Klei Aê Diê Blŭ: Y‑Yêrêmi 41:16 – 42:3
Êlan kliăng: “Kâo srăng bi hriăm ih leh anăn ktrâo kơ ih êlan ih srăng tui hlue; Kâo srăng kčĕ kơ ih hŏng ală Kâo dôk dlăng kơ ih” (Klei Mmuñ Hđăp 32:8)
Klei êmuh ksiêm mĭn: Ya ngă Y‑Jôhanan atăt phung ƀuôn sang mrâo dưi bi mtlaih nao ti čar Êjip? Ya hdră kñăm ñu nao kơ Khua pô hưn êlâo Y‑Yêrêmi? Si ngă čiăng kơ drei mâo nanao klei čuăn ngă djŏ?
Leh “…atăt jih jang phung ƀuôn sang ăt dôk mơ̆ng phung Y‑Ismaêl anak êkei Y‑Nêthania atăt jing mnă mơ̆ng ƀuôn Mispa leh ñu bi mdjiê Y‑Gêdalia anak êkei Y‑Ahikam” (êlan 16), phung ƀuôn sang ti gŭ klei Y‑Jôhanan gĭt gai čuăn nao ti Êjip hrô kơ wĭt ti ƀuôn Mispa. Ya ngă snăn? Kyua diñu huĭ phung Kaldê srăng đĭ ai ngêñ leh hmư̆ Khua kahan mtao Y‑Gêdakia, jing mnuih diñu jao bruă, Y‑Ismaêl mdjiê leh. Êpul mnuih mphŭn nao leh anăn dôk jưh ti Kimham, giăm ƀuôn Betlêhem, mĭn čiăng nao kơ čar Êjip. Hlăk anăn jih êpul mơ̆ng kahan truh kơ mnuih ƀuôn sang, mơ̆ng khua mduôn truh kơ hđeh nao kơ Khua pô hưn êlâo Y‑Yêrêmi, hŏng klei akâo kơ khua pô hưn êlâo kwưh kơ Yêhôwa Aê Diê, “Čiăng kơ Yêhôwa Aê Diê ih dưi bi êdah kơ hmei êlan hmei srăng nao leh anăn klei hmei srăng ngă” (êlan 3).
Aê Diê brei Khua pô hưn êlâo ƀuh klă klei mgưt hlăm Y‑Jôhanan leh anăn phung ƀuôn sang (Y‑Yêrêmi 42:20). Wăt tơdah hlăk anăn phung ƀuôn sang Israel thâo kơ boh klei pô “kyuadah phung hmei ăt dôk knŏng ƀiă tui si ih ƀuh hmei” (êlan 2), leh anăn diñu thâo knŏng Yêhôwa Aê Diê kơh dưi ktrâo kơ diñu êlan hlue ngă leh anăn djăp mta klei brei ngă (êlan 3). Khădah snăn diñu pô lŏ čuăn leh amâo lŏ wĭt ôh ti ƀuôn Mispa, amâo lŏ dôk ôh hlăm ala čar čiăng tŭ klei phung Kaldê kiă kriê nao ti čar Êjip. Dưi lač Y‑Jôhanan mâo leh klei čuăn djŏ hlăm bruă gĭt gai êpul lĭng kahan bi mtlaih phung mnă Y‑Ismaêl mă leh, ƀiădah ñu lŏ mâo klei čuăn ngă soh hlăm bruă atăt phung ƀuôn sang nao ti čar Êjip hrô kơ wĭt ti Mispa hlue si kei Yêhôwa mtă leh leh anăn msĕ si Khua kahan mtao Y‑Gêdalia hlăk mrâo ngă khua mđĭ ai phung ƀuôn sang. Y‑Jôhanan hlue ngă hlue si klei pô čiăng lač jing djŏ, ƀiădah ñu ăt čiăng Aê Diê nao ai hŏng klei ñu čuăn ngă leh!
Mơ̆ng leh ngă soh, anak mnuih “amâo tơl mâo klei guh kơang Aê Diê ôh” (Rôm 3:23) anăn drei amâo dưi čuăn ngă djŏ ôh hlăm klei hdĭp. Hlăm klei hdĭp, lu blư̆ drei msĕ si Y‑Jôhanan, ăt akâo kơ Aê Diê ktrâo lač ƀiădah lŏ čiăng Aê Diê nao ai hŏng klei pô kčah leh! Čŏng čuăn ngă hdră êlan mă bruă, mnia blei; čŏng ruah pô khăp hlue si klei pô čiăng… leh anăn kơh wah lač akâo kơ Aê Diê hơêč hmưi kơ ya klei pô čuăn ngă leh! Aê Diê amâo djŏ ôh jing “pui kđen myang” kơ drei gai. Čiăng mâo klei čuăn ngă djŏ leh anăn êbat hlăm klei kpă ênô, knŏng mâo sa hdră sa anăn jing gưt asăp hlue si klei Aê Diê atăt gai. Năng ai drei amâo thâo săng jih ôh êlan Aê Diê atăt drei nao, ƀiădah brei đăo kjăp Pô Myang Hĭn, Thâo mĭn brei nanao klei jăk hĭn kơ anak Ñu.
Drei ƀuăn gưt nanao hlue si klei Aê Diê ktrâo lač mơ̆?
Wah lač: Ơ Aê Diê Pô Myang hĭn, Thâo mĭn! Akâo kơ Ih brei kâo ƀuh klei êdu awăt, klei čuăn ngă kâo kƀah klă mngač čiăng kâo jih ai tiê akâo klei Ih ktrâo lač leh anăn srăng gưt asăp Ih hŏng ai tiê đăo knang kluôm ênŭm.
Dlăng Klei Aê Diê Blŭ hlăm tlâo thŭn: Y‑Sakari 11:1-12:14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
