Mathais 14:6-12
Nqe cim:
“Thaum tus TSWV cov neeg ib tug uas muab siab npuab nws tuag, mas tus
TSWV mob siab kawg li.” (Phau Ntawv Nkauj 116:15).
Lus nug rau sawvdaws xav:
– Yauhas Npatitus tuag zoo li cas?
– Yauhas tau txais nqi zog muaj nqis li cas ntawm tus Tswv?
– Yam dabtsi txhawb kom peb tsis txhob nres thaum pom kev txomnyem ntawm cov neeg ua Vajtswv haujlwm?
Vajntxwv Helauj Atipas ntes Yauhas Npatitus mus kaw tiamsis nws tsis kam tua Yauhas vim ntshai cov pejxeem. Tom qab ntawd, ntxab lub sijhawm ua xeeb yug rau vajntxwv, Helaudias tus ntxhais los dhia seevcev thiab ua rau vajntxwv zoo siab heev. Lub sijhawm zoo siab dhau vajntxwv tau coglus rau tus ntxhais yuav ua txhua yam li uas tus ntxhais xav tau. Tus ntxhais thov raws nraim li leejniam tej lus qhia thov muab Yauhas Npatitus tua povtseg txiav taubhau tso saum phaj. Txawm yog vajntxwv nyuaj siab tsis xav ua li ntawd (Malakaus 6:20) los vim tau coglus rau tej nomtswv lawm vajntxwv yuav tau ua li tus ntxhais thov, nws samhwm kom muab Yauhas Npatitus txiav taubhau. Tomqab ntawd, Yauhas cov thwjtim coj nws lub cev mus faus. Yauhas Npatitus tes haujlwm kho kev tos Tswv Yexus xaus rau txojkev tuag.
Peb xav kom cov neeg uas ncaj ncees ua tus Tswv haujlwm lub neej xaus li cas? Puas yuav mus raws li Yauhas Npatitus lub neej? Peb zeem paub hais tias Yauhas Npatitus twb ua tiav tes haujlwm “kho kev” rau Tswv Yexus thiab nws twb ua lub neej ncaj ncees, dawbhuv mus txog thaum kawg. Peb kuj zeem paub tias cov neeg uas ua tus Tswv haujlwm lub neej yuav xaus raws li tus Tswv txojkev npaj, txawm yog yuav xaus rau qhov tu siab, txomnyem los cov neeg ua Nws haujlwm yeej yuav tau qhuas thiab tau nqi zog xwb. Tswv Yexus hais txog tej nqi zog muaj nqis uas Yauhas Npatitus tau li no: “Kuv qhia tseeb rau nej hais tias txhua tus uas yug los ntawm pojniam, tsis muaj ib tug muaj hwjchim npaum li Yauhas tus uas muab neeg ua kevcai raus dej.” (Mathais 11:11a). Tseeb tiag txojkev tuag ntawm cov neeg dawbhuv muaj nqis heev ntawm tus Tswv xubntiag (Phau Ntawv Nkauj 116:15).
Peb yoojyim qaug zog ua tus Tswv haujlwm thaum pom tej lub neej xaus tsis zoo lossis tu siab ntawm cov neeg uas twb ua lossis tabtom ua tus Tswv haujlwm. Tiamsis Timthawj Paulus qhia hais tias: “Peb muaj sia nyob tsis yog peb muaj rau peb, thiab peb tuag, tsis yog peb tuag rau peb xwb. Yog peb muaj sia nyob, peb muaj sia nyob rau tus Tswv, thiab yog peb tuag, peb tuag rau ntawm tus Tswv; txawm yog peb muaj sia nyob lossis peb tuag, peb yeej yog tus Tswv neeg.” (Loos 14:7-8). Yauhas Npatitus lub neej ua haujlwm txhawb tau peb lub zog ncaj ncees nrog tus Tswv mus thiab ua Nws tes haujlwm. Tus Tswv yog tus uas hu peb los ua Nws tes haujlwm niaj hnub pub rau peb tau tej nqi zog muaj nqis nyob mus ibtxhis zoo ib yam li Nws hais, “Tus uas xav ua kuv tus tubtxib, tus ntawd yuav tsum nrog kuv mus, thiab kuv nyob qhov twg kuv tus tubtxib yuav nrog kuv nyob qhov ntawd. Kuv Txiv yuav qhuas tus uas ua kuv tus tubtxib.” (Yauhas 12:26).
Thov Vajtswv,
Tus Tswv, thov pab nyuam yaus niaj hnub ncaj ncees nrog Koj mus thiab rau siab ntso ua Koj tes haujlwm txawm yog yuav ntsib tej kev txomnyem nyuaj siab los nyuam yaus paub hais tias Koj yog tus Tswv uas yuav muab nqi zog rau cov neeg uas rau siab ntso ua Koj tes haujlwm mus txog thaum kawg. Amees.
Peb puas qaug zog, poob siab thaum ua tus Tswv haujlwm? Peb txiav txim siab ua dabtsi thaum kawm tas zaj no?
Nyeem Vajluskub hauv peb lub xyoo: Loos 6:15-7:25
Kênh Youtube BHKTHN:
