Mathais 28:19-20
Nqe cim:
“Yog li ntawd, nej cia li tawm mus qhia txhua haivneeg hauv qab ntuj no” (Mathais 28:19a).
Lus nug rau sawvdaws xav:
– Lo lus samhwm “qhia txhua haivneeg” txhais tau li cas?
– Cia kom qhia tau kev ntseeg rau txhua haivneeg, yuav tsum ua dabtsi?
– Nimno, peb muaj feem koom tes rau tes haujlwm qhia kev ntseeg rau txhua haivneeg zoo li cas?
Ntu Vajluskub Mathais 28:19-20 peb ibtxwm paub los ntawm lub npe hu ua “Lus Samhwm”. Lo lus “qhia” hauv “qhia txhua haivneeg” hauvpaus lus Kilis yog mathéteuó, txhais tau hais tias yog “ua kom ib tug neeg twg ua tau thwjtim lossis nrog mus”. Yog li ntawd, Tswv Yexus tej lus samhwm yog “kom lawv los ua Kuv cov thwjtim”. Txhais tau hais tias tsis yog qhia Txojmoo Zoo thiab coj lawv los ntseeg tus Tswv ces tau lawm, tiamsis yuav tsum ua li cas kom txhua haivneeg puavleej ua tau Tswv Yexus cov thwjtim, ntseeg thiab nrog Nws mus.
Cia kom ua tau tes haujlwm “qhia txhua haivneeg” raws li lub ntsiab lus no, Tswv Yexus samhwm kom cov thwjtim yuav tsum ua 3 yam: Tim ib, yog “mus”, vim “txhua haivneeg” hais txog txhua yam neeg, peb yuav tsum mus qhia lawv. Tim ob, yog “ua kevcai raus dej” rau cov neeg los ntseeg tus Tswv, txhais tau hais tias coj lawv qhia tawm kev ntseeg thiab los koom Pawg Ntseeg. Thiab tim peb, yog “qhia kom lawv paub coj raws li txhua yam uas kuv tau qhia rau nej lawm”. Qhov no peb tus kheej yuav tau kawm kev ntseeg kom paub “txhua yam” tus Tswv qhia mam qhia rau lwm tus.
Tus Tswv samhwm rau txhua tus uas ntseeg Tswv Yexus, tsis yog samhwm rau cov xibhwb, cov tub xa moo zoo xwb. Txawm yog nyob rau qhov twg, ua dabtsi, peb txhua tus yeej muaj feem koom tes ua tes haujlwm “qhia txhua haivneeg” los ntawm kev thov Vajtswv, txhawb kom muaj coob leej fij tus kheej, cob qhia tibneeg tawm mus thiab fij nyiaj txiag pab. Dua li qhov uas ua siab tawv qhawv mus, peb kuj yuav tsum txo hwjchim, ua siab mos siab muas, paub cov neeg yus qhia. Qhov tseeb tsis hloov tiamsis tswvyim qhia qhov tseeb muaj feem hloov tau raws li lub tsamthawj thiab npoj neeg, ua li cas kom cov mloog totaub meej tsis yog siv tib lub tswvyim qhia nkaus xwb.
Qhia kev ntseeg rau txhua haivneeg zoo li yog ib tes haujlwm loj heev hla tibneeg lub peevxwm. Tiamsis peb tau txhawb zog hais tias tus Tswv nrog nraim peb nyob txhua qhov chaw thiab txhua lub sijhawm (nqe 20b). Tsis yog peb ua tes haujlwm no tib leeg, rau qhov Vaj Ntsujplig yuav qhia thiab pub peevxwm rau peb ua. Homphiaj ntawm tes haujlwm qhia kev ntseeg rau txhua haivneeg yog cob qhia neeg ua Tswv Yexus thwjtim thiab npaj rau cov thwjtim no mus cob qhia lwm cov thwjtim ntxiv, qhov no ua rau peb koom tau lub zeem muag sab ntsujplig kom xwv peb ntsia pom tus Tswv txojkev cawm dim thiab qhia mus thoob qab ntuj.
Thov Vajtswv,
Tus Tswv, nyuam yaus ua Koj tsaug vim Koj hlub txhua tus neeg thiab xav kom txhua haivneeg puavleej tau txais Koj txojkev cawm dim. Thov Koj qhia kom nyuam yaus paub ua raws li Vaj Ntsujplig qhia, koom tes rau tes haujlwm qhia txhua haivneeg raws li nyuam yaus ua tau. Amees.
Muaj ntau haivneeg nyob hauv ntiajteb thiab nyob kiag hauv peb lub tebchaws los tseem muaj cov neeg tsis tau ntseeg tus Tswv, peb puas txaus siab ua raws li tus Tswv lub suab hu hnub no, koom tes rau tes haujlwm “qhia txhua haivneeg” lossis tsis koom?
Nyeem Vajluskub hauv peb lub xyoo: Tes Haujlwm 21:37-22:21
Kênh Youtube BHKTHN:
