Klei Aê Diê Blŭ: Y-Mathiơ 28:19-20
Êlan kliăng: “Kyuanăn nao bĕ diih mjing phung ƀĭng kna hlăm jih jang găp djuê mnuih,” (Y-Mathiơ 28:19a)
Klei êmuh ksiêm mĭn: Si mblang kơ klei mtă bi hriăm “jih jang găp djuê mnuih”? Ya mta bruă brei ngă čiăng bi hriăm klei đăo kơ jih jang găp djuê mnuih? Hruê anei, si klei drei bi mguôp hlăm bruă mtô bi hriăm klei đăo kơ jih jang găp djuê mnuih?
Trăn Klei Aê Diê Blŭ Y-Mathiơ 28:19-20 drei khăng hmư̆ pia “Klei Mtă Prŏng”. Boh blŭ “bi hriăm”, “bi hriăm jih jang găp djuê mnuih” hlăm klei blŭ phŭn klei Grĕk jing mathéteuó, mblang jing “mjing hlei pô anăn jing phung ƀĭng kna amâodah jing pô tui hlue”. Snăn yơh, klei mtă prŏng mơ̆ng Khua Yang Yêsu jing “mjing bĕ jih jang găp djuê mnuih jing phung ƀĭng kna Kâo”. Čiăng lač amâo djŏ knŏng hưn Klei Mrâo Mrang Jăk leh anăn đru digơ̆ đăo kơ Khua Yang jing djăp leh ôh, ƀiădah bi mjing jih jang găp djuê mnuih mâo sơăi phung ƀĭng kna Khua Yang Yêsu, jing phung đăo leh anăn tui hlue Khua Yang.
Čiăng dưi ngă bruă “mtô bi hriăm jih jang găp djuê mnuih” tui si klei mblang anăn, Khua Yang Yêsu mtă kơ phung ƀĭng kna brei ngă ƀiă êdi 3 mta bruă: Tal sa, brei “nao bĕ”, kyuadah “jih jang găp djuê mnuih” čiăng lač kơ jih jang djuê ana, brei drei nao truh hŏng digơ̆. Tal dua, brei “ngă ƀaptem” kơ pô đăo leh, mblang jing čiăng đru digơ̆ hưn bi êdah klei đăo leh anăn sĭt klă mŭt hlăm Phung Sang Aê Diê. Leh anăn tal tlâo, brei “bi hriăm diñu brei gưt jih jang klei Kâo mtă leh kơ diih”. Bruă anei brei drei pô yơh êlâo hĭn hriăm thâo săng klă kjăp “jih jang klei” Khua Yang mtă, snăn kơh dưi mtô bi hriăm pô mkăn.
Klei Khua Yang mtă pioh kơ jih jang hlei pô đăo kơ Khua Yang Yêsu, amâo djŏ ôh knŏng pioh hjăn kơ phung khua pô mtô, kơ phung hiu hưn klei đăo. Wăt tơdah ti anôk dôk, ya bruă ngă, grăp čô drei ăt dưi sơăi bi mguôp hlăm bruă “bi hriăm kơ jih jang găp djuê mnuih” hŏng klei wah lač, bi mđĭ ai lu mnuih myơr klei hdĭp, mtô bi hriăm phung nao hưn leh anăn myơr prăk ngăn đru kơ bruă anei. Mbĭt hŏng bruă jhŏng nao hưn, brei drei luă gŭ, êdu êun, thâo săng klă pô drei bi tuôm. Klei sĭt nik amâo mâo bi mlih ôh ƀiădah ênhă êlan kah mbha klei sĭt nik dưi mlih bi djŏ găl hlue si boh klei leh anăn hŏng pô drei hưn, čiăng kơ pô hmư̆ dưi thâo săng djŏ klă mngač hĭn, amâo djŏ ôh djă krơ̆ng knŏng hjăn sa mta ênhă êlan.
Bi hriăm klei đăo kơ jih jang găp djuê mnuih jing msĕ si bruă prŏng đei êgao kơ hnơ̆ng mnuih dưi ngă, ƀiădah drei mâo klei bi mđĭ ai mơ̆ng Khua Yang, Ñu dôk mbĭt hŏng drei nanao grăp mông grăp anôk (êlan 20b). drei amâo srăng ngă bruă anei hjăn păn ôh kyuadah Yang Mngăt Jăk Aê Diê srăng atăt gai drei leh anăn thiăm klei ktang myang kơ drei. Klei kñăm mtô klei đăo kơ jih jang găp djuê mnuih jing klei mtô mjing phung ƀĭng kna kơ Khua Yang Yêsu yơh leh anăn mprăp kơ phung ƀĭng kna anei lŏ čuê bi mjing phung ƀĭng kna mkăn dơ̆ng mơh, mơ̆ng anăn mŭt mbĭt hŏng hnoh nguh bruă mngăt myang tar ƀar lăn ala, čiăng dưi ƀuh klei sĭt nik klei Khua Yang bi mtlaih lar tar lăn ala.
Mâo lu găp djuê mnuih ti rŏng lăn ala leh anăn wăt hlăm čar drei pô ăt ka mâo lu ôh mnuih đăo kơ Khua Yang, si ngă drei hmiêt mkăp gưt asăp Khua Yang iêô hruê anei čiăng bi mguôp mbĭt hlăm bruă “mtô klei đăo kơ jih jang găp djuê mnuih” mơ̆?
Wah lač: Ơ Khua Yang, bi mni kơ Khua Yang kyuadah Ih khăp kơ jih jang mnuih leh anăn Ih čiăng kơ jih jang găp djuê mnuih dưi mă tŭ klei khăp bi mtlaih mơ̆ng Ih. Akâo Khua Yang đru kâo hmăr thâo kral klei atăt gai mơ̆ng Yang Mngăt Jăk čiăng dưi bi mguôp mbĭt hlăm bruă mtô bi hriăm klei đăo kơ jih jang găp djuê mnuih hŏng ya mta bruă kâo dưi ngă.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 21:37-22:21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
