Klei Aê Diê Blŭ: Y-Mathiơ 14:6-12
Êlan kliăng: “Klei phung doh jăk ñu djiê jing yuôm snăk ti anăp ală Yêhôwa” (Klei Mmuñ Hđăp 116:15)
Klei êmuh ksiêm mĭn: Si klei Y-Yôhan Pô Ngă Ƀaptem djiê? Ya mnơ̆ng pah mni yuôm bhăn ñu mă tŭ mơ̆ng Aê Diê? Ya klei mđĭ ai drei amâo kdŭn tơdah ƀuh klei rŭng răng mơ̆ng phung mă bruă kơ Aê Diê?
Mtao Y-Hêrôt Antipas mă krư̆ leh Y-Yôhan Pô Ngă Ƀaptem ƀiădah amâo jhŏng bi mdjiê ôh ñu kyua huĭ kơ phung ƀuôn sang. Leh anăn, ƀri hdơr hruê kkiêng mtao, H’Hêrôdias brei anak mniê ñu nao kdŏ mmuñ leh anăn ngă kơ mtao khăp snăk kơ klei kdŏ anei. Hlăk êjai mtao khăp dlăng mtao ƀuăn leh srăng ngă djăp mta klei ñu akâo. Mniê anăn hmư̆ klei amĭ mtrŭt anăn akâo kơ mtao koh kkuê Y-Yôhan Pô Ngă Ƀaptem dưm hlăm sa boh hlao. Wăt tơdah mtao ênguôt kyua amâo čiăng ôh (Y-Markôs 6:20) ƀiădah kyua klei ƀuăn kat asei ti anăp phung huă mnăm mbĭt anăn mtao ngă klei mniê anăn akâo, brei arăng koh kkuê Y-Yôhan Pô Ngă Ƀaptem. Leh anăn, phung ƀĭng kna gơ̆ nao mă asei atâo ba dơr. Bruă mprăp êlan kơ Khua Yang Yêsu mơ̆ng Y-Yôhan Pô Ngă Ƀaptem mjưh ruê̆ leh ñu djiê.
Drei čang hmăng si klei knhal tuč kơ phung sĭt suôr mă bruă kơ Aê Diê? Djŏ mơ̆ klei knhal tuč mơ̆ng Y-Yôhan Pô Ngă Ƀaptem jing klei knhal tuč ênguôt snăk? Drei thâo Y-Yôhan Pô Ngă Ƀaptem bi leh bruă “mprăp êlan” kơ Khua Yang Yêsu leh anăn ñu hdĭp leh sa klei hdĭp kpă ênô, doh jăk truh knhal tuč. Drei ăt thâo mơh klei knhal tuč mơ̆ng phung mă bruă kơ Aê Diê dôk hlăm hdră Ñu wăt tơdah ară anei klei knhal tuč anăn ênguôt snăk, pap snăk ƀiădah klă sĭt phung mă bruă kơ Aê Diê srăng mâo Aê Diê mpŭ leh anăn Ñu srăng pah mni. Khua Yang Yêsu lač kơ klei pah mni yuôm bhăn mơ̆ng Y-Yôhan Pô Ngă Ƀaptem msĕ si: “Sĭt nik kâo lač kơ diih, đơ phung mnuih mniê kkiêng leh, amâo mâo pô prŏng hĭn kơ Y-Yôhan Pô Ngă Ƀaptem ôh…” (Y-Mathiơ 11:11a). Boh sĭt klei djiê mơ̆ng phung doh jăk jing yuôm bhăn ti anăp Aê Diê (Klei Mmuñ Hđăp 116:15).
Tăp năng drei êdu ai hlăm klei mă bruă kơ Aê Diê tơdah ƀuh klei knhal tuč amâo jăk amâodah jing ênguôt hnĭng mơ̆ng phung ngă leh leh anăn dôk mă bruă kơ Aê Diê. Ƀiădah Khua ƀĭng kna Y-Pôl mtô: “Amâo mâo sa čô ôh hlăm phung drei dôk hdĭp kơ ñu pô, amâodah djiê kơ ñu pô. Tơdah drei dôk hdĭp, drei hdĭp kơ Khua Yang; leh anăn tơdah drei djiê, drei djiê kơ Khua Yang mơh. Snăn thâodah drei dôk hdĭp amâodah djiê, ăt drei jing dŏ Khua Yang mơh” (Rôm 14:7-8). Bruă ngă Y-Yôhan Ƀaptem mđĭ ai drei sĭt suôr mă bruă kơ Aê Diê. Khua Yang jing Pô iêô drei mŭt hlăm klei mă bruă kơ Ñu brei nanao klei pah mni yuôm bhăn hlăm klei hdĭp hlŏng lar msĕ si Ñu lač leh, “Tơdah sa čô mă bruă kơ kâo, brei ñu tui hlue kâo. Ti anôk kâo dôk, dĭng buăl kâo srăng dôk tinăn msĕ mơh. Hlei pô mă bruă kơ kâo, Ama kâo srăng mpŭ kơ ñu” (I Y-Yôhan 12:26).
Drei dôk êdu ai, kdŭn tluôn hlăk êjai mă bruă kơ Aê Diê mơ̆? Ya klei drei bi mklă leh hriăm klei hriăm anei?
Wah lač: Ơ Khua Yang, akâo kơ Ih đru kâo sĭt suôr tui hlue Khua Yang leh anăn mă bruă kơ Ih wăt tơdah tuôm hŏng lu klei dleh dlan arăng ngă jhat ƀiădah kâo thâo Aê Diê jing Pô srăng mni kơ hlei pô sĭt suôr mă bruă kơ Ih truh knhal tuč.
Dlăng Klei Aê Diê Blŭ hlăm tlâo thŭn: Rôm 6:15-7:25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
