Klei Aê Diê Blŭ: Klei Bi Hriêng 20:6
Êlan kliăng: “Lu mnuih hưn ñu pô jing jăk, ƀiădah hlei dưi ƀuh pô sĭt suôr?” (Klei Bi Hriêng 20:6)
Klei êmuh ksiêm mĭn: Si klei khăng bi kpleh klei blŭ hŏng ai tiê mnuih? Si ngă Klei Aê Diê Blŭ mtô kơ klei sĭt suôr? Hŏng ya êlan drei srăng hriăm mjuăt leh ngă knuih sĭt suôr?
Hlăm Klei Bi Hriêng 20:6, Mtao Y-Salômôn brei ƀuh klei bi mklăk plah wah klei blŭ hŏng ai tiê mnuih. Lu mnuih hưn kơ ñu pô jing mnuih jăk, sĭt suôr, lu mnuih hưn ktưn kơ ñu pô jing mnuih thâo pap ƀiădah jih jang klei hưn ktưn anăn bi mklăk kluôm dhuôm hŏng mnuih mâo ai tiê kpă, sĭt suôr (dlăng thiăm Klei Bi Hriêng 19:22). Boh blŭ “jăk” hlăm êlan Klei Bi Hriêng anei mblang mơ̆ng klei blŭ phŭn jing “hesed” bi êdah klei khăp dôk lă lar, amâo mlih ôh. Dleh snăk mâo mnuih msĕ snăn hlăm lăn ala anei. Msĕ si klei lu mnuih khăng bi ƀuăn “khăp nanao hlŏng lar” ƀiădah dŭm čô dưi bi sĭt klei ƀuăn anăn. Anak mnuih ƀuăn lu mơh leh anăn amâo bi sĭt ôh klei ƀuăn lu mơh. Diñu lui mtam klei bi ƀuăn rơ̆ng tơdah ƀuh klei anăn amâo lŏ ba klei tŭ dưn kơ diñu ôh.
Mtao Y-Salômôn êmuh mă kơ ñu pô hlei dưi ƀuh pô sĭt suôr! Hlăm klei blŭ phŭn jing “enumim” lŏ mblang jing bi êdah klei mnuih bi mguôp sĭt suôr hŏng Yêhôwa, ƀiădah klei čiăng lač tinei jing ƀiă snăk mnuih hlăm phung drei dưi truh kơ hnơ̆ng čuăn anăn. Pruĕ blŭ “hlei dưi ƀuh” bi êdah klă mnuih jăk klă ênŭm hin snăk. Klei bi msĕ hlăm êlan Klei Bi Hriêng anei đru drei thâo săng klă kơ klei ai ngăm mơ̆ng knuih soh anak mnuih. Bi mni leh anăn hưn ktưn mă kơ pô ƀiădah boh sĭt gơ̆ amâo djŏ msĕ snăn ôh.
Brei phung anak čô Aê Diê hriăm leh anăn jing mnuih sĭt suôr klă ênŭm. Êlâo kơ drei mĭn ngă klei kpă, sĭt suôr hŏng mnuih, brei drei hriăm hdĭp hŏng klei kpă, sĭt suôr hŏng Aê Diê êlâo hĭn. Klei Aê Diê Blŭ lač: “Tơdah drei hưn klei soh drei, Ñu jing sĭt suôr leh anăn kpă, srăng pap brei klei soh drei leh anăn bi doh hĕ drei mơ̆ng jih jang klei wê” (I Y-Yôhan 1:9). Aê Diê drei jing Pô sĭt suôr, brei drei jing sĭt suôr msĕ si Ñu mơh. Amâo mâo sa čô hlăm phung drei jing klă ênŭm ôh, kyuanăn brei drei kmhal leh anăn akâo kơ Aê Diê pap brei klei soh drei. Hŏng ai ktang drei pô, drei amâo dưi jing klă ênŭm ôh, ƀiădah Khua Yang srăng pap brei leh anăn bi doh drei, mjing drei klă ênŭm hlăm Ñu. Drei dưi mâo klei sĭt suôr mơ̆ng klei hriăm mjuăt hŏng klei kpĭ mjuăt myang sui thŭn amâo djŏ knŏng bhiâo ôh. Khua Yang Yêsu lač: “Hlei pô sĭt suôr hlăm bruă đơ điêt srăng jing sĭt suôr msĕ mơh hlăm bruă prŏng; leh anăn hlei pô jing wê hlăm bruă đơ điêt, srăng jing wê msĕ mơh hlăm bruă prŏng” (Y-Luk 16:10). Klei anei mñă kơ grăp čô drei bi sĭt klei drei ƀuăn, sĭt suôr hlăm djăp mta bruă, kčưm dơ̆ng mơ̆ng bruă điêt. Akâo Khua Yang đru grăp čô drei ƀuăn dôk sĭt suôr hŏng Khua Yang, sĭt suôr hŏng mnuih. Brei drei hdơr klei jăk Aê Diê brei kơ drei amâo tuôm tuč ôh, leh anăn klei sĭt suôr Ñu prŏng êdimima (Klei Čŏk Hia 3:22-23).
Si ngă drei ƀuăn dôk sĭt suôr hŏng Aê Diê leh anăn hŏng mnuih mơ̆?
Wah lač: Ơ Aê Diê, akâo kơ Ih pap brei kơ kâo kyuadah lu blư̆ kâo amâo dôk sĭt suôr hŏng Ih leh anăn hŏng mnuih ôh. Đru kâo thâo huĭ mpŭ kơ Ih nanao leh anăn êbat tui si Yang Mngăt Jăk Ih atăt gai čiăng kơ kâo dưi jing mnuih klă ênŭm hlăm Ih.
Dlăng Klei Aê Diê Blŭ hlăm tlâo thŭn: Y-Markôs 14:32-72
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
