diê kčah, Ñu srăng ba klei huĭ hyưt mơ̆ng djăp anôk truh kơ phung anăn, Ñu srăng tiŏ nao phung roh truh kơ djuê ana leh anăn lăn čar diñu, phung ƀuôn sang Aê Diê srăng wĭt suôt diñu kbiă mơ̆ng čar, arăng srăng bi rai ƀuôn prŏng phŭn Raba (êlan 2, 5). Khădah snăn, sa blư̆ dơ̆ng, drei lŏ ƀuh ai tiê bŏ hŏng klei pap mơ̆ng Aê Diê kơ klei ƀuăn srăng kơrŭ wĭt phung Amôn tơdah Ñu kơrŭ wĭt Yuđa leh anăn Israel hlăm ala mtao êdei anăp (êlan 6). Aê Diê kơrŭ wĭt diñu amâo djŏ knŏng kyua diñu năng ôh ƀiădah kyua Aê Diê brei klei pap kơ diñu čiăng dưi dưn klei guh kơang mơ̆ng Israel srăng mâo tơdah Khua Yang Yêsu dôk ti jhưng mtao Y-Đawit.
Klei bi kmhal jing klei năng kơ klei ngă soh anak mnuih ngă leh hŏng Aê Diê. Ƀiădah mơ̆ng klei bi kmhal, bi êdah nanao klei khăp leh anăn klei pap Aê Diê brei kơ phung soh. Drei ăt tuôm ngă soh hŏng hdră bhiăn êđăp ênang mơ̆ng Aê Diê tơdah dưm ai tiê leh anăn bruă ngă hlue si klei drei pô čiăng, amâo gưt kơ Aê Diê, kbưi hŏng Ñu, ƀiădah brei kmhal čiăng Aê Diê srăng lŏ ba drei wĭt.
Drei kmhal mtam mơ̆ tơdah thâo drei pô ngă soh hŏng Aê Diê?
Wah lač: Ơ Aê Diê! Hơêč hmưi kơ klei myang Ih hlăm jih jang ƀuôn sang tar ƀar lăn ala. Kâo bi mni kơ Ih leh hriăm kơ klei pap Ih hŏng phung ngă soh, hlăm anăn mâo kâo pô. Akâo kơ Ih đru kâo amâo lŏ bi kdung sui ôh ƀiădah kmhal mtam tơdah ngă soh.
Dlăng Klei Aê Diê Blŭ hlăm tlâo thŭn: Rôm 12:1-13:14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
